ޓެރަރިޒަމްގެ ކުށުގައި 13 އަހަރުގެ ޖަލު ޙުކުމެއްގައި ހުންނެވި ކުރީގެ ރައީސް މުޙައްމަދު ނަޝީދަށް ދަށުކޯޓްގައި މައްސަލަ ހިންގިއިރު ޖަވާބުދާރީވެވަޑައިގަތުމަށް އެކަށީގެންވާ ވަގުތާއި ފުރުޞަތު ލިބިވަޑައިގެންނެވިކަމަށް ޕްރޮސެކިއުޓަރ ޖެނެރަލްގެ އޮފީހުން މިއަދު ސްޕްރީމް ކޯޓްގައި ވިދާޅުވެއްޖެއެވެ.ޕީޖީ އޮފީހުން މިގޮތަށް ވިދާޅުވީ ނަޝީދުގެ މައްޗަށް ކުރިމިނަލް ކޯޓުން ކުރެއްވި ޙުކުމާ ގުޅިގެން އެމަނިކުފާނުގެ ފަރާތްޕުޅުން ފާހަގަކުރެއްވި ކަންކަމާ ގުޅިގެން ދަށުކޯޓްގެ ޙުކުމް ޞައްޙަތޯ ބެއްލެވުމަށް ހައިކޯޓަށް ހުށައެޅުއްވި މައްސަލަ ބަލައިނުގަތުމާއެކު ދައުލަތުން އެ މައްސަލަ ސުޕްރީމްކޯޓްގައި އިސްތިއުނާފް ކުރެއްވުމުން މިއަދު ބޭއްވެވި އަޑުއެހުމުގައެވެ.މި މައްސަލާގައި ވާހަކަ ދައްކަވަމުން ދައުލަތުގެ ވަކީލް ވިދާޅުވީ ދަށުކޯޓްގައި މައްސަލަ ހިންގިއިރު މައްސަލައަށް ޖަވާބުދާރީވެވަޑައިގަތުމަށާއި ތައްޔާރުވެވަޑައިގަތުމަށް އެކަށީގެންވާ ވަގުތު ލިބިވަޑައިގެންނެވިކަމަށެވެ. އަދި ނަޝީދާ ބައްދަލުކުރެއްވުމަށް އެމަނިކުފާނުގެ ވަކީލުންނަށް ޚާއްޞަ އިންތިޒާމްތަކެއް ހަމަޖައްސަވާދެއްވިކަންވެސް ދައުލަތުގެ ވަކީލް ފާހަގަކުރެއްވިއެވެ. އަދި ނަޝީދުގެ ވަކީލުން ޝަރީޢަތަށް ހާޒިރުވެވަޑައިގަތުމާ ދެކޮޅުހެއްދެވުމުން އެހެން ވަކީލުން އައްޔަންކުރެއްވުމުގެ ފުރުޞަތު ނަޝީދަށް ލިބިވަޑަގެންނެވި ކަމަށްވެސް ދައުލަތުގެ ވަކީލް ވިދާޅުވިއެވެ.ނަޝީދާ ވާހަކަދެއްކެވުމަށްފަހު މައްސަލައަށް ޖަވާބުދާރީވުމަށް ފަނަރަ ދުވަހުގެ މުއްދަތެއް ދެއްވުމަށް ނަޝީދުގެ ގާނޫނީ ޓީމުން މިއަދު އެދިފައިވެއެވެ. އަދި މައްސަލައާ ގުޅޭ ލިޔުންތައްވެސް ލިބޭނެ އިންތިޒާމް ހަމަޖައްސަވާދެއްވުމަށްވެސް ނަޝީދުގެ ފަރާތްޕުޅުން އެދިފައިވެއެވެ.މި މައްސަލާގައި މިއަދުގެ އަޑުންއެހުން ނިންމާލެއްވީ ނަޝީދުގެ ޤާނޫނީ ޓީމަށް ޖަވާބުދާރީވުމަށް ފުރުޞަތުދެއްވާކެން މައްސަލަ ބައްލަވާ ބެންޗުން އިއުލާންކުރެއްވުމަށްފަހުގައެވެ. މި މައްސަލަ ބައްލަވަނީ ސުޕްރީމްކޯޓްގެ ހުރިހާ ފަނޑިޔާރުން ހިމެނިވަޑައިގަންނަވާ ބެންޗަކުންނެވެ. މި ބެންޗްގެ ރިޔާސަތު ބަލަހައްޓަވަނީ އުއްތަމަ ފަނޑިޔާރު އަލްއުސްތާޛު ޢަބްދުﷲ ސަޢީދެވެ.