ކޮޕް 21 ގެ ސަމިޓްގައި އެކުލަވާލެވި އެއްބަސްވެވުނު މޫސުމަށް އަންނަ ބަދަލުތަކާބެހޭ ބައިނަލްއަޤްވާމީ އެގްރީމެންޓް، "ޕެރިސް އެގްރީމަންޓް" ފީޖީން ރަސްމީކޮށް ބަލައިގަނެ ތަސްދީޤުކޮށްފިއެވެ. މިއީ މި އެގްރީމެންޓް ތަސްދީޤް ކުރި ފުރަތަމަ ޤައުމެވެ.މިކަމަށް މަރްޙަބާ ވިދާޅުވެ، އެލަޔަންސް އޮފް ސްމޯލް އައިލެންޑް ސްޓޭޓްސް ނުވަތަ އެއޯސިސް ގެ ޗެއާގެ ހައިސިއްޔަތުން އެންވަޔަރަމަންޓް މިނިސްޓަރ ޠާރިޤް އިބްރާހީމް ފޮނުއްވި ސިޓީގައި މޫސުމަށް އަންނަ ބަދަލުތަކަށް ފީޖީގެ ސަރުކާރުން ދެއްވާ އަހަމިއްޔަތު ފާހަގަކުރައްވާ ކަމަށާއި އަދި ޕެރިސް އެގްރީމަންޓް ރަސްމީކޮށް ބަލައިގަނެ ތަސްދީޤުކުރި އެންމެ ފުރަތަމަ ޤައުމަކަށް ކުދި ޖަޒީރާ ޤައުމެއް ވެގެންދިއުމަކީ މޫސުމަށް އަންނަ ބަދަލުތަކަށް އަވަސް ހައްލެއް ހޯދުމަށް ކުދި ޖަޒީރާ ޤައުމުތަކުން އިސްކަންދޭކަމުގެ އަލިގަދަ ހެއްކެއްކަމަށާއި އަދި ފީޖީ އިން ދެއްކެވި ނަމޫނާއަށް ތައުރީފް ހައްޤުވާކަމަށް ވިދާޅުވެފައިވެއެވެ.ފީޖީން މި އެގްރީމަންޓް ރަސްމީކޮށް ބަލައިގަނެ ތަސްދީޤުކުރިއިރު، އެލަޔަންސް އޮފް ސްމޯލް އައިލެންޑް ސްޓޭޓްސް ގެ ހުރިހާ ޤައުމުތަކުން މި އެގްރީމެންޓް ތަސްދީޤުކޮށް ބަލައިގަތުން އަވަސްކޮށްދިނުމަށް އެދި މިދިޔަމަހު ތާރިޤް އިބްރާހިމް ވަނީ ސިޓީ ފޮނުއްވާފައެވެ. އެ ސިޓީގައި ދިވެހި ރާއްޖެއިން އެ.އޯ.ސި.ސްގެ ރިޔާސަތު ބެލެހެއްޓުމުގައި އެ ޤައުމުތަކުން ވެދެއްވަމުން ގެންދަވާ އެހީތެރިކަމާއި އެއްބާރުލުމަށް ޝުކުރު އަދާކުރައްވާފައިވެއެވެ.އަންނަ އޭޕްރިލް މަހު ނިއުޔޯކުގައި ބޭއްވުމަށް ހަމަޖެހިފައިވާ ބައްދަލުވުމެއްގައި، ޔޫ.އެން.އެފް.ސީ.ސީ.ސީ. ގައި ބައިވެރިވާ ހުރިހާ ޤައުމުތަކުން މިއެއްބަސް ވުމުގައި ސޮއިކުރުމަށް ވަނީ ހަމަޖެހިފައެވެ. އަދި ދިވެހި ރާއްޖެއިންވެސް މިއެއްބަސްވުން ބަލައިގަނެ ތަސްދީޤުކުރުމަށް ބޭނުންވާ އިޖުރާޢަތުތައް މިހާރު ދަނީ ފުރިހަމަ ކުރަމުންނެވެ.ޕެރިސް އެގްރީމަންޓަށް ޢަމަލީ ސިފަ އަންނާނީ، މި އެއްބަސްވުމުގައި ބައިވެރިވާ ޔޫ.އެން.އެފް.ސީ.ސީ.ސީ.ގެ ބައިވެރިންގެ ތެރެއިން މަދުވެގެން 55 ބައިވެރިން ތަސްދީޤުކުރުމާއެކު، މުޅިދުނިޔެއިން ބޭރުކުރާ ގްރީންހައުސް ގޭހުގެ 55 އިންސައްތަ ޙިއްސާ ކުރާމިންވަރަށް ބައިވެރިން ހިމެނިގެންނެވެ.