ފުވައްމުލަކު ސިޓީގައި އަޅާ ދަނޑުވެރިކަމަށް ބޭނުންވާ ޤައުމީ ފެންވަރުގެ ލެބޯޓަރީގެ ބިންގާ އަޅައިފިއެވެ.
މި ލެބޯޓަރީގެ ބިންގާ އަޅުއްވައިދެއްވީ މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ.ހުސައިން ރަޝީދު ހަސަންއާއި، ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ސަފީރު އެންރީކޯ ގަވޭލިއާއާއި، ފުވައްމުލައް ސިޓީ ކައުންސިލްގެ ރައީސް އިސްމާއިލް ރަފީޤްއެވެ.
އެގްރިކަލްޗަރ މިނިސްޓްރީން ވަނީ ފުވައްމުލަކު ސިޓީ ކައުންސިލާއިއެކު މިތަން އިމާރާތްކުރާ ބިމުގެ އެއްބަސްވުމުގައި ސޮއިކުރުމަށްވެސް ރަސްމިއްޔާތެއް ބާއްވާފައެވެ.
މިނިސްޓްރީން ވިދާޅުވީ، މިއީ ރާއްޖޭގައި މިގޮތަށް އަޅާ ފުރަތަމަ ލެބްކަމަށެވެ. ދަނޑުވެރިކަމުގެ ޤައުމީ ލެބޯޓްރީ ޤާއިމްކުރުމަށް ހަމަޖެހިފައިވަނީ ޖަޕާން ސަރުކާރުގެ އެހީގެ ދަށުން ދިވެހި ސަރުކާރާއި، ޔޫއެންޑީޕީއާއި ގުޅިގެން ޔޫއެންޑީޕީން ތަންފީޒުކުރާ ”ޕްރޮޖެކްޓް ފޯރ ޑިވެލޮޕިންގ ސަސްޓެއިނަބަލް އެގްރިކަލްޗަރ އިކޮނޮމީ“ މަޝްރޫއުގެ ދަށުންނެވެ.
ފިޝަރީޒް މިނިސްޓްރީން ވިދާޅުވީ، މި ތަން ތަރައްގީކުރާނީ ރައްޔިތުން ބަލައިގަންނާނެ ފަދަ ގޮތަކަށް 4 ކަމަކަށް ހާއްސަ ލެބޯޓަރީއަކާއި އެކުގައިކަމަށެވެ. އޭގެތެރޭގައި ފަސް ތަހުލީލު ކުރުމާއި، ގަސްތަކަށް ޖެހޭ ބަލިތައް ދެނެގަތުމާއި، އަދި ގަސްތަކުގެ ޓިޝޫ ނަގައިގެން ކަލްޗަރކުރެވޭނެ އިންތިޒާމް ހަމަޖެހިގެންދާނެކަމަށް މިނިސްޓްރީން ވިދާޅުވެއެވެ.
ބިންގާ އެޅުމަށްފަހުގައި އެ މަސައްކަތް މިނިސްޓްރީން މިހާރު ވަނީ ކައުންސިލަށް ހަވާލުކޮށްފައެވެ.
މިނިސްޓްރީން ވިދާޅުވީ ދެން ކައުންސިލުން އިއުލާންކޮށްގެން އެކަން ބަޔަކާއި ހަވާލުކޮށްގެން މަސައްކަތް ކުރިއަށްގެންދާނެކަމަށެވެ. އެގްރިކަލްޗަރ މިނިސްޓްރީން ވިދާޅުވީ، މި މަސައްކަތް ހަވާލުކުރާތާ 390 ދުވަހުގެ ތެރޭގައި ނިންމަންޖެހޭނެކަމަށެވެ.
މި މަޝްރޫއަށް ބޭނުންވާ ފައިސާ މިހާރު ވަނީ ހަމަޖެހިފައެވެ. މިތަނަށް ބޭނުންވާ އާލާތްތައް އިންޑިއާ ސަރުކާރުން ދޭއިރު، ސީޑްސް ޕްރޮޖެކްޓް ޖަޕާން މަޝްރޫއުގެ ދަށުން ޕްރޮޖެކްޓަށް ބޭނުންވާ އެހީތެރިކަން ފޯރުކޮށްދޭކަމަށް މިނިސްޓްރީން ވިދާޅުވެއެވެ.
ސަރުކާރުގެ އަމާޒަކީ ރާއްޖޭގެ އިޤްތިސާދުގައި ދަނޑުވެރިކަން ހިއްސާކުރާ މިންވަރު އިތުރުކުރުމެވެ. މި މަސައްކަތުގެ ދަށުން ދަނޑުވެރިކަން ކުރިއަރުވައި ފުޅާކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ.