ރަޝިއާގެ އެއިރޯފްލޮޓްއިން ރާއްޖެއަށް ކުރަމުންއައި ދަތުރުތައް އިތުރުކުރަން ނިންމައިފިއެވެ. އެގޮތުން އަންނަ ހުކުރު ދުވަހުން ފެށިގެން އެއިރޯފްލޮޓްއިން ރާއްޖެއަށް ކުރާ ދަތުރުތައް އިތުރުކުރާނެއެވެ.
އެއިރޯފްލޮޓްއިން ރަޝިއާއާ ރާއްޖެއާ ދެމެދު ކުރަމުންއައި ދަތުރުތައް މެދުކަނޑާލީ ރަޝިއާއާއި ޔޫކްރެއިނާ ދެމެދު ކުރަމުންދާ ހަނގުރާމައާ ގުޅިގެންނެވެ. ނަމަވެސް މި ދަތުރުތައް އަލުން މިދިޔަ މަހު ވަނީ ފަށާފައެވެ.
މިހާރު އެއިރޯފްލޮޓްއިން ރާއްޖެއަށް ހަފްތާއަކު 4 ދަތުރު އަންނަނީ ކުރަމުންނެވެ. ނަމަވެސް މިމަހުގެ 10 އިން ފެށިގެން ހަފްތާއަކު 6 ދަތުރު އެ އެއަރލައިނުން ރާއްޖެއަށް ކުރާނެއެވެ. ދަތުރުތައް އިތުރުކުރުމާއިއެކު ހަފްތާގެ އަންގާރަ ދުވަސް ފިޔަވައި ކޮންމެ ދުވަހަކު ރަޝިއާއިން ރާއްޖެއަށް ދަތުރުކުރުމަށް ވަނީ ހަމަޖެހިފައެވެ.
އެއިރޯފްލޯޓުން ރާއްޖެއަށް ދަތުރުތައް ބާއްވަނީ ރަޝިއާގެ ވެރިރަށް މޮސްކޯ އިން ވެލާނާ އިންޓަނޭޝަނަލް އެއަރޕޯޓަށެވެ. ކޯވިޑް-19އަށްފަހު އެއިރޯފްލޮޓްގެ ދަތުރުތައް އަލުން ރާއްޖެއަށް ފެށީ 2020ވަނަ އަހަރުގެ ސެޕްޓެމްބަރ 11ވަނަ ދުވަހުއެވެ.
އެއިރޯފްލޮޓްގެ ދަތުރުތައް މެދުކަނޑާލުމުގެ ކުރިން ރަޝިއާއަކީ ރާއްޖެއަށް އެންމެ ގިނަ ފަތުރުވެރިން އަންނަމުން ދިޔަ ޤައުމެވެ. ނަމަވެސް ހަނގުރާމައާއެކު ދަތުރުތައް މެދުކަނޑާލުމާގުޅިގެން މިހާރު ރަޝިއާ ވަނީ 3ވަނައަށް ވެއްޓިފައެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ 1ވަނަ ދުވަހުގެ ނިޔަލަށް ރަޝިއާއިން ރާއްޖެއަށް 67088 ފަތުރުވެރިން ވަނީ ޒިޔާރަތްކޮށްފައެވެ.