ލާމަރުކަޒީ ޤާނޫނަށް ބަދަލު ގެނައުމަކީ ޑިމޮކްރަސީ ހަރުދަނާކުރުމަށް އެޅުނު މުހިއްމު ފިޔަވަޅެއް: ރައީސް
ޑިމޮކްރަސީ ހަރުދަނާ ކުރުމަށް މިފަހުން ރާއްޖޭގައި އެޅުނު އެންމެ މުހިންމު ފިޔަވަޅަކީ، ލޯކަލް ކައުންސިލްތަކުގެ ދައުރު ފުޅާކޮށް، ލާމަރުކަޒީ ޤާނޫނަށް ގެނައި ބަދަލުތައްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މިހެން ވިދާޅުވީ، މިއަހަރުގެ ބައިނަލްއަޤްވަމީ ޑިމޮކްރަސީ ދުވަހުގެ މުނާސަބާގައި ދިވެހި ރައްޔިތުންނަށް ތަހުނިޔާއާ ހެޔޮއެދުންތައް ފޮނުއްވައި ދެއްވި ޚިޠާބުގައެވެ.
ބައިނަލްއަޤްވާމީ ޑިމޮކްރަސީ ދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، ދައުލަތެއްގެ ޢާންމު ރައްޔިތުންނާއި އެ ދައުލަތެއްގެ ސަރުކާރާ ދެމެދު، ދެފަރާތުގެ މަޞްލަޙަތު ވެސް ރައްކާތެރިކުރެވޭނެ ގޮތަށް، މުޢާމަލާތުކޮށްދޭ އޮނިގަނޑަކީ ޑިމޮކްރެސީގެ ހަމަތަކާއި އުޞޫލުތައްކަމަށެވެ. އަދި ރައްޔިތުންގެ މައްޗަށް ވެރިކަން ހިންގާނޭ މީހުން ކަނޑައެޅުމުގެ ބާރު، ޑިމޮކްރެސީގެ ހަމަތަކުގެ މަތިން ލިބެނީ ޢާންމު ރައްޔިތުންނަށްކަމަށާއި، ރައްޔިތުން އިޚްތިޔާރުކުރާ ބަޔަކު، ރައްޔިތުންގެ މަޞްލަޙަތާ އެއްގޮތަށް އެ ދައުލަތެއްގައި ވެރިކަން ކޮށްދިނުމަކީ، ޑިމޮކްރެޓިކް ސަރުކާރެއްގެ އެންމެ އިސް ވާޖިބުކަމަށެވެ.
ރައީސުލްޖުމްހޫރިއްޔާ ވިދާޅުވީ، ދިވެހިން މިއަދު ތިބީ ޑިމޮކްރެސީއާ މެދު ވަރަށް ބޮޑަށް ހޭލުންތެރިވެފައިކަމަށާއި، ދައުލަތް ހިންގުމުގެ ނިޒާމުގައި ރައްޔިތުންގެ ޙިއްޞާއަކީ ކޮބައިކަން ދެނެތިބެ، ރައްޔިތުން އަންނަނީ އެ ޙިއްޞާ ލިބިގަންނަމުންކަމަށެވެ. ޑިމޮކްރެސީއެއްގެ އެންމެ މުހިންމު ބޭނުމަކީ ރައްޔިތުން ބާރުވެރިކުރުވުން ކަމަށްވާއިރު، އެކަމަށް ބޭނުންވާ ޤާނޫނީ އޮނިގަނޑު ފުރިހަމަކުރުމުގެ މަސައްކަތްވެސް، އެކަށީގެންވާ ގޮތެއްގައި ކުރަމުންދާކަމަށް ރައީސް ވިދާޅުވިއެވެ. އަދި ރައްޔިތުންނަށް ބާރުތައް ދިނުމުގައި މިންތީ ތަފާތުތައް އެއްފަރާތްކޮށް، ހަމަހަމަ ފުރުޞަތު ހޯދައިދިނުމަށާއި އަންހެނުން ބާރުވެރިކުރުމަށް، ޤާނޫނުތަކަށް މިހާރުވެސް ގިނަ ބަދަލުތަކެއް ގެނެސްފައިވާކަން އެމަނިކުފާނު ފާހަގަކުރެއްވިއެވެ.
