ދިޔަނެރު ކޮންސެޕްޓް ނިމިފައި، މިތަނާއެކު ސަފާރީތަކުގެ ކަންބޮޑުވުމަށް ހައްލު ލިބޭނެ: މަޢުޞޫމް

ދިޔަނެރު ފަޅުގައި ސަފާރީތަކަށް އަޅާ ބަނދަރު ނިމުމުން ސަފާރީތަކަށް މިހާރު ދިމާވެފައިވާ ދަތިތަކަށް ހައްލު އަންނާނެކަމަށް ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމް ވިދާޅުވެއްޖެއެވެ. މިނިސްޓަރ މިހެން ވިދާޅުވީ، މިއަހަރުގެ މޯލްޑިވްސް ބޯޓިން އެވޯޑްސް ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

މޯލްޑިވްސް ބޯޓިންގ އެވޯޑަކީ، ފަތުރުވެރިކަމުގެ ސިނާއަތުގައި ހަރަކާތްތެރިވާ ސަފާރީތަކަށް މިދާއިރާގައި މަސައްކަތްކުރާ ފަރާތްތަކުގެ އަގު ވަޒަންކުރުމުގެ ގޮތުން ކޮންމެ އަހަރަކުވެސް ދެމުންއަންނަ އެވޯޑެކެވެ.

މި ރަސްމިއްޔާތުގައި ވާހަކަފުޅުދައްކަވަމުން ޓޫރިޒަމް ޑރ. ޢަބްދުﷲ މަޢުޞޫމް ވަނީ ރާއްޖޭގެ ފަތުރުވެރިކަމުގައި ލިބެމުންދާ ކާމިޔާބީތަކުގައި ބޯޓިން ދާއިރާގެ ހިއްސާ ބޮޑުކަން ފާހަގަކުރައްވާފައެވެ. އެގޮތުން މިފަހުން ރާއްޖޭގެ ފަތުރުވެރިކަމުގައި ލިބުނު އެންމެ ބޮޑު 2 ކާމިޔާބީކަމުގައިވާ ވިދިވިދިގެ 3 އަހަރު ވޯލްޑްސް ލީޑިންގ ޑެސްޓިނޭޝަންގެ އެވޯޑް ހާސިލްކުރުމާއި، ކޯވިޑްގެ އެންމެ ދަތި އުނދަގޫ ހާލަތުގައި ފަތުރުވެރިކަން ކުރިއަރުވައި އެކަމުން އަރައިގަތުމުގައި ބޯޓިން ސިނާއަތުން ދީފައިވާ އެއްބާރުލުން ފާހަގަކޮށް ވަނީ ޝުކުރު އަދާކުރައްވާފައެވެ.

ޓޫރިޒަމް މިނިސްޓަރ ވިދާޅުވީ، ރާއްޖޭގައި މިއަދު މުޅި ޖުމްލަ 158 ސަފާރީ އެބައޮތްކަމަށެވެ. މިއީ މުޅި ޖުމްލަ 2918 އެނދެވެ. އެއީ ރާއްޖޭގެ ފަތުރުވެރިކަމުގެ އެނދުގެ ނިސްބަތައް ބަލާނަމަ %5 އެނދެވެ.

މިނިސްޓަރ ވިދާޅުވީ، ރާއްޖެއަކީ ކަނޑުގެ ސަރަހައްދު ބޮޑު ޤައުމަކަށްވާއިރު މިއަށްވުރެ ސަފާރީ އުޅަނދުތައް އިތުރުވާންޖެހޭކަމަށެވެ. މިކަމުގައި ދިމާވާ އެންމެ ބޮޑު އެއް ގޮންޖެހުމެއްގެ ގޮތުގައި ވެފައިވަނީ ރާއްޖޭގެ ސަފާރީތައް ތަރައްޤީވަމުން އައި ބާރުމިނުގައި މި ދާއިރާގެ އިންފްރާސްޓްރަކްޗަރ ތަރައްޤީނުވުންކަން މިނިސްޓަރ ފާހަގަކުރެއްވިއެވެ. އެހެންނަމަވެސް ސަރުކާރުން މިހާރު ތަރައްޤީކުރަމުން އަންނަ ދިޔަނެރު ބަނދަރު ނިމުމުން ސަފާރީތަކަށް މިހާރު ދިމާވެފައިވާ ދަތިތަކަށް ހައްލު ލިބިގެންދާނެކަމަށް މިނިސްޓަރ ވިދާޅުވިއެވެ.

