ރަށްރަށުގައި އެއަރޕޯޓްތައް ތަރައްޤީކުރުމާއިއެކު އެ ރަށްރަށުގެ ވިޔަފާރިއާއި އިޤްތިޞާދަށް ދަނީ ބޮޑެތި މަންފާތަކެއް ކުރަމުންނެވެ. އެގޮތުން ހއ. ހޯރަފުށީންވެސް ފެންނަމުންދަނީ މި މަންޒަރެވެ. އެއަރޕޯޓާއިއެކު އެރަށުގެ އިޤްތިޞާދަށްވެސް ވަނީ ކުރިއެރުން ލިބެންފަށާފައެވެ.
ހއ.ހޯރަފުއްޓަކީ ރާއްޖޭގެ އެންމެ އުތުރުން ވައިގެ ދަތުރުފަތުރުގެ ޚިދުމަތް ލިބޭ ރަށެވެ. އެތެރޭގެ އުދުހުންތަކަށް ޚާއްސަ މި އެއަރޕޯޓްގެ ޚިދުމަތް ފެށީ 2020ވަނަ އަހަރުގެ ނޮވެމްބަރު މަހުގެ 19ވަނަ ދުވަހުއެވެ. މި އެއަރޕޯޓަކީ ރާއްޖޭގެ އެންމެ އުތުރުން، އިހަވަންދިއްޕޮޅުގެ ރައްޔިތުންނަށް ދަތުރުފަތުރުގެ ނިޒާމުން ލިބުނު ބޮޑު ކުރިއެރުމެކެވެ.
ހޯރަފުށީ އެއަރޕޯޓަކީ މި ސަރުކާރުން މަސައްކަތް ފަށައި ނިންމި އެއަރޕޯޓެކެވެ. މިއަދުވެސް އެ ސަރަހައްދުގެ ރައްޔިތުން ރައީސް އިބްރާހިމް މުހައްމަދު ސާލިހް އެ ސަރަހައްދަށް ގެނެސްދެއްވި މި އެއަރޕޯޓަށް ޝުކުރުވެރިވެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވީ، ހޯރަފުށީ އެއަރޕޯޓަކީ ރައީސް ސާލިހް އެ ސަރަހައްދަށް ގެނެސްދެއްވި ތަރައްޤީގެ ވަރަށް ބޮޑު ރަމްޒެއްކަމަށެވެ. އެގޮތުން ރައީސް ސާލިހްގެ ސަރުކާރުން އެއަރޕޯޓް ނޫނަސް ރާއްޖޭގެ އުތުރާއި ދެކުނަށް ގެނެސްދެއްވަމުން ގެންދަވާ ތަރައްޤީ ރައްޔިތުން ބަލައިގަންނަ ކަމަށް އޭނާ ވިދާޅުވިއެވެ.
" ހޯރަފުށީ އެއަރޕޯޓަކީ ރައީސް އިބްރާހިމް މުހައްމަދު ސާލިހްގެ ވަރަށް ވަރުގަދަ ރަމްޒެއް. މިއީ އެމަނިކުފާނުގެ ރިޔާސީ ދައުރުގެ އެންމެ ފުރަތަމަ ފުރިހަމަކުރެއްވި ވައުދު. ރައީސް ސާލިހް މި އެއަރޕޯޓް އެމަނިކުފާނުގެ ވެރިކަމުގައި ނިންމަވައި ނުދެއްވިނަމަ ނުވަތަ މި މަސައްކަތް ފައްޓަވައި ނުދެއްވިނަމަ މިއަދު އަޅުގަނޑުމެންނަކަށް މި ދަތުރުތައް ފެށިގެނެއް ނުދާނެ. އެހެންވީމަ ހަޤީގަތުގައިވެސް އަޅުގަނޑުމެން ހުރިހައި ރައްޔިތުން މިތިބީ ވަރަށް އުފަލުން، ވަރަށް ޝުކުރުވެރިކަމާއިއެކުގައި ރައީސް ސާހިލްގެ ސަރުކާރުން އެއަރޕޯޓުތައް ނޫނަސް ރާއްޖޭގެ އެކި ސަރަހައްދުތަކުގައި ފަތުރާލާފައިވާ ތަރައްޤީގެ އެކިއެކި މަޝްރޫއުތަކާއި ޕްރޮޖެކްޓްތަކުން ރައްޔިތުން ހަޤީގަތުގައިވެސް ބަލައިގަނެ ޝުކުރުވެރިވޭ." މުހައްމަދު ވަހީދު ވިދާޅުވިއެވެ.