ޑިމޮކްރެސީ ހަރުދަނާ ކުރުމުގައި މިފަހުގެ ތާރީޚުގައި އެޅުނު އެންމެ މުހިންމު ފިޔަވަޅަކީ، ލޯކަލް ކައުންސިލްތަކުގެ ދައުރު ފުޅާކޮށް، އަތޮޅުތަކާއި ރަށްތަކާއި ސިޓީތަކުގެ ތަރައްޤީގައި އަންހެނުންގެ ބައިވެރިވުން އިތުރުކުރުމުގެ މަޤްޞަދުގައި، ލާމަރުކަޒީ ޤާނޫނަށް ގެނައި ބަދަލުތައްކަމަށް ރައީސްގެ ޚިޠާބުގައި ވިދާޅުވިއެވެ. އަދި އެ ބަދަލުތަކުގެ ސަބަބުން، ލާމަރުކަޒީ ނިޒާމު އިތުރަށް ހަރުދަނާވެ، ރައްޔިތުންގެ އެތައް ޙައްޤުތަކެއް އިތުރަށް ކަށަވަރުވެއްޖެކަމަށާއި، ހަމައެފަދައިން ދައުލަތް ހިންގުމުގެ ނިޒާމު ހަރުދަނާ ކުރުމުގައި، ރައްޔިތުންގެ ބަސް އިއްވުމުގެ ފުރުޞަތު ކުރިއަށް ވުރެ މާބޮޑަށް ތަނަވަސްވެއްޖެކަމަށެވެ.
ރައީސް ވިދާޅުވީ، މިބަދަލުތަކުން ނުކުތް އެންމެ ރަނގަޅު ނަތީޖާއަކީ، މުޖުތަމަޢުގައި ހަމަޖެހުމާއި ޞުލްޙަޔާއި އަމާންކަން ފެތުރިގެން ދިއުންކަމަށެވެ. އަދި ހަނގުރާމަތަކާއި، ޢަސްކަރީ ކޯޅުންތަކާއި، ނަސްލީ ވާދަވެރިކަމުގެ ކުރިމަތިލުންތަކުގެ ސަބަބުން، ދުނިޔޭގެ އެތައް ޤައުމެއްގެ ރައްޔިތުން މިހާރު ވެސް ތިބީ ޑިމޮކްރެސީގެ އެއްވެސް މަންފާއެއް ނުލިބި، އަސާސީ ޙައްޤުތަކުން މަޙްރޫމުވެ ބިކަވެފައިވާކަމަށެވެ. ޑިމޮކްރެސީ އާއި ޞުލްޙަޔަކީ އެއް ފައިސާ ފޮތީގެ ދެ ފުށް ކަމަށްވާއިރު، ޑިމޮކްރެސީ ދެމެހެއްޓުމަކަށްޓަކައި، ޞުލްޙަވެރިކަން އޮތުން ވަރަށް މުހިންމުކަމަށާއި އަދި ޞުލްޙަޔާއި ހަމަޖެހުން އޮތުމަށްޓަކައި، ޑިމޮކްރެސީ ހަރުދަނާކުރުން އެހާމެ މުހިންމުކަމަށްވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި އެހެން ޤައުމުތަކެކޭ އެއްފަދައިން ތިމާވެށީގެ މައްސަލަތަކާއި ޓެރަރިޒަމްފަދަ މައްސަލަތަކަކީ ރާއްޖޭގެ ޑިމޮކްރަސީއަށްވެސް ކުރިމަތިވެފައިވާ ގޮންޖެހުންތަކެއް ކަމަށާއި މިފަދަ ކޮންމެ ކަމަކުން ރާއްޖެ ރައްކާތެރިކޮށް ޙިމާޔަތްކުރުމަކީ، މުޅި ދަޢުލަތް ހިމެނޭހެން އަދި ފަރުދީ، ޖަމާޢީ ފެންވަރުގައި ބައިވެރިވެގެން އަދާކުރަންޖެހޭ، ޒިންމާއެއްކަން ފާހަގަކުރެއްވިއެވެ.