އުރީދޫ މޯލްޑިވްސްގެ މިއަހަރުގެ އަހަރީ އާންމު ޖަލްސާ މާރިޗު މަހު ބޭއްވުމަށް ނިންމައިފިއެވެ.
އުރީދޫއިން ބުނީ އެ ކުންފުނީގެ މިއަހަރުގެ އަހަރީ އާންމު ޖަލްސާގައި ބައިވެރިވެވޭނީ އަދި ހިއްސާގެ ފައިދާ ލިބޭނީ 16 ފެބްރުއަރީ 2023 ވާ ބުރާސްފަތި ދުވަހުގެ މެންދުރު 2:00 ގެ ކުރިން އުރީދޫ މޯލްޑިވްސްގެ ހިއްސާދާރުންގެ ގޮތުގައި ރަޖިސްޓަރީވެފައިވާ ފަރާތްތަކަށްކަމަށެވެ. މިގޮތުން، އަމިއްލައަށް ނުވަތަ ޕްރޮކްސީ މެދުވެރިކޮށް އަހަރީ އާންމު ޖަލަސާގައި ބައިވެރިވެ ފާސްކުރުމަށް ހުށަހަޅާފައިވާ އެޖެންޑާ އައިޓަމްތަކަށް ވޯޓު ދެވޭނެކަމަށް އުރީދޫއިން ބުނެއެވެ.
އުރީދޫ މޯލްޑިވްސްގެ މި އަހަރުގެ އަހަރީ އާންމު ޖަލްސާ އޮންނާނެ ތާރީހު އަދި އެޖެންޑާ، 21 ފެބްރުއަރީ ގެ ކުރިން އާންމުކުރުން އޮންނާނެކަމަށް އެ ކުންފުނިން ބުނެއެވެ.
އަހަރީ އާންމު ޖަލްސާގައި މައިގަނޑު ގޮތެއްގައި އޮންނަނީ ނިމިދިޔަ އަހަރުގެ ޔައުމިއްޔާ ފާސްކުރުމާއި، ބޯޑުން ކަނޑައަޅާ ހިއްސާގެ އަދަދު ހިއްސާދާރުންގެ ވޯޓުން ނިންމުމާއި ކުރިއަށްއޮތް އަހަރަށް ކުންފުނީގެ ބޯޑު އަދި އޮޑިޓަރު ހޮވުން ފަދަ ކަންކަމެވެ.
އުރީދޫ މޯލްޑިވްސްއަށް 2021 ވަނަ އަހަރު ލިބުނު ފައިދާ އިން ހިއްސާ އަކަށް ބަހާފައިވަނީ 2.34 ރުފިޔާއެވެ. ކުންފުނީގެ ފައިދާގެ 85 ޕަސެންޓް ވަނީ ހިއްސާދާރުންގެ މެދުގައި ބަހާފައެވެ.