އިޓަލީގެ ޤައުމީ އެއަރލައިންގެ ދަތުރުތައް ރާއްޖެއަށް

އިޓަލީގެ ޤައުމީ އެއަރލައިން އިޓަލިއާ ޓްރާންސްޕޯޓޯ އެއިރޯ އެއަރވޭސް (އައިޓީއޭ އެއަރވޭސް)ގެ ދަތުރުތައް ރާއްޖެއަށް ފަށައިފިއެވެ.

މި އެއަރލައިންގެ ދަތުރުތައް ރާއްޖެއަށް ފަށާފައިވަނީ މިއަދުއެވެ.

އައިޓީއޭ އެއަރވޭސްގެ ދަތުރުތައް ރާއްޖެއަށް ކުރަނީ އިޓަލީގެ ރޯމްއިން ވެލާނާ އިންޓަނޭޝަނަލް އެއަރޕޯޓަށެވެ. އިޓަލީގެ ޤައުމީ އެއަރލައިނުން ރާއްޖެއަށް ދަތުރުތައް ފަށާފައިވަނީ ފިނި މޫސުމާއި ދިމާކޮށެވެ. މި އެއަރލައިނުން ހަފްތާއަކު 2 ދަތުރު ރާއްޖެއަށް ކުރާނެއެވެ.

އެ އެއަރލައިންގެ ފުރަތަމަ ފްލައިޓް ވީއައިއޭގައި ޖެއްސީ މިއަދު 11:21 ގައެވެ. މި ފުލައިޓަށް މަރުހަބާ ކިޔުމުގެ ގޮތުން ވޯޓާރސެލިއުޓެއް ވަނީ އަރުވާފައެވެ. މި ޕްލައިޓްގައި ރާއްޖެއަށް 300 މީހުން ވަނީ އައިސްފައެވެ.

އައިޓީއޭ އެއަރވޭސްއިން މިހާރުވެސް އަންނަނީ ދުނިޔޭގެ 6 ސަރަހައްދަކުން 21 ޤައުމަކަށް ދަތުރުކުރަމުންނެވެ. އިޓަލީއަކީ ރާއްޖެއަށް ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމެކެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން އިޓަލީއަކީ އަހަރުގެ މިހާތަނަށް ރާއްޖެއަށް 5 ވަނައަށް އެންމެ ގިނަ ފަތުރުވެރިން ޒިޔާރަތްކުރި ޤައުމެވެ. އަހަރުގެ މިހާތަނަށް އެ ޤައުމުން ރާއްޖެއަށް 89،218 ފަތުރުވެރިން ވަނީ ޒިޔާރަތްކޮށްފައެވެ. މިއީ މި މުއްދަތުގައި ރާއްޖެ އައި ފަތުރުވެރިންގެ %5.6 އެވެ.