ޤައުމު ބިނާކުރުމަށް ތިމާއަށް ކުރެވޭނީ ކޮންކަމެއްތޯ ބަލައި އެފަދަ ޝަޚުޞިއްޔަތެއް ބިނާކުރުމަށް ޘާނަވީއާއި މަތީ ޘާނަވީ ނިންމި ދަރިވަރުންނަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު އިލްތިމާސްކުރައްވައިފިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ އެއްވެސް ކުއްޖަކު ޚިޔާރުކުރާ ދާއިރާއަކީ މީހަކު މަޖުބޫރުކޮށްގެން ޚިޔާރުކުރާކަމެއްކަމުގައި ނުހަދައި އަމިއްލަ ޝައުގުވެރިކަން ހުރި ދިމާލަކުން މޮޅުކުއްޖަކަށްވާން ކޮންމެ ކުއްޖަކުވެސް މަސައްކަތްކުރުމަށް އެދިވަޑައިގެންފައެވެ.
2020އާއި 2021ވަނަ އަހަރުގެ ޘާނަވީއާއި މަތީ ޘާނަވީ އިމްތިޙާނުގެ މަތީ ވަނަތައް ޙާސިލްކުރި ދަރިވަރުންނަށް އިނާމުދެއްވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ ވޭތުވެދިޔަ ދެއަހަރުގެ ދަތި ޙާލަށްފަހުވެސް ދުނިޔެއާއި ރާއްޖޭގެ ނިސްބަތުން ވަނަވަނަ ޙާސިލުކުރި ދަރިވަރުންގެ ޢަދަދު މިއަހަރު އިތުރުވުމަކީ ހިތްވަރެއް ކޮށްފިއްޔާ ކާމިޔާބު ކޮންމެ ޙާލެއްގައިވެސް ޙާސިލުވާނެކަމުގެ ޔަގީންކަންކަމުގައެވެ. މިއަހަރުގެ ގަދަ 10އެއްގައި ހިމެނުނު ދަރިވަރުންނާ މުޚާޠާބުކުރައްވައި ރައީސުލްޖުމްހޫރިއްޔާވަނީ ދަރިވަރުންގެ ކިބައިން ޤައުމު ބިނާކުރުމުގައި އެއްބާރުލުމަށް އެދިވަޑައިގަންނަވާފައެވެ.
ކޮންމެ ކުއްޖަކީވެސް ޤައުމީ ޚިދުމަތުގައި މުހިންމު ކުއްޖެއްކަން ފާހަގަކުރައްވައި ރައީސް ވިދާޅުވީ ކޮންމެ ކުއްޖަކުވެސް ކުރިއަށްދާން ބޭނުންވާ އަދި ޤައުމަށް ޚިދުމަތްކުރުމަށް އެކުއްޖެއްގެ ކިބައިގައި އަށަގަންނުވަންވީ ޝަޚުސިއްޔަތަކީ ކޮބައިކަން ދެނެގަނެ، އެންމެ ޝައުގުވެރިވާ ދާއިރާއަކުން ޤައުމީ ޚިދުމަތަށް ނުކުތުމަށް އެދިވަޑައިގަންނަވާކަމަށެވެ.
"ތަރައްޤީ ލާމަރުކަޒުވެގެންދާވަރަކަށް ވަޒީފާއާއި ޒަރޫރީ ޚިދުމަތްތައް ހޯދުމައްޓަކާ ހިޖްރަކުރަންޖެހޭ މިންވަރު އެދަނީ ދަށްވަމުން. މިއަދު ތިޔަ ދަރިވަރުންވެސް ވިސްނަންވީ އެންމެ މުހިންމު އެއް ކަމަކީ އެކުއްޖެއްގެ އަމިއްލަ ރަށުގައި މައިންބަފައިންނާއި ޢާއިލާއާއެކުގައި ތިބެގެން ޤައުމަށް ޚިދުމަތްކުރެވެންއޮތީ ކޮންގޮތަކަށްތޯ." ރައީސް ވިދާޅުވިއެވެ.
