ކުރީގެ ނާއިބް ރައީސް އަޙުމަދު އަދީބް ދައުލަތުގެ އެތައް މިލިއަން ރުފިޔާއަކަށް ޚިޔާނާތްތެރިވެ ވަޑައިގެންފައިވާކަމަށް ދައުލަތުން މިއަދު ކޯޓްގައި ވިދާޅުވެއްޖެއެވެ.
ރަސްމީ ހައްސިއްޔަތު ނަހަމަ ގޮތުގައި ބޭނުންކުރިކަމުގެ ކުށުގައި، އަޙުމަދު އަދީބުގެ މައްޗަށް ދައުލަތުން އުފުއްލަވާފައިވާ، ދަޢުވާގައި މިއަދު ބޭއްވެވި އަޑުއެހުމުގައި ދައުލަތުން ވިދާޅުވީ އެނާ ޓޫރިޒަމް މިނިސްޓަރަކަށް ހުންނަވައިގެން އެމްއެމްޕީއާރްސީ މެދުވެރިކޮށް މާލެއަތޮޅު ފަޅެއް އެބޮނީ ޕްރައިވެޓް ލިމިޓެޑް ކިޔާ ކުންފުންޏަކަށް ފަންސާސް އަހަރަށް ޤަވާޢިދާ ޚިލާފަށް ދޫކުރައްވާފައިވާކަމަށެވެ.
މިއަދުގެ އަޑުއެހުމުގައި ވާހަކަ ދައްކަވަމުން ދައުލަތުގެ ވަކީލު ވިދާޅުވީ އެބޮނީ ޕްރައިވެޓް ލިމިޓެޑަށް އެ ފަޅު ކުއްޔަން ދިންއިރު އެފަޅަކީ ޓޫރިޒަމް މިނިސްޓްރީގެ ބެލުމުގެ ދަށުގައިވާ ފަޅެއް ނޫންކަމަށެވެ. އަދި އެ ފަޅު ދޫކުރުމުގެ އެއްބަސްވުން ހަދައި، ސޮއިކޮށްފައިވަނީ ޓްއަރިޒަމް މިނިސްޓްރީގެ މުވައްޒަފުން ބޭނުންކޮށްގެން ކަމަށްވެސް ދައުލަތުގެ ވަކީލް ވިދާޅުވިއެވެ. މީގެއިތުރުން އެ ފަޅު ކުއްޔަށްދީފައިވަނީ އެރަށް ދިނުމަށްފަހު ނަގަންޖެހޭ އިދާރީ ފީވެސް ނުނަގާކަމަށާއި މިހާތަނަށްވެސް އެ ފައިސާ ދައުލަތަށް ލިބިވަޑައިގެންފައި ނުވާކަމަށްވެސް ދައުލަތުގެ ވަކީލް ވިދާޅުވިއެވެ.
މި މައްސަލާގައި މިއަދު ބޭއްވެވި އަޑުއެހުމުގައި އަޙްމަދު އަދީބް ވަނީ ދަޢުލަތުގެ ދަޢުވާއަށް އިންކާރު ކުރައްވައި، ޖަވާބްދާރީވުމުގެ ފުރުޞަތަކަށް އެދިވަޑައިގެންފައެވެ. އަދި ޝަރީޢަތް ނިމެންދެން ބަންދުގައި ބެހެއްޓެވުމަށް ކޯޓުން ކުރައްވާފައިވާ އަމުރު މުރާޖަޢާކުރައްވައި ގޭ ބަންދަށް ބަދަލުކޮށްދެއްވުމަށްވެސް އަޙުމަދު އަދީބް އެދިވަޑައިގެންނެވިއެވެ.
އަދީބްގެ މި އެދިވަޑައިގަތުމާ ގުޅޭގޮތުން ދައުލަތުން ވިދާޅުވީ އަދީބަކީ މުޖްތަމަޢުގެ ސަލާމަތަށް ނުރައްކާތެރި ބޭފުޅެއްކަމަށެވެ. އަދި އެނާ ފުލުހުންގެ ބަންދުން ދޫކޮށްލައިފިނަމަ ހެކިންނަށް ނުފޫޒު ފޯރުއްވުމުގެ ފުރުޞަތު އެބައޮތްކަމަށްވެސް ދައުލަތުގެ ވަކީލް ވިދާޅުވިއެވެ. މި މައްސަލާގައި މިއަދު ބޭއްވެވި އަޑުއެހުން ނިންމަވާލެއްވީ އަންނަ މަހުގެ ހަތްވަނަ ދުވަހު އިތުރު އަޑުއެހުމެއް ބާއްވަވާނެކަން އިޢުލާނު ކުރެއްވުމަށްފަހުގައެވެ. އެދުވަހު އޮންނާނީ އަދީބްގެ ފަރާތުން މައްސަލައަށް ޖަވާބުދާރީވެ ވަޑައިގަތުމާއި ދެ ފަރާތުން ހުށައަޅާ ހެކިން ހުށައެޅުއްވުމެވެ.
މާލެ އަތޮޅު ފަޅެއް ޤަވާއިދާ ޚިލާފަށް ދޫކުރި މައްސަލާގައި ދައުލަތުން އަޙުމަދު އަދީބުގެ މައްވަށް ދަޢުވާ ކުރައްވާއިރު އެ ފަޅު ދޫކޮށްގެން ދަޢުލަތަށް ލިބިވަޑައިގެންނެވި އެއް މިލިއަން ޑޮލަރަށް ޚިޔާނާތްތެރިވެ ވަޑައިގެންނެވި ކަމަށް ބުނާ މައްސަލާގައި އަދީބާ ގާތްގުޅެއް އޮންނަ، އެމްއެމްޕީއާރްސީގެ މެނޭޖިންގ ޑިރެކްޓަރ ޢަބްދުﷲ ޒިޔަތުގެ މައްޗަށްވެސް ދައުލަތުން އަންނަނީ ދަޢުވާކުރައްވަމުންނެވެ. އެނާއާ ދެކޮޅަށް އުފުއްލަވާފައިވަނީ ޚިޔާނާތުގެ ކުށުގެ ދަޢުވާއެވެ.