ސުވިޓްޒަލޭންޑުގައި ދިވެހިރާއްޖޭގެ މަޤުބޫލުކަން އިތުރުކުރުމުގެ މަގުސަދުގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، (އެމްއެމްފީއާރުސީ)އިން އައުޓްޑޯރ އެޑްވަޓައިޒިންގ ކެމްޕޭނެއް ފަށައިފިއެވެ.
ސެޕްޓެންބަރު މަހުގެ 12 ވަނަ ދުވަހުން ފެށިގެން އޮކްޓޫބަރުމަހުގެ 9 ވަނަ ދުވަހަށް ކުރިއަށްގެންދާ މި ކެމްޕެއިނަކީ ދިވެހިރާއްޖެއަށް ސުވިޓްޒަލޭންޑުގެ މާކެޓުގައި އޮތް މަގުބޫލުކަން ދަމަހައްޓާ، ހޭލުންތެރިކަން އިތުރުކުރުމަށް ކުރިއަށް ގެންދާ ކެމްޕެއިނެއްކަމަށް އެމްއެމްޕީއާރުސީން ބުނެއެވެ.
މި ކެމްޕޭންގައި ޒޫރިކްގެ ބޮޑު ދެ ސަރަހައްދެއްގައި ހަތަރު ހަފްތާގެ މުއްދަތަށް ރާއްޖޭގެ އިޝްތިހާރުތައް ބިލްބޯޑުގައާއި ޑިޖިޓަލް ސްކްރީންގައި އަޅުވާފާ ހުންނާނެއެވެ. އަދި މި އިޝްތިހާރުތައް އެތައް މިލިއަން ބަޔަކަށް ފެންނާނެކަމަށް އެމްއެމްޕީއާރުސީން އަންދާޒާ ކުރެވެއެވެ.
ދިވެހިރާއްޖޭގެ ގުދުރަތީ ނަލަކަމުގެ އިތުރުން މި އިޝްތިހާރުތަކުގެ ޒަރިއްޔާއިން އެގަޢުމުގެ ފަތުރުވެރިންނަށް ރާއްޖެއިން ލިބެންހުރި އެކި ތަޖުރިބާތައްވެސް ދައްކުވައިދޭނެއެވެ. މިމަހުގެ 14 ވަނަ ދުވަހުގެ ނިޔަލަށް ސްވިސް މާކެޓުން ރާއްޖެއަށް 22،751 ފަތުރުވެރިން ރާއްޖެއަށް އައިސްފައިވާއިރު، ސްވިސް މާކެޓަކީ ރާއްޖެއަށް ފަތުރުވެރިން އެންމެ ގިނައިން އަންނަ ސޯސް މާކެޓުތަކުގެ ތެރޭގައި ހިމެނޭ މާކެޓެކެވެ.
މި މާކެޓުގައި ރާއްޖޭގެ މަޤުބޫލުކަން އިތުރުކޮށް، ދެމެހެއްޓުމަށްޓަކައި އެމްއެމްޕީއާރުސީއިން ވަނީ އެކި ހަރަކާތްތައް މި މާކެޓަށް އަމާޒުކޮށްގެން މިއަހަރު ތެރޭގައި ހިންގާފައެވެ. މީގެތެރޭގައި މީޑިއާ ފެމިލިއަލައިޒޭޝަން ދަތުރުތަކާއި، ޑިޖިޓަލް ކެމްޕޭން އަދި ފޯލްސްޓާފް އާއެކު ޕްރިންޓް ކެމްޕޭނެއްވެސް ވަނީ ހިންގާފައެވެ. މިއަހަރު ތެރޭގައި މި މާކެޓަށް އަމާޒުކޮށް އިތުރު ހަރަކާތްތައް ކުރިއަށް ގެންދިއުމަށް ވަނީ ރާވާފައިވާކަމަށް އެމްއެމްޕީއާރުސީން ބުނެއެވެ.
ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރުސީއިން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ. މީގެތެރޭގައި ފެއަރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ޤައުމުތަކުގައި ރޯޑްޝޯތައް ވެސް ވަނީ ބާއްވާފައެވެ. އަދި ވެބިނާތަކާއި، ފެމިލަރައިޒޭޝަން ދަތުރުތަކާއި، އެތަކެއް މާކެޓިން ކެމްޕެއިންތައް ވަނީ ހިންގާފައެވެ.