އިންސާނީ މުޖުތަމައެއް ކުރިއަރައި ކާމިޔާބުވެދިއުމަށްޓަކައި މުޖުތަމައަކަށް އެންމެ ބޭނުންވާ އެއްޗަކީ އަމާންކަމާއި ރައްކާތެރިކަން ކަމަށް މިނިސްޓަރ އޮފް ހޯމްއެފެއާޒް އިމްރާން ޢަބްދުﷲ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ތާޖުއްދީން ސްކޫލާއި، ޣިޔާސުއްދީން އިންޓަނޭޝަނަލް ސްކޫލް އަދި ހުޅުމާލެ ޣާޒީ ސްކޫލު ދަރިވަރުންނަށް ކުރިއަށް ގެންދިޔަ ޓްރެފިކް މޮނީޓަރސް ޕްރޮގްރާމް ނިންމުމުގެ ރަސްމިއްޔާތު ޝަރަފުވެރި ކޮށްދެއްވާ ދެއްކެވި ވާހަކަފުޅުގައެވެ.
މިނިސްޓަރ އިތުރަށް ވިދާޅުވީ ކޮންމެ ކުއްޖަކުވެސް ކާމިޔާބީއާ ހަމައަށް ވާސިލުވުމަށް އަޚުލާގު މުހިންމު ދައުރެއް އަދާކުރާ ކަމަށެވެ. އަދި ނިމިގެން މިދިޔައީ ކޮންމެ ކުއްޖެއްގެ މުސްތަގުބަލަށްޓަކައިވެސް ކުރެވުނު މުހިންމު މަސައްކަތެއް ކަމަށްވެސް ވިދާޅުވިއެވެ.
ޖަނަވަރީ 21 އިން 25 އަށް ކުރިއަށް ގެންދިޔަ ޓްރެފިކް މޮނީޓަރސް ޕްރޮގްރާމްގައި، އެއްގަމު ދަތުރު ފަތުރުގެ ގާނޫނާއި ގަވާއިދުތަކުގެ މައުލޫމާތުދިނުމާއި ދަރިވަރުންގެ އަމިއްލަ ނަފްސުގެ ސަލާމަތާއި ރައްކާތެރިކަމުގެ މައުލޫމާތު ދިނުން ކުރިއަށް ގެންގޮސްފައިވެއެވެ.
އަދި ސްކޫލު ސަރަހައްދާއި މަގުމަތީގައި ހަރަކާތްތެރިވާ ދަރިވަރުން އާންމުންނާ މުއާމަލާތުކުރުމުގައި ރީތި އަދަބުތަކަށް އަހުލުވެރިކުރުވުމާއި ދިވެހި ބަހުގެ ހަމަތަކާއި އުސޫލުތައް ހިމެނޭގޮތަށް މުއާމަލާތުކުރުމުގެ ހުނަރުތައް ދަސްކޮށްދީފައިވެއެވެ.
އޭގެ އިތުރުން، ޓްރެފިކް ބެލެހެއްޓުމާ ގުޅޭގޮތުން މަގުމަތީގައި ދަރިވަރުންނަށް އަމަލީ ހަރަކާތްތައްވެސް ކުރިއަށް ގެންދިޔައެވެ. މި ސްކޫލްތަކުގައި ވަކިވަކިން ކުރިއަށްގެންދިޔަ މި ޕްރޮގްރާމް، ތާޖުއްދީން ސްކޫލުގެ 36 ދަރިވަރުން، ޣިޔާސުއްދީން އިންޓަނޭޝަނަލް ސްކޫލުގެ 34 ދަރިވަރުން އަދި ހުޅުމާލެ ޣާޒީ ސްކޫލުގެ 34 ދަރިވަރުން ފުރިހަމަކޮށްފައިވެއެވެ.
މި ރަސްމިއްޔާތުގައި ހެޑް އޮފް ރޯޑްޕޮލިސްގެ ޗީފް ސުޕްރިންޓެންޑެންޓް އޮފް ޕޮލިސް މުޙައްމަދު ދާއޫދުއާއި، ފުލުހުންގެ އެގްޒެކެޓިވް އޮފިސަރުންނާއި ކޮމިޝަންޑު އޮފިސަރުންނާއި މިސްކޫލްތަކުގެ އިސްވެރިން ބައިވެރިވިއެވެ.