ހޯރަފުށީ އެއަރޕޯޓާއިއެކު މުޅި އެރަށައް އަދި އެ ސަރަހައްދުގެ ވިޔަފާރިތަކަށްވެސް ވަނީ ފައިދާތަކެއް ލިބިގެންގޮސްފައެވެ. ކައުންސިލްގެ ރައީސް މުހައްމަދު ވަހީދު ވިދާޅުވީ، މިއަދު އެ ރަށާއި އެ ސަރަހައްދުގެ ވިޔަފާރިތައް ކުރިއަރައިގެން ހިނގައްޖެކަމަށެވެ. ހޯރަފުއްޓާއި އެ ސަރަހައްދުގެ އިޤްތިޞާދުގެ މައި ދޮރޯއްޓަށް މިއަދު ހޯރަފުށި އެއަރޕޯޓް ވެގެން ހިނގައްޖެކަމަށް އޭނާ ވިދާޅުވިއެވެ.
"މިއަދު ހޯރަފުށީގެ ހޯމް ސްޓޭ ވިޔަފާރި ފެށިއްޖެ. މިއަދު ހޯރަފުށީގެ ގެސްޓްހައުސްގެ ވިޔަފާރި ފަށައިގެން އެބަ ކުރިއަށްދޭ. އެ ވިޔަފާރީގެ ތެރެއަށް ނިކުމެފައި ތިބި ހޯރަފުށީގެ ވިޔަފާރިވެރިންގެ އިތުރަށް ސަރަހައްދުގެ މިދަންނަވާ ވިޔަފާރިތައް ކުރާ ބޭފުޅުންނަށްވެސް ލިބުނު ވަރަށް ބޮޑު ހިތްހަމަޖެހުމެއް ކަންނޭންގެ މިދަތުރުތައް ފެށިގެން ދިއުމަކީ. މިހާރު އިތުބާރު އެބައޮތް ޔަޤީންކަން އެބައޮތް މާދަމާވެސް ފްލައިޓް އޮންނާނެކަން. އެބޭފުޅުންނަށް ވަރަށް ބޮޑު ނަފާވެރިކަމެއް އުފާވެރިކަމެއް ލިބިގެންދާނެކަމާއިމެދު ޝައްކެތް ނެތް." މުހައްމަދު ވަހީދު ވިދާޅުވިއެވެ.
ހޯރަފުށީގެ އެއަރޕޯޓް ތަރައްޤީކޮށްފައިވަނީ ރަށުގެ ފަޅުން 34 ހެކްޓަރުގެ ބިން ހިއްކައިގެންނެވެ. އެއަރޕޯޓް ތަރައްޤީކޮށްފައިވަނީ ކޯޒްވޭއަކުން ރަށާ ގުޅާލައިގެންނެވެ.
ހޯރަފުށީ އެއަރޕޯޓަށް މިހާރު މޯލްޑިވިއަންގެ ޝެޑިއުލް ދަތުރުތައް އަންނަނީ ކުރަމުންނެވެ. އަދި މަންޓާ އެއަރޕޯޓްގެ ޗާޓަރ ދަތުރުތައްވެސް އެ އެއަރޕޯޓަށް ކުރެއެވެ. މިއާއިއެކު އެސަރަހައްދުގެ ފަތުރުވެރިކަމާއި ވިޔަފާރިތަކަށް ވަނީ ބޮޑު ފަސޭހަތަކެއް ލިބިގެންގޮސްފައެވެ.