މިދިޔަ އަހަރުވެސް އެންމެ ގިނައީ ވައްކަމުގެ މައްސަލަތައް

މިދިޔަ އަހަރު ފުލުހުންގެ އިދާރާއަށް ހުށަހަޅާފައިވާ މައްސަލަތަކުގެ ތެރޭގައިވެސް އެންމެ ގިނައީ ވައްކަމުގެ މައްސަލަތައްކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

ފުލުހުންނަށް ހުށައެޅޭ މައްސަލަތަކުގެ ތަފާސްހިސާބުތަށް ހާމަކުރަން ފެށީންސުރެއް ވައްކަމުގެ މައްސަލަތައް ހުރީ އެވްރެޖްކޮށް 3000 އިން މަތީގައެވެ. 2022 ވަނަ އަހަރު ނިމުނުއިރު ވައްކަމުގެ 3973 މައްސަލައެއް ފުލުހުންނަށް ހުށަހަޅާފައިވެއެވެ.

މިއަހަރުގެ މިހާތަނަށްވެސް ވައްކަމުގެ 247 މައްސަލަވަނީ ހުށައެޅިފައެވެ. ފުލުހުންގެ ތަފާސްހިސާބުތަކުން ދައްކާގޮތުގައި މިދިޔަ އަހަރު އެ އިދާރާއަށް ޖުމްލަ 11،389 މައްސަލަ ހުށަހަޅާފައިވެއެވެ. އޭގެތެރެއިން އެންމެ ގިނައީ ވައްކަމުގެ މައްސަލަަތައްކަމަށް ތަފާސް ހިސާބުތަކުން ދައްކައެވެ.

ފާއިތުވި 3 އަހަރަށް ބަލާއިރު، 2019 ވަނަ އަހަރު ވައްކަމުގެ 4547 މައްސަލަ، 2020 ވަނަ އަހަރު 3578 މައްސަލަ، އަދި 2021 ވަނަ އަހަރު 4677 މައްސަލަ ވަނީ ރިޕޯޓްކޮއްފައެވެ.

މިދިޔަ އަހަރު ފުލުހުންނަށް ހުށަހެޅުނު މައްސަލަތަކުގެ ތެރޭގައި ވައްކަމުގެ މައްސަލަތަކުގެ އިތުރުން ދެން އެންމެ ގިނައިން ރިޕޯޓުކޮށްފައި ވަނީ ޓްރެފިކް މައްސަލަތަކާއި، މަސްތުވާތަކެތީގެ މައްސަލަތަކާއި، އެއްޗެހި ގެއްލިގެން ރިޕޯޓްކޮށްފައިވާ މައްސަލަތަކެވެ.

2022 ވަނަ އަހަރު ފުލުހުންނަށް ހުށަހެޅުނު މައްސަލަތައް:

■ ވައްކަމުގެ 3973 މައްސަލަ
■ ޓްރެފިކް އެކްސިޑެންޓުގެ 1611 މައްސަލަ
■ މަސްތުވާތަކެއްޗާ ގުޅޭ 1424 މައްސަލަ
■ އެއްޗެހި ގެއްލިގެން 1411 މައްސަލަ
■ މަކަރާއި ހީލަތް ހެދުމުގެ 912 މައްސަލަ
■ އަނިޔާކުރުމުގެ 517 މައްސަލަ
■ މުދަލަށް ގެއްލުންދިނުމުގެ 475 މައްސަލަ
■ ފޭރުމުގެ 374 މައްސަލަ
■ ޖިންސީ ގޯނާގެ 331 މައްސަލަ
■ ގެވެށި އަނިޔާގެ 229 މައްސަލަ
■ ފޯޖް ކުރުމުގެ 117 މައްސަލަ
■ ޗެކް ބައުންސްވުމުގެ 15 މައްސަލަ

ކުށް މަދުކުރުމަށް އަތޮޅުތަކުގެ ޕޮލިސް ސްޓޭޝަންތަކުން ކައުންސިލްތަކާއި ގުޅިގެން ދަނީ ތަފާތު މަސައްކަތްތައް ކުރަމުންނެވެ. ވަކިން ޚާއްސަކޮށް ވައްކަމުގެ މައްސަލަތައް މަދު ކުރުމަށްޓަކައި، ގޭގެއަށް ޑޯޓުޑޯ ޕްރޮގުރާމުތައް ހިންގައި، އާންމުންގެ ހޭލުންތެރިކަން އިތުރު ކުރުމަށް ގިނަ ހަރަކާތްތަކެއް ފުލުހުން ދަނީ ކުރިއަތް ގެންދަމުންނެވެ.