އެމްޑީޕީގެ ޗެއަރޕާސަން ފައްޔާޟް އިސްމާޢީލް ވެވަޑައިގެންނެވި ވަޢުދުފުޅާ އެއްގޮތަށް އިސްލާމް ދީނުގެ މަޝްވަރާ މަޖިލީހުގެ އިންތިޚާބު ބާއްވަން ތައްޔާރުވެއްޖެއެވެ.
އެމްޑީޕީގެ ޗެއަރޕާސަންގެ އިންތިޚަބުގެ ކެމްޕެއިންގައި އިކޮނޮމިކް މިނިސްޓަރ ފައްޔާޟް އިސްމާޢީލް ވަނީ ޗެއަރޕާސަންކަމަށް އިންތިޚާބުވެވަޑައިގެންފިނަމަ އެންމެފުރަތަމަ ކުރައްވާނެ ކަމަކީ އިސްލާމް ދީނުގެ މަޝްވަރާ މަޖިލިސް އަލުން އެކުލަވުންކަމަށެވެ.
އެމްޑީޕީން ބުނީ، އިސްލާމް ދީނުގެ މަޝްވަރާ މަޖިލިހަށް ކުރިމަތި ލާންބޭނުންވާ އެޕާޓީގެ މެމްބަރުންގެ ތެރެއިން ޝަރުޠުހަމަވާ މެމްބަރުން އެކަމަށްއެދި ފޯމު ފުރިހަމަ ކުރެއްވުމަށްފަހު ޕާސްޕޯޓް ފޮޓޯއަކާއި، އައިޑީ ކާޑުގެ ސާފު ކޮޕީއަކާއެކު އެޓެސްޓް ކުރެވިފައިވާ ތައުލީމީ ސެޓްފިކެޓްތައް މިމަހުގެ 16ގެ ކުރިން ހުށަހެޅުމަށް އެދޭކަމަށެވެ.
އިސްލާމް ދީނުގެ މަޝްވަރާ މަޖިލީހަށް ވާދަކުރުމުގެ ޝަރުޠުތައް
- 1- އިސްލާމިކް ޔުނިވަރސިޓީއަކުން ތައުލިމީ ސެޓްފުކެޓެއް ލިބިފައިވުން ނުވަތަ އެފެންވަރަށް ކިޔަވާފައިވާކަމުގެ ލިޔުމެއް އިސްލާމިކް ޔުނިވަރސިޓީއަކުން ލިބިފައިވުން،
- 2- އިސްލާމްދީން ކިޔަވައި ދިނުމުގެ ހުއްދަ ލިބިފައިވުން
- 3- ދީނީ ތަޤުރީރުކުރުމުގެ ހުއްދަ ލިބިފައިވުން
- 4- ހާފިޒުކަމުގެ ސަނަދުއޮތުން
- 5- އިމާމްކޯހުން ނުވަތަ ޤާޟީކޯހުން ފާސްވެފައިވުން
އެމްޑީޕީގެ އިސްލާމް ދީނުގެ މަޝްވަރާ މަޖިލީހުގެ އިންތިޚާބު އެންމެ ފަހުން ބޭއްވީ 2011ވަނަ އަހަރުގެ ތެރޭގައެވެ.
އެމްޑީޕީން ވަނީ އިސްލާމް ދީނުގެ މަޝްވަރާ މަޖިލީހުގެ އިތުރުންވެސް އެޕާޓީގެ ދާއިމީ ކޮމެޓީތަކަށް ކުރިމަތިލުމަށްވެސް ހުޅުވާލާފައެވެ.