5 ސަރަހައްދެއްގައި އަޅާފައިވާ ކަނދުފަތިތައް ކަނޑައިގެން ގޮސްފައިވާތީ އެ ކަނދުފަތިތައް އަލުން ހަރުކޮށް ނިމިފައިވާކަމަށް މިނިސްޓްރީ އޮފް ފިޝަރީޒް މެރިން ރިސޯސް އެންޑް އެގްރިކަލްޗަރއިން ހާމަކުރައްވައިފިއެވެ.
ފިޝަރީޒް މިނިސްޓްރީން މިމަސައްކަތް ފަށާފައިވަނީ ސެޕްޓެމްބަރުމަހުގެ 20 ވަނަ ދުވަހުކަމަށް މިނިސްޓްރީން ވިދާޅުވެއެވެ.
މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ކަނޑައިގެންގޮސްފައިވާ މަސްކަނދުތައް އަލުން ހަރުކޮށްފައިވަނީ މ.ދިއްތުނޑީގެ އިރުދެކުނުން 16 މޭޅު ބޭރުގައާއި، ތ.ހިރިލަންދޫ ހުޅަނގު ދެކުނުން 15 މޭލު ބޭރުގައާއި، ގއ. މާމުޓާގެ އިރުން 12 މޭލު ބޭރުގައި އާއި ގދ. ފިޔޯރީގެ ދެކުނުން 12.5 މޭލު ބޭރުގައިކަމަށް ފިޝަރީޒް މިނިސްޓްރީއިން ވިދާޅުވެއެވެ.
ފިޝަރީޒް މިނިސްޓްރީން ވިދާޅުވީ މިހުރިހާ ސަރަހައްދެއްގައި އަޅާފައިވާ ކޮންމެ މަސްކަނދަކަށް ޚާއްސަ ނަންބަރެއްވެސް ދީފައިވާ ކަމަށެވެ. އަދި މިއީ މި ރާއްޖޭގެ ރައްތަކުގައި މަސްކަނދުފަތި އެޅުމަށް އެމިނިސްޓްރީން ކުރިއަށްގެންދާ މަސައްކަތުގެ ދަށުން މަސްކަނދުފަތިތައް އެޅި 6 ވަނަ ފަހަރުކަމަށްވެސް އެ މިނިސްޓްރީން ވިދާޅުވެއެވެ.
ފިޝަރީޒް މިނިސްޓްރީން އެކުލަވާލާފައިވާ ގަވާއިދުގައި ބަޔާންކޮށްފައިވާގޮތުން ރާއްޖޭގެ ކަނޑުތަކުގައި އަޅާފައިވާ ކަނދުފަތިތައް ހިމެނޭ ސަރަޙައްދުތަކުގެ 3 މޭލު ކައިރީގައި ދިރޭ އެންޖަހައި އަޑިއަށް ފެއްތުމާއި، މިޔަރު ނެގުމާއި، ލޭނު އެޅުމާއި، އެމުގެ ގޮތުގައި ތާވަޅަ ބޭނުންކުރުމަކީ ޤާނޫނީގޮތުން މަނާކަމެކެވެ. އަދި ކަނދުފަތީގެ ބޮލަށް ވައު އައްސައި އޭގައި ދޯނި ފަހަރު އަޅައިގެން ތިބުންފަދަ، އޮއިވާލި ކަނދުފަތީގެ މަސްވެރިކަމަށް ގެއްލުންވާ އެއްވެސް ޢަމަލެއް ކުރުމަކީވެސް މަނާކަމެކެވެ.
ރާއްޖޭގެ އެކި ސަރަޙައްދުތަކުގައި އަޅާފައިވާ ކަނދުފަތިތައް ކަނޑައިގެން ދިއުމަކީ ޢާއްމުކަމެކެވެ. ސަރުކާރުން މަސްވެރިންނަށް ޤާއިމުކޮށްދީފައިވާ ކަނދުފަތީގެ ވިޔުގާގައި ހިމެނޭ ބައެއް ކަނދުފަތި ކަނޑައިގެން ދާ އެއް ސަބަބަކީ އުޅަނދުފަހަރުގެ ވާ އެ ކަނދުފަތީގައި އައްސައި ބަނދެގެން ތިބުންކަން ފާހަގަކުރެވިފައިވާކަމަށް ފިޝަރީޒް މިނިސްޓްރީން ވިދާޅުވެއެވެ. އެހެންކަމުން މިފަދަ ޢަމަލުތައް ނުކުރުމަށް އެމިނިސްޓްރީން އިލްތިމާސްކުރައްވައެވެ. އަދި މިފަދަ ޢަމަލެއް ކުރާ އުޅަނދެއް ފާހަގަކުރެވިއްޖެނަމަ އެކަން މިނިސްޓްރީއަށް ރިޕޯޓުކުރުމަށްވެސް ފިޝަރީޒް މިނިސްޓްރީއިން އިލްތިމާސްކުރައްވައެވެ.
ކަނދުފައްޗަކީ، ރާއްޖޭގައި މަސްވެރިކަމުގެ ޚަރަދު ކުޑަކުރުމުގެ ގޮތުން އަޅަމުން އަންނަ އެއްޗެކެވެ. އެގޮތުން މަސްވެރިކަމުގެ ޚަރަދުތައް ކުޑަކުރުމަށް މަސްކަނދު ވިއުގަ އިތުރަށް ފުޅާ ކުރުމަކީ ސަރުކާރުގެ އަމާޒެކެވެ.