ޔުގަންޑާގައި ބޭއްވި ރިޔާސީ އިންތިޚާބު، އެޤައުމުގެ ރައީސް ޔުވެރި މުސެވެނީ ކާމިޔާބު ކުރައްވައިފިއެވެ.ޔުގަންޑާގެ އިންތިޚާބުތަކާބެހޭ އިދާރާގެ ވެރިޔާ ބަދްރު ކިގުންޑު ވިދާޅުވީ މުސެވެނީ އިންތިޚާބު ކާމިޔާބު ކުރެއްވީ ވޯޓުގެ 60.8 އިން ސައްތަ ހޯއްދަވައިގެން ކަމަށާ އޭނާއާ އެންމެ ގާތުން ވާދަކުރެއްވި ކިޒާ ބެސިގްޔޭ އަށް ލިބިވަޑައިގަތީ 35.4 އިންސައްތަ ވޯޓު ކަމަށެވެ.ޔުގަންޑާގެ އިންތިޚާބުތަކާބެހޭ އިދާރާގެ ވެރިޔާ ބަދްރު ކިގުންޑު ވިދާޅުވީ މި ނަތީޖާއާއެކު ރިޔާސީ އިތުރު ދައުރަކަށް މުސެވެނީ އިންތިޚާބުވެވަޑައިގެންފައިވާ ކަމަށެވެ. ޔުގަންޑާގައި ބޭއްވި ރިޔާސީ އިންތިޚާބު އިނިސްޕެކްޓް ކުރުމުގައި ހަރަކާތްތެރިވި އޮބްޒާވަރުންވަނީ އެއިންތިޚާބުގައި ޤަވާއިދާ ޚިލާފު އެތަށް ކަމެއް ހިނގާފައިވާ ކަމުގެ ޝަކުވާތައް ކުރައްވާފައެވެ. އަދި 30 އަހަރުގެ ދިގުމުއްދަތެއްގައި ވެރިކަން ކުރައްވާފައިވާ މުސެވެނީ މި އިންތިޚާބު ކާމިޔާބު ކުރެއްވީ އޭނާގެ ވާދަވެރި ކެންޑިޑޭޓުންނަށް ބޮޑެތި ހުރަސްތަކެއް ކުރިމަތި ކުރައްވައިގެންކަމަށްވެސް ރިޕޯޓްތައް ބުނެއެވެ.