އާބާދީގައި ހަތަރު ސަތޭކައެއްހައި މީހުން ދިރިއުޅެމުން އަންނަ މ.އަތޮޅު ވޭވަށަކީ ބިމުގެ ގޮތުން މާބޮޑު ރަށެއް ނޫނެވެ. 41.7 ހެކްޓަރ ހުންނަ މިރަށަކީ އާބާދީ ކިތަންމެ މަދަސް، އަދި ބިމުގެ ނިސްބަތް ކިތަންމެ ކުޑަނަމަވެސް، ތަރައްޤީއަކީ ދިވެހިރާއްޖޭގެ ކޮންމެ ރަށަކަށްވެސް ހައްޤު އެއްޗެއްކަން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މުލަކަތޮޅަށް ކުރެއްވި ދަތުރުފުޅުން ވަނީ ސާބިތުވެފައެވެ ވަކިން ޚާއްސަކޮށް، މ.އަތޮޅު ވޭވަށަށް ކުރެއްވި ޒިޔާރަތުން މިކަން އިތުރަށް ހާމަވިއެވެ.
މިއީ ދިވެހި އިޤްތިޞާދުގެ ލޭނާރަށް ބާރުދޭ މުރާލި ރައްޔިތުންތަކެއް ދިރިއުޅޭ ރަށެކެވެ. އާމްދަނީ ހޯދުމަށް މައިގަނޑު ގޮތެއްގައި ވޭވަށުގައި ކޮށް އުޅެނީ މަސްވެރިކަމެވެ. އެގޮތުން މަސް ކައްކައި ހިއްކުމުގެ އިތުރުން، މަހުން ތައްޔާރުކުރާ އެކި ބާވަތްތަކުގެ އުފެއްދުންތައްވެސް މިރަށުގެ ރައްޔިތުން އާންމުކޮށް އުފައްދައި އުޅެއެވެ. މަސްވެރިކަމުގެ ސިނާޢަތުން ދިވެހި އިޤްތިޞާދަށް މަންފާ ހޯދައިދިނުމުގެ ހިތްވަރު ވޭވަށުގެ މަސްވެރިންގެ ކިބައިގައި ކިތަންމެ މަތީ މިންވަރަކަށް ހުރިނަމަވެސް، މާޒީގައި ވޭވަށު މަސްވެރިން ތަހައްމަލު ކޮށްފައިވަނީ ހިތްދަތި ދުވަސްތަކެކެވެ. ހައްސަ ބާނައިގެން ފޯރީގައި ރަށު ބަނދަރަށް ލަފަން އުޅެންޖެހުނީ ވަރަށް ދަތި ހާލުގައެވެ. މާކަނޑަށް މަހަށް ނުކުމެ ބަނޑުފުރާ މުއްތިކުރުމަށް މަސްބާނަން ބޭނުންވިނަމަވެސް ލަފާ ފުރުމުގެ ދަތިކަމާހުރެ އެތައް މަސްވެރިންނެއް ތިބީ ފަސްޖެހިފައެވެ. ދަތުރުފަތުރުގެ ޒަމާނީ ނިޒާމުތަކުން މުޅި ރާއްޖެ ގުޅާލަމުން ދިޔައިރު ވޭވަށު ރައްޔިތުން ތިބީ މާޔޫސްކަމެއްގެ ތެރޭގައެވެ. ނަމަވެސް ހާލަތު ބަދަލުކުރައްވާ، ވޭވަށު ރައްޔިތުންގެ މޫނު މައްޗަށް އުފާވެރިކަމެއް ގެނެވައިދިނީ ރައީސް އިބްރާހީމް މުޙައްމަދު ޞާލިހުގެ ޒަޢާމަތުގައި ޒަމާނީ ފެންވަރުގެ ބަނދަރެއް ޤާއިމުކޮށްދެވުމާއެކުއެވެ.
