ސުޕަވައިޒް ކުރާނޭ ފަރާތެއްގެ ބެލުމުގެ ދަށުން ކުދިން ލައްވާ ބައެއް މަސައްކަތް ކުރުމުގެ ހުއްދަ މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ދީފިއެވެ.
މިހުއްދަ ކުދިންނަށް ލިބިދެނީ ކުޑަކުދިންގެ ޙައްޤުތައް ރައްކައުތެރި ކުރުމުގެ އާންމު ގަވާއިދަށް އެއްވަނަ އިސްލާހް އިޞްލާޙު ނައުމުގެ ގަވާއިދުގެ ދަށުންނެވެ.
މި ގަވާއިދުގައިވަނީ ސުޕަވައިޒް ކުރާނޭ ފަރާތެއްގެ ބެލުމުގެ ދަށުން 16 އަހަރުން މަތީގެ ކުދިންނަށް ކުރެވޭނެ ކަންކަމާއި ކުޑަކުދިން ބައިވެރިކުރުން މަނާ ކަންކަންވަނީ ބަޔާންކޮށްފައެވެ. އެގޮތުން ސުޕަވައިޒް ކުރާނޭ މީހެއްގެ ބެލުމުގެ ދަށުގައި ކުދިންނަށް ކުރުމަށް ހުއްދަދީފައިވާ މަސައްކަތްތަކުގެ ތެރޭގައި ރޭނުމާއި ސިމެންތި ޖެހުމާއި، ގަރާޖާއި ވޯކްޝޮޕާއި ކާޕެންޓްރީއާއި ވެއަރހައުސްތަކުގައި ކުރާ ޢަމަލީ މަސައްކަތްތަކާއި، ދަތުރުފަތުރު ކުރުމުގެ ޚިދުމަތެއް ޢަމަލީގޮތުން ކޮށްދިނުމުގެ މަސައްކަތްތަކާއި، މެކަނައިޒްޑްކޮށް ކުރެވޭ މަސްވެރިކަމުގެ މަސައްކަތްތަކުގެ ތެރެއިން 2 ހަފުތާއަށްވުރެ ދިގުނުވާނޭ ގޮތަށް ކަނޑުމަތީގައި ހޭދަވާ މަސައްކަތްތައް ހިމެނެއެވެ. މީގެ އިތުރުން ދިވެހިރާއްޖޭގައި ހިންގާ ބަނދަރެއްގައި ކުރާ އިދާރީ މަސައްކަތްތަކާއި، ޓެކްނިކަލް ބާވަތްތަކުގެ މަސައްކަތްތަކާއި، އެއްވެސް
ބާވަތެއްގެ ކާނާއެއްގެ ފުޑް ޕްރޮސެސިންގ މަރުޙާލަތަކުގައި ހިމެނޭ މަސައްކަތްތަކާއި އެއްވެސް ބާވަތެއްގެ ދިރޭއެއްޗެއް ގެންގުޅެ، އެ ތަކެތި އާލާކުރުމުގެ މަސައްކަތް ކުރާ ތަނެއްގައި، އެފަދަ ދިރޭ އެއްޗެއްހި ބެލެހެއްޓުމާ ގުޅޭ މަސައްކަތް ސުޕައިވަރެއްގެ ބެލުމުގެ ދަށުން ކުރުމުގެ ހުއްދަވަނީ ދީފައެވެ.
މިފަދަ މަސައްކަތްތައް އެ ކުއްޖާ ލައްވާ ކުރުވޭނީ ވަޒީފާދޭ ފަރާތާއި ކުއްޖާގެ ބެލެނިވެރި ފަރާތާ ދެމެދު ވެވޭ އެއްބަސްވުމެއްގެ ދަށުން ބެލެނިވެރިޔާގެ އިއުތިރާޒެއް އެކަމުގައި ނެތް ނަމަ އެވެ. ކުދިންގެ މަސައްކަތް ސުޕަވައިޒްކުރާނެ ފަރާތެއް ކަނޑައަޅައި، އެކަން މޮނިޓާކުރުމުގެ އެންމެހައި ޒިންމާތަކެއް އުފުލަން ޖެހޭނީ ވަޒީފާ ދޭ ފަރާތުން ކަމަށްވެސް މިޤަވާއިދުގައިވަނީ ބަޔާންކޮށްފައެވެ.
މި ގަވާއިދުގެވަނީ ކުޑަކުދިން ބައިވެރިކުރުން މަނާ މަސައްކަތްތައްވެސް ބަޔާންކޮށްފައެވެ. އޭގެ ތެރޭގައި ނުރައްކާތެރި ކެމިކަލްތަކާއި ގޮވާތަކެތި އުފުލުމާއި، އެ ތަކެތި ރައްކައުކުރުމާއި، ހިފައި ގެންގުޅުމާއި، އެއް ތަނުން އަނެއް ތަނަށް ގެންދިއުމުގެ މަސައްކަތްތަކާއި، ތެލާއި ޕެޓްރޯލު ފޯރުވުމުގެ އަމަލީ މަސައްކަތްތަކާއި، ސިނގިރޭޓާއި، ދުންފަތުގެ އެހެނިހެން ބާވަތްތަކާއި، ވޭޕިން ފަދަ އެއްވެސް ބާވަތެއް ވިއްކުމުގެ އަމަލީ މަސައްކަތާއި، ދިވެހިރާއްޖޭގައި ހިންގާ ބަނދަރެއްގައި ކުރާ މަސައްކަތުގެ ތެރެއިން ބަނދަރުގައި ކުރާ ހެވީ މެޝިނަރީ އޮޕަރޭޝަންސް ފަދަ ބާވަތްތަކުގެ މަސައްކަތްތައް ހިމެނެއެވެ. އަދި ސަފާރީތަކާއި ޔޮޓުތަކުގައި ކުރާ ހުރިހާ ބާވަތެއްގެ މަސައްކަތުގެ އިތުރުން، ކޮންސްޓްރަކްޝަންގެ މަސައްކަތްތަކުގެ ތެރެއިން ރޭނުމާއި ސިމެންތި ޖެހުން ފިޔަވައި އެހެން މަސައްކަތްތަކާއި ދިވެހިރާއްޖޭގެ އެއްވެސް ޤާނޫނެއްގައި ނުވަތަ ގަވާއިދެއްގައި މަނާކޮށްފައިވާ މަސައްކަތެއް، ނުވަތަ އިސްލާމްދީން މަނާކުރާ މަސައްކަތްތައް ކުދިން ލައްވާ ކުރުވުން މިޤަވާއިދުގެ ދަށުން މަނާވެއެވެ.
އަދި ތަމްރީނު ދިނުމުގެ ބޭނުމުގައި ވިޔަސް، ނުވަތަ ޢާއިލާއިން ކުރާ މަސައްކަތެއްގައި ކުދިން ބައިވެރިކުރުމުގެ ބޭނުމުގައި ވިޔަސް، މިއިން އެއްވެސް މަސައްކަތެއްގައި ކުދިން ބައިވެރިކުރުމަކީ މިގަވާއިދުގެ ދަށުން މަނާ ކަމެކެވެ.