"ސަފާރީ އުޅަނދުތައް ތަރައްޤީވި ވަރަށް އެއަށް ބޭނުންވާ އިންފްރާސްޓްރަކްޗަރ މުޅިން ތަރައްޤީކުރެވިފައެއް ނެތް. އެހެންނަމަވެސް އިނގިވަޑައިގަންނަވާނެ ބޯޓިން އެސޯސިއޭޝަންއާއި ސަރުކާރާއި ކުރެވެމުންދާ މަޝްވަރާގެ ތެރެއިން ޚާއްސަކޮށް ދިޔަނެރު 2 ގައި ހަދާ ބޯޓުތަކަށް ބަނދަރު ކުރެވޭގޮތައް އަދި ސަރވިސް ސެންޓަރާއި އެކު ހަދާ ތަނުގެ ވާހަކަ ދެކެވި އެއާއިބެހޭގޮތުން އަޅުގަނޑު ހިތުން މިހާރު އެ ނިމިފައިއޮތް ކޮންސެޕްޓް ނިންމާލެވުނީމަ އެންމެ މުހިންމު ކަމަށް ހައްލެއް ލިބޭނެ. އަޅުގަނޑުމެން ޓޫރިޒަމް ކުރިއަށްގެންދާއިރު ރައީސް ސާލިޙްގެ ޓޫރިޒަމް ސިޔާސަތު މިއޮތީ މުޅި ރާއްޖެއަށް ރައްޔިތުންނާއި ހަމައަށް އޭގެ ފައިދާ ގެންދާގޮތައް. އެހެންވީމަ މުޅި ރާއްޖެއަށް އެބަ ޓޫރިޒަމް ފުޅާވޭ" މިނިސްޓަރ ވިދާޅުވިއެވެ.

ސަފާރީތަކާ ޔޮޓްތައް އިތުރުވެ، މި ވިޔަފާރިން އާމްދަނީ ހޯދާ މީހުން ވަނީ އިތުރުވެފައެވެ. ނަމަވެސް މި ވިޔަފާރި ކުރާ ފަރާތްތަކުގެ އެންމެ ބޮޑު ޝަކުވާއަކަށްވެފައި އަބަދުވެސް އޮތީ، އެ އުޅަނދުތަކަށް ބޭނުންވާ އެކަށީގެންވާ ޚިދުމަތް ނުލިބުމެވެ. މި ޝަކުވާތަކަށް ޙައްލު ހޯއްދަވައި ދެއްވުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވަނީ، ބޯޓުފަހަރު އެޅުމަށް ދިޔަނެރު ފަޅު ކައިރިން ތަނެއް ތަރައްޤީކުރައްވާނެކަން އިޢުލާންކުރައްވާފައެވެ.

މި ފަޅު ތަރައްޤީ ކުރާނީ، މިފަދަ ތަނަކުން ލިބޭނެ ފުރިހަމަ ޚިދުމަތާއެކުކަމަށެވެ. އެގޮތުން އުޅަނދު އަޅާފައި ބޭއްވުމާއި، ތެޔޮ އެޅުމާއި، އުޅަނދު އަޅާފައި އޮންނައިރު ކަރަންޓުގެ ޚިދުމަތާއި، ފެން ލިބޭނެ އިންތިޒާމާއި، ނަރުދަމާއާއި ގުޅުންހުރި ޚިދުމަތް އަދި އުޅަނދުފަހަރުން ފަސޭހައިން ކުނި މެނޭޖްކުރެވޭނެ ނިޒާމެއްވެސް ޤާއިމުކުރާނެއެވެ.

މިއީ މިގޮތަށް ރާއްޖޭގައި ތަރައްޤީކުރާ ފުރަތަމަ ބަނދަރަށް ވާނެއެވެ. ސަރުކާރުން އާމާޒު ހިފާފައިވަނީ އަންނަ އަހަރުގެ މެދުތެރެއަށް މި މަސައްކަތް ނިންމާ، ފަޅުގެ ބޭނުން ކުރެވޭނެ އިންތިޒާމް ހަމަޖެއްސުމަށެވެ.