ޓީޗަރުންނައި ބެލެނިވެރިންނާ މުޚާޠަބުކުރައްވައި ރައީސްވަނީ މިއަހަރު ހޯދި ކާމިޔާބީ އެގޮތުގައި ދަމަހައްޓައި ދަރިވަރުންނަކީ ހަމައެކަނި ފޮތުން މޮޅު ކުދިބަޔަކަށް ހެދުމުގެ ބަދަލުގައި ޙިލްމުވެރި ޙިކުމަތްތެރި ޖީލެއް ބިނާކޮށްދެއްވުމަށް މަސައްކަތްކޮށްދެއްވުމަށް އެދިވަޑައިގަންނަވާފައެވެ. އަދި ދިރިއުޅުމުގެ މައިދާނަށް ދަރިވަރުން ތައްޔާރުކުރުމުގައި ސްކޫލްތަކާއި ބެލެނިވެރިން އުފުލި ބުރަ މިއަދުގެ ކާމިޔާބީއިން ފެނިގެންދާކަން ފާހަގަކުރައްވައި ރައީސްވަނީ ހެޔޮ ތަރުބިއްޔަތާއި މޮޅު ނަތީޖާ ހޯއްދަވއިދެއްވުމަށް މަސައްކަތްކޮށްދެއްވި ހުރިހާ ފަރާތަކަށް ޝުކުރުއަދާކުރައްވާފައެވެ.
"ކޯވިޑްގެ ދަތިކަމުގެ ތެރޭގައި ސްކޫލްތަކުންނާއި ބެލެނިވެރިން އުފުއްލެވި ބުރަ އަޅުގަނޑަށް އިޙްސާސްކުރެވޭ. އެދަތިކަމުގެ ތެރޭގައި ދުނިޔޭގެ ފެންވަރުންވެސް މަތީ ވަނަތަކެއް ރާއްޖޭގެ ދަރިވަރުން ޙާސިލްކުރީ ޓީޗަރުންނާއި ބެލެނިވެރިންގެ މަތިވެރި ޤުރުބާނީގެ ސަބަބުން. އަޅުގަނޑު ދެކޭގޮތުގައި އެއީ ޤައުމަށްޓަކާ އެބޭފުޅުންކޮށްދެއްވި ވަރަށް އަގުހުރި މަސައްކަތެއް." ރައީސް ވިދާޅުވިއެވެ.
އެމަނިކުފާނުގެ ވާހަކަފުޅުގައިވަނީ ސަރުކާރުން ދަރިވަރުންގެ ކުރިމަގަށްޓަކައި މަގުކޮށައިދޭންޖެހޭކަން ފާހަގަކުރައްވައި އެމަސައްކަތް ވޭތުވެދިޔަ އަހަރުތަކުގައިވެސް ހިނގަމުންދާކަމަށް ވިދާޅުވެފައެވެ. އެގޮތުން ރާއްޖޭގެ ޔުނިވަރސިޓީތަކާއި ކޮލެޖްތަކުގައި ޑިގްރީ ފެންވަރަށް ހިލޭ ކިޔެވުމުގެ ފުރުސަތު މިހާތަނަށް 14930 ދަރިވަރަކަށް ދީފައިވާކަމަށާއި ސްޓޫޑެންޓް ލޯންގެ ފުރުސަތު 1986 ދަރިވަރަކަށް ފޯރުކޮށްދީފައިވާކަމަށް ވިދާޅުވިއެވެ. އަދި 20 ޤައުމެއްގެ އެކި ޔުނިވަރސިޓީތަކުގައި ތަފާތު ސްކޯލަރޝިޕްގައި ކިޔެވުމުގެ ފުރުސަތު 468 ދަރިވަރަކަށް ފަހިކޮށްދެވިފައިވާކަން ރައީސް ފާހަގަކުރެއްވިއެވެ.