"މިހާ ފުޅާދާއިރާއެއްގައި މަސްކައްކާ ހިއްކާ ރަށެއްގައި އަޅުގަނޑު ހަނދާން އެބަހުރި 6 ދޯނި 7 ދޯނި ބޭރުގައި އޮވެ އަޅުގަނޑުމެން 4 ޓަނު 5 ޓަނު މަސް އެބަ ގެންނަން ޑިންގީގައި. އެކަމު މިއަދު އަޅުގަނޑުމެން އުފާކުރަންޖެހޭ ކަމަކީ ވޭވަށު ތަރައްޤީގެ ބާނީ މިރަށުގައި ފުދި އިތުރުވާ ބަނދަރެއް ހައްދަވާދެއްވާ، އެ ދަތިތައް ނެތިކޮށް ރައްޔިތުންނަށް އުފާވެރިކަން ގެނެސްދީފައިވާތީ." ވޭވަށުގެ ރައްޔިތުން މާޒީގައި އުފުލި ތަކުލީފްގެ ހަނދާން އައުކުރައްވާ ވޭވަށު ކައުންސިލްގެ ރައީސް މަމްދޫހު ވަޙީދު ވިދާޅުވިއެވެ.
ވޭވަރު ރައްޔިތުން މިއަދު ލަފާ ފުރުމަށް ޒަމާނީ ބަނދަރެއް ގާއިމުވުމަކީ ވޭވަށު ރައްޔިތުންގެ ހުވަފެނުގައި ކުލަ ޖެހުނުކަމެކެވެ. ވޭވަށުގެ އެތައް އާއިލާއަކަށް އުފާވެރިކަން ގެނުވި މި މަޝްރޫޢު ސަރުކާރުން އެމް.ޓީ.ސީ.ސީއާ ހަވާލުކޮށްފައިވަނީ 27 އޯގަސްޓް 2019 ގައެވެ. މި މަޝްރޫޢުގެ ދަށުން ބަނދަރު ހެދުމަށް އެރަށުގެ ފަޅުން 66831 ކިއުބިކް މީޓަރުގެ ސަރަޙައްދެއް ވަނީ ފުންކޮށްފައެވެ. 800 ފޫޓުގެ މި ބަނދަރުގައި 350 މީޓަރުގެ ބޭރުތޮށްޓެއްލައި، 130 މީޓަރު ރިވެޓްމަންޓް ޖަހާ، 380 މީޓަރުގެ އެއްގަމު ތޮށްޓެއް ވަނީ ލާފައެވެ. އަދި ބަނދަރާއި އިންވެގެން 1880 އަކަ މީޓަރުގެ ސަރަޙައްދެއްގައި ޕޭވްމަންޓް މަގު ހަދައި، ނެރުބައްތިއާއި މަގުބައްތި ހަރުކޮށްފައިވެއެވެ. ދަޢުލަތުގެ ބަޖެޓުން 51 މިލިއަން ރުފިޔާ ވޭވަށު ބަނދަރު ތަރައްޤީ ކުރުމަށް ހޭދަކުރީ ރައްޔިތުންތަކެއްގެ މޫނުމައްޗަށް އުފާވެރިކަން ގެނުވައިދިނުމަށެވެ.
