ރަށްރަށުގެ ކައުންސިލްތައް ހިންގުމަށް ދިމާވެފައިވާ ޖާގައިގެ ދަތިކަމަށް ހައްލު ހޯއްދެވުމަށްޓަކައި މީހުން ދިރިއުޅޭ ކޮންމެ ރަށެއްގައި އޮފީސް ޢިމާރާތެއް އެޅުމުގެ ޕްލޭން ހައްދައިގެން މަސައްކަތްކުރައްވަމުން ގެންދަވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އއ.އުކުޅަހުގައި ކުރިއަށްދިޔަ ވިއަވަތި ރާއްޖެ ކޮންފަރެންސްގައި ރަށްރަށުގެ ތަރައްޤީއަށް އަންހެނުން ބާރުވެރިކުރުމާއި ގުޅޭގޮތުން ކުރިއަށްގެންދިޔަ ސެޝަންގައި ރަށްރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުން ވަނީ އެ ކޮމިޓީތަކުގެ ބައްދަލުވުންތައް ބޭއްވުމަށް ޖާގަ ނުލިބޭކަމުގެ ކަންބޮޑުވުން ފާޅުކުރައްވާފައެވެ. މިގޮތުން ކައުންސިލްތަކަކީ ޖާގައިގެ ދަތިކަން އިންތިހާއަށް ހުރި ތަންތަންކަން ފާހަގަކުރައްވާ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ރައީސުން ވަނީ، ރަށްރަށުގައި ހުންނަ ކައުންސިލް ޢިމާރާތުގެ އިތުރުން، ކައުންސިލްތަކުގެ ބެލުމުގެ ދަށުގައި ހުންނަ އެހެން ޢިމާރާތްތަކުން ނަމަވެސް އެ ކޮމިޓީތަކަށް ޖާގަދެއްވުމަށް އެދިވަޑައިގެންފައެވެ.
އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ރައީސުންގެ މި ކަންބޮޑުވުމާއި ގުޅިގެން ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވީ، ރަށްރަށުގައި ސަރުކާރުގެ އިދާރާތައް ހިންގުމަށް އޮތް ޖާގައިގެ ދަތިކަމަކީ ބޮޑު މައްސަލައެއްކަމަށެވެ. އެގޮތުން ރަށްރަށުގައި ހުރި ކައުންސިލް އިދާރާތަކަކީ 40 ނުވަތަ 50 އަށް އަހަރުވެފައިވާ ޢިމާރާތްތަކެއްކަން ފާހަގަކުރައްވާ ރައީސް ވަނީ ކައުންސިލްތަކުގައި ޖާގަ އޮތް މިންވަރަކުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް މަސައްކަތް ކުރެއްވުމަށް ޖާގަ ދެއްވުމަށް އެދިވަޑައިގެންފައެވެ.
ރައީސްގެ ވާހަކަފުޅުގައި ޖާގައިގެ ދަތިކަން ހައްލުކުރުމަށް ޕްލޭނިން މިނިސްޓްރީން ޕްލޭންތަކެއް ހަދަމުން އަންނަކަން ފާހަގަކުރެއްވިއެވެ. އެގޮތުން ރަށްރަށުގައި ޢިމާރާތްކުރާ އޮފީސް ޢިމާރާތްތަކުގައި ކައުންސިލްގެ މަސައްކަތާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މަސައްކަތްކުރުމަށާއި، މެޖިސްޓްރޭޓް ކޯޓުތަކަށާއި، ބޭންކުފަދަ ޚިދުމަތްތަކަށްވެސް އެ ޢިމާރާތުން ޖާގަ ދެވި ބޮޑު ފަސޭހައެއް ލިބިގެންދާނެކަމަށްވެސް ރައީސް ވިދާޅުވިއެވެ.
ރައީސް ވަނީ އެ މަސައްކަތްކުރުމަށް ވަގުތު ނަގާނެކަންވެސް ފާހަގަކުރައްވާފައެވެ.
"ގިނަ ކައުންސިލްތަކަކީ30 ނުނީ 40 އަހަރު ވެފައިވާ ތަންތަން. އެކަން ހައްލުކުރުމަށް އަސްލަމް [ޕްލޭނިން މިނިސްޓަރ] ޕްލޭންތަކެއް އެބަ ހައްދަވާ.. ކައުންސިލްތައް އިމާރާތްކުރުމަށް ކޮންމެ ރަށެއްގައި އޮފީސް އިމާރާތެއް އަޅާއިރު ކައުންސިލާ، ޑަބްލިއުޑީސީއަށްވެސް ޖާގަ އޮންނާނެ. ކޮންމެ ރަށެއްގައި އޮފީސް އިމާރާތް އެޅުމުން ކޯޓުތަކަށްވެސް ޖާގަ އޮންނާނެ. ބޭންކު އަންނަންވިޔަސް ޖާގަ އޮންނާނެ." ރައީސް ވިދާޅުވިއެވެ.
ރައީސް ވިދާޅުވީ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް ކައުންސިލްތަކާއެކު މަސައްކަތް ކުރުމުގެ ޖާގަ އޮންނަންވާނެކަމަށެވެ. އެގޮތުން އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ މެންބަރުންނަކީ ކައުންސިލާ ވަކިން ބޭރުން މަސައްކަތްކިުރުމުގެ ބަދަލުގައި އެއް ޢިމާރާތެއްގައި މަސައްކަތްކުރެވޭ ބަޔަކަށް ހަދަންޖެހޭކަމށެވެ. ލާމަރުކަޒީ ޤާނޫނު ފަރުމާކޮށްފައިވަނީވެސް އެފަދަ ވިސްނުމެއްގައިކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.