ރާއްޖޭގެ ފަތުރުވެރި ކަމުގެ ސިނާޢަތަކީ މުޅި އޭޝިޔާ ބައްރުގައިވެސް އިންވެސްޓަރުންނަށް އެންމެ އަވަހަށް ފައިދާނެރެވޭ ސިނާޢަތް ކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.މިނިސްޓަރ ސަޢީދު މިހެން ވިދާޅުވީ އެލައިޑު އިންޝުއަރެންސް ކުންފުނީގެ 31 ވަނަ އަހަރީދުވަސް ފާހަގަކުރުމަށް ރޭ ދަރުބާރުގޭގައި ބޭއްވި ހަފްލާގައި ވާހަކަފުޅު ދައްކަވަމުންނެވެ.އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ ޤައުމުތަކުގެ ހަމަޖެހުމާއި އިޤްތިޞާދަށް ބަލާއިރު އޭޝިޔާ ބައްރަކީ އެއްވަރެއްގެ ޤައުމުތަކެއް ހިމެނޭ ބައްރެއް ކަމަށެވެ. އެހެންނަމަވެސް އޭޝިޔާ ބައްރުގައި، އިންވެސްޓަރުންނަށް އެންމެ ރައްކާތެރި ޤައުމެއްގެ ގޮތުގައި ސިންގަޕޫރު މަޝްހޫރުވެފައި ވާކަމަށް ސައީދު ވިދާޅުވިއެވެ. މިކަން މިހެން އޮތް ނަމަވެސް ރާއްޖެގެ ފަތުރުވެރި ކަމަކީ އެކަމަށް އިންވެސްޓްކުރާ ފަރާތްތަކަށް އެންމެ ކުޑަ މުއްދަތެއްގެ ތެރޭ ފައިދާ ނެރެވޭ ވިޔަފާރިކަން އިންވެސްޓަރުން މިހާރު ޤަބޫލުކުރާކަމަށް މިނިސްޓަރ ވިދާޅުވިއެވެ.އެލައިޑުގެ 31 އަހަރުގެ ޚިދުމަތަށް އަލިއަޅުއްވާލައްވާ މިނިސްޓަރ ވިދާޅުވީ، ދިވެހިންގެ ކަންކަން ދިވެހިންނަށް އަމިއްލައަށް ހައްލުކުރެވޭނެ ކަމުގެ ފުރިހަމަ މިސާލެއް އެލައިޑުން ދައްކަމުން ގެންދާކަމަށެވެ. އެގޮތުން 100 އިންސައްތަ ދިވެހި ކުންފުންޏެއްގެ ގޮތުގައި އިންޝުއަރެންސްގެ ދާއިރާއިން ބައިނަލްއަޤްވާމީ ފެންވަރުގައި އެލައިޑުން މިހާރު މަސައްކަތް ކުރަމުންގެންދާ ކަން މިނިސްޓަރ ފާހަގަ ކުރެއްވިއެވެ.އެލައިޑް އިންޝުއަރެންސް ކުންފުންޏަކީ 1985 ވަނަ އަހަރު ސްޓޭޓް ޓްރޭޑިންގ އޮގަނައިޒޭޝަން އެސް.ޓީ.އޯ އާއި، އިނގިރޭސި ވިލާތުގެ ކޮމާޝަލް ޔޫނިއަން އެޝުއަރެންސް ކޮމްޕެނީ ގުޅިގެން އުފެއްދި ޖޮއިންޓް ވެންޗަރ ކުންފުންޏެކެވެ. ނަމަވެސް 1987 ވަނަ އަހަރު އެސްޓީއޯއިންވަނީ އެ ކުންފުނީގެ ހިއްސާ އެއްކޮށް ގަނެ 100 އިންސައްތަ ދިވެހި ކުންފުންޏެއްގެ ގޮތުގައި ހަދާފައެވެ. އަދި އެ ކުންފުނިން ރާއްޖެއަށް ގިނަ ޚިދުމަތްތަކެއް ތަޢާރަފް ކުރަމުންދާކަން ފާހަގަކޮށްލެވެއެވެ.