އަންނަ އަހަރުގެ ޖަނަވަރީމަހު ރިޗަސް ކިއުކަމްބަރ ބާޒާރަށް ނެރުމަށް ތައްޔާރުވެފައިވާކަމަށް އެގްރޯ ނޭޝަނަލް ކޯޕަރޭޝަނުން ބުނެފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެގްރޯނެޓުން ވިދާޅުވީ، އަންނަ ޖެނުއަރީމަހުގެ ފުރަތަމަ ހަފުތާއިން ފެށިގެން ކޮންމެ ހަފުތާއަކު 2 ޓަނު ކިއުކަމްބަރ ބާޒާރަށް ނެރެވޭނެކަމަށެވެ. މިދަނޑުތައް ހައްދާފައި ވަނީ އެގްރޯނެޓްގެ ސީދާ ބެލުމުގެ ދަށުން ލ. ގާދޫގައެވެ. އެގޮތުން އެރަށުގައި 21،000 އަކަފޫޓުގެ 10 ދަނޑުގައި ރިޗަސް ކިޔުކަންބާ ހައްދަމުންދާކަމަށް އެގްރޯނެޓުން ވިދާޅުވެއެވެ.
އެގްރޯނެޓުން ވިދާޅުވީ، މިއީ ރާއްޖޭގެ ރިސޯޓްތަކާއި، އެހެނިހެން ފަރާތްތަކަށްވެސް ގިނަ ޢަދަދަކަށް ބޭނުންވާ ބާވަތެއްކަމަށް ފާހަގަވެފައިވާކަމަށެވެ. އެހެންކަމުން މިއީ ޚާއްޞަ ސަމާލުކަމެއް ދީގެން ރަނގަޅު ފެންވަރެއްގައި އުފައްދާ ޕްރޮޑަކްޓެއްކަމަށެވެ.
އަންނަ ޖެނުއަރީމަހު ބާޒާރަށް ނެރުމަށް ހަމަޖެހިފައިވާ މިބާވަތް ހޯލްސޭލްކޮށް ގަންނަން ބޭނުންފުޅުވާ ފަރާތްތަކުން މިހާރުން ފެށިގެންވެސް ޕްރީއޯޑަރކުރުމުގެ ފުރުޞަތު އެގްރޯނެޓުން ވަނީ ހުޅުވާލާފައެވެ.
އާންމު ގޮތެއްގައި ބޭނުންކުރާ ކިޔުކަންބާއާއި ހިލާފަށް ރިޗަސް ކިޔުކަންބާއަކީ މޮޅު އަދި އަގުބޮޑު ކިޔުކަންބާއެކެވެ. މި ބާވަތުގެ ކިޔުކަންބާ ރާއްޖޭގެ ރިސޯޓްތަކުގައިވެސް ގިނަ އަދަދަކަށް ބޭނުންކުރެއެވެ. އަދި މަދުން ނަމަވެސް ސްޕަމާރކެޓްތަކުގައިވެސް ހުރެއެވެ.
އެގްރޯނެޓަކީ ރާއްޖޭގެ ދަނޑުވެރިކަން ކުރިއެރުވުމަށް ރައީސް ސާލިހުގެ ސަރުކާރުން އުފައްދާފައިވާ ކުންފުންޏެވެ. މި ކުންފުނި އުފެއްދީ 2020 ވަނަ އަހަރުގެ އޭޕްރީލްމަހުގެ ތެރޭގައެވެ. އެގްރޯނެޓުން މިހާރުވެސް އަންނަނީ 250 އަށްވުރެ ގިނަ ދަނޑުވެރިންގެ ތަކެތި ގަންނަމުންނެވެ.