މިއަހަރު ރާއްޖެއަށް ޒިޔާރަތްކުރާ 1.6 މިލިއަން ވަނަ ފަތުރުވެރިޔާ މާދަމާ ރާއްޖެ އަންނާނެކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން އެމްއެމްޕީއާރުސީން ބުނެފިއެވެ.
1.6 މިލިއަން ފަތުރުވެރިޔާ ރާއްޖެ އައުމުން މިއަހަރު ރާއްޖެ ގެނައުމަށް ސަރުކާރުން އަމާޒު ކަނޑައެޅި އަދަދު ހާސިލްވާނެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެމްއެމްޕީއާރުސީން މެނޭޖިންގ ޑިރެކްޓަރ ތޮއްޔިބު މުހައްމަދު ވިދާޅުވީ، މިއަހަރު ރާއްޖެއަށް އަންނަ ފަތުރުވެރިޔާ ރާއްޖެ އަންނާނެކަމަށް ބެލެވެނީ މާދަމާ މެންދުރު ނުވަތަ މެންދުރު ފަހުގެ ވަގުތެއްގައިކަމަށެވެ. އަދި އެ ފަތުރުވެރިޔާއަށް މަރުހަބާ ކިޔުމަށް އެމްއެމްޕީއާރުސީއާއި މި ސިނާއަތުގައި މަސައްކަތްކުރާ ފަރާތްތަކުން ދަނީ ތައްޔާރީތައްވަމުންކަމަށް އޭނާ ވިދާޅުވިއެވެ. އެގޮތުން ދިވެހި ސަޤާފީ ބޮޑުބެރުގެ ހަރަކާތްތަކާއިއެކު ފަތުރުވެރިޔާއަށް މަރުހަބާ ކިޔުމުގެ ކަންކަން ކުރުމުގެ އިންތިޒާމްތައް ހަމަޖައްސަމުން ގެންދާކަމަށް ތައްޔިބު ވިދާޅުވިއެވެ.
"މިހާރު ހުރިހާ ޑެސްޓިނޭޝަންތަކެއް ހުޅުވިގެން އޮތް އަހަރެއްގައި ޑިސެމްބަރމަހުގެ މެދެއްހާ ހިސާބެއްގައި މިހާރަނގަޅު ކާމިޔާބީއެއް ލިބުމުން. ފުދޭވަރެއްގެ ރަނގަޅު ކާމިޔާބީއެއްކަމަށް ދެކެނީ" ތައްޔިބު ވިދާޅުވިއެވެ.
ތައްޔިބު ވިދާޅުވީ، ދުނިޔޭގެ އެކި ކަންކޮޅުތަކުގައި ރާއްޖެ އިޝްތިހާރުކުރުމަށް އެމްއެމްޕީއާރުސީއާއި އަދި ފަތުރުވެރިކަމުގެ ސިނާއަތުގައި ހަރަކާތްތެެރިވެފައިވާ ފަރާތްތަކުން ގިނަ މަސައްކަތްތަކެއް ކޮށްފައިވާކަމަށެވެ. އަދި މިއީ އޭގެ ނަތީޖާކަން އޭނާ ފާހަގަކުރެއްވިއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން އިއްޔެގެ ނިޔަލަށް ރާއްޖެއަށް 1،590،379 ފަތުރުވެރިން ވަނީ ޒިޔާރަތްކޮށްފައެވެ. އެހެންކަމުން 1.6 މިލިއަން ފަތުރުވެރިންގެ އަމާޒަށް ވާސިލްވުމަށް ދެން ބޭނުންވަނީ 9621 ފަތުރުވެރިންނެވެ.
އެމްއެމްޕީއާރުސީއާއި މި ސިނާއަތުގައި މަސައްކަތްކުރި ފަރާތްތަކުގެ މަސައްކަތުން ރާއްޖެއަށް ވަނީ ކޯވިޑްގެ އެންމެ ދަތި އުނދަގޫ ހާލަތުގައި ވިދިވިދިގެން 3 އަހަރު "ވޯލްޑްސް ލީޑިންގ ޑެސްޓިނޭޝަން" ގެ އެވޯޑް ހާސިލްކޮށްފައެވެ.
އެމްއެމްޕީއާރުސީން ވަނީ ދުނިޔޭގެ އެކި ކަންކޮޅުތަކުގައި ރާއްޖެ އިޝްތިހާރުކުރުމަށް މިއަހަރު 24 މާކެޓެއްގައި 150 އަށްވުރެ ގިނަ ހަރަކާތް ހިންގާފައެވެ.