ވިލާތުގެ އިއްތިޙާދަކީ ރާއްޖެއަށް ވަރަށް މުހިއްމު އެކުވެރިއެއް ކަމަށާއި، ވިލާތުގެ އިއްތިޙާދާއެކު އޮތް ގުޅުން އިތުރަށް ބަދަހިކުރެއްވުމަށް ރާއްޖެއިން ތައްޔާރަށް އޮތްކަމަށް ޚާރިޖީ ވަޒީރު ދުންޔާ މައުމޫން ވިދާޅުވެއްޖެއެވެ.އެކަމަނާ މިހެން ވިދާޅުވީ މި މަހުގެ ހަތަކުން ނުވައަކަށް ރާއްޖެއަށް ޒިޔާރަތްކުރި ޔޫރަޕިއަން ޕާލިމެންޓުގެ ވަފްދުގެ ދަތުރާ ގުޅޭގޮތުން ދެއްވި ބަޔާނެއްގައެވެ.ދުންޔާ ވިދާޅުވީ، ރާއްޖޭގައި ޑިމޮކްރެސީ ވަރުގަދަކުރައްވައި ހަރުދަނާކުރެއްވުމަށް ކުރައްވާ މަސައްކަތްތަކުގައި ވިލާތުގެ އިއްތިޙާދުން ވަރަށް ބޮޑު އެހީތެރިކަމެއް ފޯރުކޮށްދެމުންދާ ކަމަށެވެ. އަދި، ދެ ފަރާތުންވެސް އިޙްތިރާމްކުރާ ގޮތަށް، ދެ ފަރާތުގެ ދެމެދުގައި އޮތް ގާތް ގުޅުން އިތުރަށް ވަރުގަދަކުރުމަށް މަސައްކަތް ކުރުމުގައި ރާއްޖެއިން ދެމި އޮންނާނެކަމަށް އެކަމަނާ ވިދާޅުވިއެވެ.ރާއްޖެއަކީ ޑިމޮކްރެސީގެ ޅަފަތުގައި އޮތް ޤައުމެއްކަން ފާހަގަކުރައްވައި ދުންޔާ ވިދާޅުވީ، ރާއްޖެއަށް ކުރިމަތިވަމުންދާ ގޮން ޖެހުންތަކާ ކުރިމަތިލައި، އެ ގޮންޖެހުންތަކުން އަރައިގަތުމަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރުގެ އަމާޒުކަމަށެވެ. އަދި، މިފަދަ އެތައް ގޮންޖެހުމެއް މިހާރު ޙައްލުކުރައްވާ ކަމަށްވެސް ދުންޔާ ވިދާޅުވިއެވެ.ޔޫރަޕިއަން ޕާލިމެންޓްގެ ވަފްދުގެ ޒިޔާރަތާބެހޭ ގޮތުން ދުންޔާ ވިދާޅުވީ، ވަފްދުގެ ބޭފުޅުން މަޢުލޫމާތު އޮޅުންފިލުއްވަން ބޭނުންފުޅުވި މައްސަލަތަކާ ބެހޭގޮތުން މަޢުލޫމާތު އެބޭފުޅުންނާއި ޙިއްޞާ ކުރެއްވިކަމަށާއި، ދިވެހި ސަރުކާރުން ވަފްދުގެ ބޭފުޅުންނަށް ފުރިހަމައަށް އެއްބާރުލުން ދެއްވާފައިވާކަމަށެވެ. އަދި، ވިލާތުގެ އިއްތިހާދާއެކު ގުޅިގެން މަސައްކަތް ކުރެއްވުމުގައި ރާއްޖެއިން ދެމިއޮންނާނެކަމުގެ ޔަޤީންކަންވެސް ދުންޔާގެ ބަޔާނުގައި ދެއްވާފައިވެއެވެ.