"މި ރަށަކީ މަސްގަނެ ކައްކާ ހިއްކާ ރާއްޖެއިން ބޭރަށް ވަކި ބްރޭންޑެއްގެ ގޮތުގައި މިރަށުގެ މަސް ބޭރުކުރަމުންދާ ރަށެއް. އެހެން ނަމަވެސް މިރަށަށް ދިމާވެފައި އޮތް ދަތިކަމަކީ ދޯނިފަހަރު ރަށަށް އައިސް ވަދެ މަސްކޮޅު ވިއްކާލާ އެ ފަސޭހައިގައި ތިބެން އޮތް ދަތި. އަޅުގަނޑަށް އެނގިފައި އޮތްގޮތުގައި ދުވާލެއްގެ މައްޗަށް 25އަކަށް ޓަނު މަސް މިރަށަށް ގަނެ ހިއްކާ ވިއްކާ. މިއީ މިފަދަ އާބާދީއަކަށް ބަލާއިރު ރަނގަޅު މަސައްކަތެއްކަމަށް އަޅުގަނޑު ދެކެން. މިކަން ފުޅާކުރުމަށް އެންމެ ފުރަތަމަ ކުރަންޖެހޭ ކަމަކީ ފަސޭހަ ބަނދަރެއް." ވޭވަށު ބަނދަރު ހުޅުއްވައިދެއްވާ ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
2019ވަނަ އަހަރު ވޭވަށު ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތް ފެށުމާއެކު ވޭވަށު ރައްޔިތުން މުސްތަޤުބަލު ކުރަހަމުން ދިޔައީ އުންމީދާއެކުއެވެ. ބަނދަރު ހެދި، ބަނދަރުގެ ލުއިފަސޭހަކަން ލިބުމުން ރަށުގައި ކުރަމުން ދިޔަ އިޤްތިޞާދީ މަސައްކަތްތައް ފުޅާކުރުމުގެ އުންމީދުގައެވެ. ބޭސްފަރުވާއާއި ތަޢުލީމާއި ވިޔަފާރީގެ ބޭނުންތަކަށް ހިތްހަމަޖެހިލައިގެން ދަތުރުފަތުރުކުރުމުގެ އުންމީދުގައެވެ. ވޭވަށު ރައްޔިތުންގެ މޫނުމައްޗަށް އިހުނަށްވުރެ މާ އުފާވެރި ހިނިތުންވުމެއް ގެނުވައިދިނީ ޒަމާނީ ފެންވަރުގެ ބަނދަރެއް ރަށުގައި ގާއިމުވުމުންނެވެ.
"އަޅުގަނޑުމެން އެންމެ ހިތާމަކުރި އެއްކަންތައް އެއީ މާލެއަށް ދާންކަމަށް ބެލިޔަސް ފުރައިގެން ދާން މިޖެހެނީ ކައިރީގައި އޮތް އެހެން ރަށަކަށް. އެއީ ބަނދަރު ކުޑަވީމަ ގިނަ ފެރީތަކެއް މިރަށު ބަނދަރަކަށް ނުވަދެވޭ. އެދުވަސް އަޅުގަނޑުމެން މިއަދު ހަނދާން ވަނީ ވިސްނާލީމަ އެކަން އެދަނީ މިހާރު މާޒީއަކަށް. މި ބަނދަރު ލިބުމަކީ އަޅުގަނޑުމެން ކޮންމެ ރައްޔިތަކަށް އެއްކަލަ ބުނާހެން ވަރަ ފަޅައި އުދުއްސައިގަނެވުންފަދަ ކަމެއް މިއަކީ. އަޅުގަނޑުމެން މިއަދު ދުވާލަކު ދެ ފެރީ ތިން ފެރީ މާލެ ދަތުރުކުރޭ އެބަ." ވޭވަށު ރައްޔިތަކު އުފަލުން ހުރެ ބުންޏެވެ.
ރާއްޖޭގެ ޖަޒީރާ ރަށްތަކުގެ ތަރައްޤީ ފެށެނީ ލަފާފުރުމުގެ ލުއިފަސޭހަކަމާއި ހަމައިންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ސާބިތުކޮށްދެއްވިއެވެ. ލަފާ ފުރުމުގެ ލުއިފަސޭހަކަން ޒަމާނީ ބަނދަރަކާއެކު ވޭވަށަށް ލިބުމުން ވޭވަށުގެ އިޤްތިޞާދީ މަސައްކަތްތައް މެކުހަށް ޖަހައި، މަސްވެރި އުޅަނދުފަހަރުގެ ދުވެލި ހަލުއިވެއްޖެއެވެ. ރާއްޖޭގެ އަތޮޅުތައް ތަރައްޤީނުވެ، ދިވެހިރާއްޖެ ތަރައްޤީ ނުވާނެކަން އަނެއްކާވެސް އެނގި ކަށަވަރު ވެއްޖެއެވެ.