ރައްޔިތުންނަށް ޚިދުމަތެއް ދޭން ބޭނުންވާނަމަ، އެކަން ކުރެވޭނެކަން މިސަރުކާރުން ސާބިތުކޮށްދެމުން އަންނަކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެެއެވެ.
މ.ވޭވަށު އައު އިންޖީނުގެ ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، ރާއްޖޭގެ އެކި ކަންކޮޅުތަކުގައި އަސާސީ ޚިދުމަތް ފޯރުކޮށްދިނުމަށް ސަރުކާރުން ކުރާ މަސައްކަތުގެ މުހިންމު އެއް ބައިވެރިއަކީ ފެނަކަ ކޯޕަރޭޝަންކަމަށެވެ.
ރައީސް ވިދާޅުވީ ކަމެއްކުރަން ބޭނުންވީމަ ކުރެވޭނެކަމަށާ، ބަހަނާ ދައްކާ ފައިސާއާއި މުވައްޒަފުން ނެތް ވާހަކައަކީ ހަމަޖެހޭ ދެކޮޅުޖެހޭ ވާހަކައެއް ނޫންކަމަށެވެ. އެކަން ފެނަކައާއި އެމްޓީސީސީން ހާމަކޮށްދެމުން އަންކަމަށް ރައީސް ވިދާޅުވިއެވެ.
"ބޭނުންވަނީ އަމާޒަކަށް އެކީގައި ރަނގަޅު ވިސްނުމަކާއެކީގައި ކުރިއަށްދިއުން. އަޅުގަނޑަށް ހަމަ ޔަގީން ރައްޔިތުންނަށް ވެފައިވާ ޖަޒީރާ ތަރައްޤީގެ ވައުދުތައް ފުއްދުމަށް މި ދެކުންފުންޏާއެކީ ރައްޔިތުން ބޭނުންވާ މަންޒިލަށް ދެވޭނެކަން." ރައީސް ވިދާޅުވިއެވެ.
400 ކިލޯ ވޯޓުގެ 3 ޖަނެރޭޓަރު ސެޓް ބެހެއްޓޭގޮތަށް ތަރައްޤީކުރި، ވޭވަށު އައު އިންޖީނުގެއިން 20 ނުވަތަ 30 އަހަރު ވަންދެން އެއްވެސް ދައްޗެއްނެތި ޚިދަތް ފޯރުކޮށްދެވޭނެކަމަށް ރައީސް ވިދާޅުވިއެވެ.
ރައީސްގެ ވާހަކަފުޅުގައި ކުރިން ފެނަނަކައާމެދު ރައްޔިތުން ދެކެމުން އައި ގޮތް ބަދަލުވެއްޖެކަމަށް ވިދާޅުވިއެވެ. ކުރިން ރަށްރަށުގައި ޚިދުމަތްދިނީ ރަށްކުރިއަރުވާ ކޮމިޓީ ނުވަތަ ކޮންމެވެސް ކުންފުންޏެ ނުވަތަ ކައުންސިލްގެ އެހީގައިކަމަށާއި، ނަމަވެސް ކައުންސިލްތަކާއި ކޮމިޓީތަކުން ހިންގި އިންޖީނުގެތައް ފެނަކައާއި މިހާރު އުފަލުން ހަވާލުކުރަމުން އަންނަކަމަށް ރައީސް ވިދާޅުވިއެވެ. މިހާރު ކައުންސިލުން ޚިދުމަތްދެނީ އެންމެ އިންޖީނުގެއަކުންކަމަށާއި، އެއީ އުނގޫފާރު އިންޖީނުގެ އެކަނިކަމަށް ރައީސް ފާހަގަކުރެއްވިއެވެ. އުނގޫފާރު އިންޖީނުގެވެސް އަންނަ މަހު ފެނަކައާއި ހަވާލުކުރާނެކަމަށް ރައީސް ވިދާޅުވިއެވެ.
އެހެންކަމުން އިންޖީނުގެތައް ދެން ހިންގާނީ ފެނަކައާއި ސްޓެލްކޯއިންކަމަށާއި، މިއާއެކު ފެނަކައަށް އައު ޚިދުމަތްތައް ދޭން ފަސޭހަވާނެކަމަށް ރައީސް ވިދާޅުވިއެވެ. އެގޮތުން ރާއްޖޭޣެ އެކި ކަންކޮޅުތަކުގައިހުރި އައިސްޕްލާންޓްތައް ހިންގުން ސެޕްޓެމްބަރު މަހުން ފެށިގެން ފެނަކައިން ހަވާލުވާނެކަމަށާއި، މިވަގުތު މެދުކެނޑިފައި ހުރި އައިސްޕްލާންޓްތައްވެސް ފެނަކައިން ޚިދުމަތްދޭން ފަށާނެކަމަށްވެސް ރައީސް ވިދާޅުވިއެވެ.
މިސަރުކާރު އައިރު ކަރަންޓުގެ ދަތިކަން ވަރަށް ބޮޑަށް ރަށްތަކުން އުފުލަމުންދިޔަކަމަށާ، ނަމަވެސް މިހާރު 140 ރަށަކަށް އައު އިންޖީނުގެ ފޯރުކޮށްދީ މުޅި ރާއްޖޭގެ ކަރަންޓް ފެނަކައިން، ބަދަލުކޮށްދީފައިވާކަމަށްވެސް އެމަނިކުފާނު ވިދާޅުވިއެވެ.
ރަށްރަށް ތަރައްޤީކުރުމުގައި ތަފާތުނުކޮށް އަސާސީ ޚިދަތް ފޯރުކޮށްދިނުމަށް އެމަނިކުފާނު ވެވަޑައިގެންނެވި ވައުދާއެއްގޮތަށް ކުރިއަށްދާނެކަން ރައީސް ތަކުރާރުކުރެއްވިއެވެ.
ރައީސްވަނީ ސަރުކާރުގެ ތަރައްޤީގެ އެޖެންޑާއިން ވޭވަށް ބާކީ ނުކުރާނެކަމަށް ވިދާޅުވެ އިތުރު ޚިދުމަތްތަކާއި ވަސީލަތް ކުރިއަށް އޮތްތަނުގައިވެސް ވޭވަށުގައި ޤާއިމްކޮށްދޭނެކަމަށް ވިދާޅުވެފައެވެ.
ވޭވަށު އައު އިންޖީނުގެ ހުޅުއްވައި ދެއްވުމަށްފަހު ރައީސް ވަނީ އެތަން ބައްލަވާލައްވާފައެވެ.