ރ. އަނގޮޅިތީމު މެޖިސްޓްރޭޓް ކޯޓުގެ އައު އިމާރާތް، އުއްތަމަ ފަނޑިޔާރު އޮނަރަބަލް އަލްއުސްތާޛު އަޙްމަދު މުޢުތަޞިމް ޢަދުނާން މިއަދު ހުޅުވައިދެއްވައިފިއެވެ. އައު ކޯޓް ޢިމާރާތް ހުޅުއްވައިދެއްވީ އެކަމަށްތަކައި އަނގޮޅިތީމުގައި މިއަދު ބޭއްވި ރަސްމިއްޔާތެއްގައެވެ.
މެޖިސްޓްރޭޓް ކޯޓު ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އުއްތަމަ ފަނޑިޔާރު އަލްއުސްތާޛް އަޙްމަދު މުޢުތަސިމް އަދުނާން ދެއްކެވި ވާހަކަފުޅުގައި ކޯޓުން ޢާންމު ރައްޔިތުންނަށް ފޯރުކޮށްދޭ ޚިދުމަތްތައް ފޯރުކޮށްދިނުމުގައި ޢާންމު ރައްޔިތުންނަށް ފަސޭހަވާނެ ގޮތަށް އިންތިޒާމްތައް ހަމަޖެއްސުމުގެ މުހިންމުކަން ފާހަގަކުރެއްވިއެވެ. ޚާއްޞަކޮށް، ކުޑަކުދިން ކޯޓަށް ހާޒިރުކުރަންޖެހޭ ފަދަ މައްސަލަތަކުގައި އެކުދިން ކޯޓަށް ހާޒިރުނުކޮށް ޝަރީޢަތްކުރެވޭނެ ގޮތްތައް އިޙްތިޔާރުކުރުމުގެ މުހިންމުކަމަށް އަލިއަޅުއްވައިލައްވައި، އުއްތަމަ ފަނޑިޔާރު ވަނީ އެކުދިން ކޯޓަށް ހާޒިރުކުރަންޖެހޭ މައްސަލަ ތަކުގައިވެސް ފުރިހަމަކުރަންޖެހޭ އިޖުރާއަތުތަކާ އެއްގޮތަށް ކަންކަން ފުރިހަމަކުރުމުގެ މުހިންމުކަން ފާހަގަކުރައްވާފައެވެ.
އުއްތަމަ ފަނޑިޔާރު އަނގޮޅިތީމަށް ކުރެއްވި މިދަތުރުގައި އެމަނިކުފާނުގެ އަރިހުގައި ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރު އަދި ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒްނާ ބައިވެރިވެވަޑައިގެންނެވިއެވެ. މިގޮތުން ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒްނާ މި ރަސްމިއްޔާތުގައި ދެއްކެވި ވާހަކަފުޅުގައި، އަލަށް ހުޅުވުނު ކޯޓު އިމާރާތުގައި މަސައްކަތްކުރަން ފެށުމާއެކު، ކޯޓުން ޢާންމުންނަށް ފޯރުކޮށްދޭ ޚިދުމަތްތަކުގެ ފެންވަރު ރަނގަޅުވެ، އަދުލު އިންސާފަށް ފަސޭހައިން ވާސިލްވެވޭނެ މަގު ތަނަވަސް ކުރުމަށް ކުރަމުން ގެންދާ މަސައްކަތް އިތުރަށް ހަލުވިވެގެން ދާނެކަމަށް ވިދާޅުވިއެވެ.
ނގޮޅިތީމު މެޖިސްޓްރޭޓް ކޯޓުގެ އާ އިމާރާތަކީ، 2021 ވަނަ އަހަރުގެ އޮކްޓޯބަރު މަހުގެ ތެރޭގައި ރ. އަނގޮޅިތީމު ކައުންސިލާ ޙަވާލުކުރެވިގެން ކުރެއްގެންދިޔަ މަސައްކަތެކެވެ. އަދި ޢިމާރާތް ކުރުމުގެ ޢަމަލީ މަސައްކަތް މި އަހަރުގެ މާރިޗު މަހުގެ ތެރޭގައި ފެށި، މި މަސައްކަތް ޙަވާލުކުރެވުނުތާ 8 މަސް ދުވަހުގެ ތެރޭގައި ވަނީ ކޯޓު ޢިމާރާތްކޮށް ނިމިފައިވެއެވެ.
އަނގޮޅިތީމު މެޖިސްޓްރޭޓް ކޯޓު މީގެ ކުރިން ހިންގަމުން އައިސްފައިވަނީ 2ކޮޓަރީގެ ޖާގައިގެ ޢިމާރާތެއްގެ ތެރޭގައެވެ. އެގޮތުން ޝަރީޢަތްތައް ހިންގުމާއި، އިދާރީ މަސައްކަތްތަކާއި، ކޯޓުގެ އިދާރީ ހިންގުމާގުޅޭ އެންމެހައި ކަންކަން ހިންގައި ބަލަހައްޓަމުން ގެންދިޔައީ ވަރަށް ދަތިކޮށެވެ. އެހެންނަމަވެސް، މިއަދު ރަސްމީކޮށް ބޭނުންކުރަން މިފެށުނު ރ. އަނގޮޅިތީމު މެޖިސްޓްރޭޓް ކޯޓުގެ އައު އިމާރާތް ފަރުމާކުރެވިފައިވަނީ، ޝަރީޢަތްކުރާނެ ވަކި މާލަމަކާއި، މެޖިސްޓްރޭޓުންނާއި މުވައްޒަފުން މަސައްކަތްކުރުމަށް ވަކިން ޚާއްޞަކުރެވިފައިވާ ބައިތައް ހިމެނޭގޮތަށް، ޢާންމުންނަށް ޚިދުމަތް ފޯރުކޮށް ދިނުމަށްވެސް ފަސޭހަވާނެ ގޮތަށެވެ.
އުއްތަމަ ފަނޑިޔާރު ރ. އަތޮޅަށް ކުރެއްވި މި ދަތުރުފުޅުގައި ވަނީ ރ. އަނގޮޅިތީމު އަދި ރ. ވާދޫ މެޖިސްޓްރޭޓް ކޯޓުގެ އިމާރާތުގައި އަލަށް ބެހެއްޓުނު ދިދަ ދަނޑީގައި ފުރަތަމަ ފަހަރަށް ޝަރުޢީ ދާއިރާގެ ދިދަ ނަންގަވައިދެއްވާފައެވެ. އަދި ރ. ވާދޫ މެޖިސްޓްރޭޓް ކޯޓު، ރ. ރަސްގެތީމު މެޖިސްޓްރޭޓް ކޯޓު އަދި ރ. އަނގޮޅިތީމު މެޖިސްޓްރޭޓް ކޯޓުގެ މުވައްޒަފުންނާ ބައްދަލުކުރައްވާފައިވެއެވެ. މި ބައްދަލުވުންތަކުގައި ކޯޓުގެ މަސައްކަތްތަކުގައި ދިމާވާ ދަތިތަކާ ގުޅޭ ގޮތުން މެޖިސްޓްރޭޓުންނާއި މުވައްޒަފުންނާ ވާހަކަދައްކަވާފައިވެއެވެ.