ށ. ނުމާރާގައި 4 އަހަރުގެ ކުއްޖަކު މަރުވެފައިއޮއްވާ ފެނުނު މައްސަލާގައި ހައްޔަރުކޮށްފައިވާ އަންހެން މީހާގެ ބަންދަށް ފަނަރަދުވަސް ކޯޓުން އިތުރުކޮށްދެއްވައިފިއެވެ.މި ކުއްޖާގެ މަރާ ގުޅިގެން ހައްޔަރުކުރައްވާފައިވަނީ އެ ކުއްޖާގެ މަންމައެވެ.ފުލުހުން ވިދާޅުވީ މި މައްސަލަ ތަޙްޤީޤްކުރުމަށް ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުގެ ޚާއްޞަ ޓީމެއް އެރަށުގައި ޙަރަކާތްތެރިވެޑައިގަންވަމުން އަންނަކަމަށެވެ. ޢުމުރުން 4 އަހަރުގެ ފާޠިމަތު ޝައިހާ މަރުވެފައި އޮއްވައި ފެނުނީ އިއްޔެ ރޭ ފަތިހު 5:40 އެހާއިރުކަމަށް ނޫމަރާ ކައުންސިލުން ވިދާޅުވެއެވެ. އަދި ކުއްޖާގެ އަތާއި، ކޮނޑުހުޅަށް ތޫނު އެއްޗަކުން ޙަމަލާދީފައިވާކަމުގެ ނިޝާންތަކެއް ފެންނަހުރިކަމަށްވެސް އެރަށު ކައުންސިލުން ވިދާޅުވެފައިވެއެވެ.މި ކުއްޖާގެ މަރުގެ މައްސަލަ އިތުރަށް ބައްލަވަންޖެހޭ ކަންކަން ބެއްލެވުމަށް އެ ކުއްޖާގެ ހަށިގަނޑު ރޭ ވަނީ ހދ.ކުޅުދުށްފުޓަށް ގެންދަވާފައެވެ. އަދި ބައްލަވަންޖެހޭ ބެލުންތައް ބެއްލެވުމަށްފަހު ރޭ މަޣްރިބް ނަމާދަށްފަހު އެކުއްޖާގެ ހަށިގަނޑު ވަޅުލާފައިވާކަމަށް ފުލުހުން ވިދާޅުވެއެވެ.ހަތަރު އަހަރުގެ މި ތުއްތު ކުއްޖާގެ މަރާ ގުޅިގެން ހދ.އަތޮޅު ޖެންޑަރ ޔުނިޓުން ނޫމަރާގައި ދަނީ ޙަރަކާތްތެރިވެޑައިގަންނަވަމުންނެވެ. ޖެންޑަރ މިނިސްޓްރީން ވިދާޅުވީ އެމައްސަލަ ގާތުން ބައްލަވަމުން ގެންދަވާކަމަށެވެ.