ށ. ނޫމަރާގައި ޒަޚަމްތަކަކާއެކު ކުޑައަންހެން ކުއްޖަކު މަރުވެފައި އޮއްވާ ފެނުނު މައްސަލައިގެ ތަހްޤީޤަށް 29 އަހަރުގެ އަންހެނަކު ހައްޔަރުކޮށްފައިވާކަމަށް ފުލުހުން ވިދާޅުވެއްޖެއެވެ.ނޫމަރާގެ ގެއެއްގެ ތެރޭގައި ކުޑަ ކުއްޖަކު މަރުވެފައި އޮއްވާ ފެނިފައިވަނީ ރޭ ފަތިހު 5:30 އެހާއިރުކަމަށް ނޫމަރާ ކައުންސިލުން މަޢުލޫމާތުދެއެވެ. މަރުވެފައި އޮއްވާ ފެނިފައިވަނީ ޢުމުރުން 5 އަހަރުގެ އަންހެން ކުއްޖެއްކަމަށްވެސް ކައުންސިލުން މަޢުލޫމާތުދެއެވެ. އެކުއްޖާގެ އަތާއި، ކޮނޑުހުޅު ފަދަ ތަންތަނަށް ތޫނު އެއްޗަކުން ޙަމަލާދީފައިވާކަމުގެ ނިޝާންތަކެއް ފެންނަހުރި ކަމަށާއި، އެކަން އެންގުނު ހިސާބުން ފެށިގެން ފުލުހުންނަށް ރިޕޯޓުކުރައްވާފައިވާކަމަށް ކައުންސިލުން ވިދާޅުވެއެވެ. އަދި އެކުއްޖާ މަންމަ ނަފްސާނީ ކަމަކަށް ބޭސްފަރުވާ ލިބިގަންނަމުންދާ ކަމުގެ މަޢުލޫމާތު އެކައުންސިލަށް ލިބިވަޑައިގެންފައިވާ ކަމަށްވެސް އެކައުންސިލުން ވިދާޅުވެއެވެ.މިކަން ތަޙްޤީޤުކުރެއްވުމަށް ނޫމަރާގައި ފުލުހުންނާއި، ހދ. އަތޮޅު ޖެންޑަރ ޔުނިޓުން ޙަރަކާތްތެރިވެޑައިގަންނަވަމުން ގެންދަވާކަމަށާއި، ފުލުހުންގެ ސީރިއަސް އެންޑް ކްރައިމް އޮގަނައިޒްޑް ޑިޕާޓްމަންޓުގެ ޚާއްޞަ ޓީމެއް އެރަށަށް ދާން ތައްޔާރު ވަމުންދާކަމަށް ފުލުހުން މަޢުލޫމާތުދެއްވައެވެ.ޖެންޑަރ މިނިސްޓްރީން ވިދާޅުވީ އެމައްސަލަ ގާތުން ބައްލަވަމުން ގެންދަވާކަމަށާއި، މިއަދުގެ ވަގުތެއްގައި މިކަމާބެހޭ ބައެއް މައުލޫމާތު ޢާއްމު ކުރެއްވުމަށް މަސައްކަތް ކުރައްވަމުން ގެންދަވާކަމަށެވެ.