މިއަހަރުގެ ކުރިއަށްއޮތް ތަނުގައި އިތުރު 10 ރިސޯޓް ހުޅުވޭނެކަމަށް ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވެއްޖެއެވެ. މިނިސްޓަރ މިހެން ވިދާޅުވީ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުންނެވެ.
ރާއްޖޭގެ ފަތުރުވެރިކަމުގައި އިތުރު ޕްރޮޑަކްޓް މާކެޓަށްނެރެ އެނދުގެ އަދަދު އިތުރުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވީ، މިއަހަރުގެ މިހާތަނަށްވެސް 2 ރިސޯޓް ހުޅުވިފައިވާކަމަށެވެ. އަދި އަހަރުގެ ކުރިއަށްއޮތް ތަނުގައި އިތުރު 10 ރިސޯޓް ހުޅުވޭނެކަމަށެވެ.
އަލަށް ހުޅުވިގެންދާ 10 ރިސޯޓާއެކު ރިސޯޓްތަކުގެ އެނދުގެ ޢަދަދު 3500އަށް އިތުރުވެގެންދާނެކަމަށް މިނިސްޓަރ ވިދާޅުވިއެވެ. މިއީ ހަމައެކަނި ރިސޯޓްތަކުން އިތުރުވެގެންދާ އެނދުކަން ފާހަގަކުރައްވައި މިނިސްޓަރ ވިދާޅުވީ، ގެސްޓްހައުސްތަކުންވެސް އަހަރުގެ ކުރިއަށްއޮތް ތަނުގައި ގިނަ އެނދުތަކެއް މާކެޓަށް ނެރެވޭނެކަމަށެވެ. ގެސްޓްހައުސްތަކުގެ އެނދުގެ އަދަދު އިތުރުކުރުމަށް ސަރުކާރުން ގެސްޓްހައުސްތަކަށް ކަންކަން ފަހިކޮށްދެމުންދާކަން މިނިސްޓަރ ވިދާޅުވިއެވެ.
"މިހާރު 2 ރިސޯޓް ހުޅުވިއްޖެ. އަދި މިއަހަރު ޝެޑިއުލް ދައްކާގޮތުން 10 ރިސޯޓް ހުޅުވޭނެ. 3500 ވަރަކަށް އެނދު އެއީ ރިސޯޓް ތަކުން އަންނަނީ. އެއަށްވުރެ މާބާރު ސްފީޑްގައި ކުރިއަރައިގެން މިއަންނަނީ ގެސްޓްހައުސް ސެކްޓަރ. އޭގެ އެނދު އަޅުގަނޑުމެންނަށް ސީދާ ނަންބަރެއް ބުނާކަށް ނޭންގޭ. އަޅުގަނޑުމެންގެ ޕްލޭންގައި އިންނަކަމެއްނޫން. އެހެންނަމަވެސް ޕްރައިވެޓް ސެކްޓަރއަށް އިތުބާރު ލިބޭ ވަރަކަށް އެބައި ވަރުގަދަވެގެންދާނެ. އެއަށް ސަރުކާރުން މިކޮށްދޭ ކަމަކީ އެތެރޭގެ ދަތުރުފަތުރުގެ ނިޒާމް ވަރަށް ފުރިހަމަކޮށްލަނީ. މިހާރު ތިލަދުންމަތީގައި ހައިސްޕީޑް ފެރީ ފެށިގެން އެދަނީ. އެހެންވީމަ އެފެރީ ނެޓްވޯކް އެޅުމަކީ މިދެންނެވި ފަތުރުވެރިކަމަށް ވަރަށް ފަހިވެގެންދާނެ ކަމެއް." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރާއްޖޭގެ ފަތުރުވެރިކަން އެކި މާކެޓްތަކަށް ބޭސްވާންޖެހޭ ވާހަކައަކީ އަބަދުވެސް ދައްކަމުންއަންނަ ވާހަކައެއްކަމަށެވެ. ސަބަބަކީ މަތީފަންތިއާއި މެދު ފަންތީގެ ފަތުރުވެރިންނަށްވެސް ރާއްޖެއަކީ ޗުއްޓީ ހޭދަކޮށްލަން އާދެވޭނެފަދަ ޤައުމަކަށް ހަދަންޖެހޭކަމަށެވެ. 2 މާކެޓަށް އަމާޒުކޮށްގެން ދާއިރު ލޯކަލް ޓޫރިޒަމް ނުވަތަ ގެސްޓްހައުސްތައް މުހިންމު ކަމަށް މިނިސްޓަރ ވިދާޅުވިއެވެ.
"ހަމައެކަނި އަޕްމާކެޓްއަށް ގޮސްގެންވެސް ނުވޭ. މިޑް މާކެޓްވެސް އޮންނަންޖެހޭ. އެހެންވީމަ 2 ބައި ބެލެންސްކޮށްގެން ދާއިރު އެއީވެސް ވަރަށް މުހިންމު އެނދުތަކެއް. އެ އެނދުތަކުގެ އެންމެ މުހިންމު ކަމަކީ ހަމަ ސީދާ ރައްޔިތުންނަށް ފައިދާ ލިބޭ މޮޑެލްއެއް ވީމަ. އަނެއްކާ ފަތުރުވެރިންގެ ޝައުގުވެރިކަން އެހާބޮޑު. ރާއްޖޭގެ ގުދުރަތީ ރީތިކަން ބަލާލުމުގެ އިތުރުން ދިވެހިންގެ ސަގާފަތާއި ދިރިއުޅުން ބަލާލުމަށް ފަތުރުވެރިންގެ ޝައުގުވެރިކަން ބޮޑު." މިނިސްޓަރ ވިދާޅުވިއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ 7 ވަނަ ދުވަހުގެ ނިޔަލަށް ރާއްޖޭގައި 170 ރިސޯޓެއް އަންނަނީ އޮޕްރޭޓްކުރަމުންނެވެ. އެއީ 40323 އެނދެވެ. އަދި 848 ގެސްޓްހައުސް އޮޕަރޭޓްކުރަމުން އަންނައިރު އެއީ ޖުމްލަ 15،797 އެނދެވެ.