ރަޖިސްޓްރީނުކުރާ ސްކީމްތަކުގައި ބައިވެރިވި މީހުން އެކަން އެންގުމަށް ސީއެމްޑީއޭއިން އިލްތިމާސްކޮށްފި

ރަޖިސްޓްރީކޮށްފައިނުވާ މާލީ ސްކީމްތަކުގައި އިންވެސްޓްކުރުމުގެ ސަބަބުން، އެއްވެސް ފަރާތަކަށް މާލީ ގެއްލުމެއް ލިބިފައިވާނަމަ، ލިބުނު ގެއްލުމުގެ ތަފުޞީލާއެކު އެންގުމަށް ކެޕިޓަލް މާރކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިލްތިމާސްކޮށްފިއެވެ.

ސީއެމްޑީއޭއިން މިކަމަށް އިލްތިމާސްކޮށްފައި މިވަނީ "ކިންގްސް ފޮރެކްސް"ގެ ނަމުގައި، ފޮރެކްސްގައި އިންވެސްޓްކުރާ ކަމަށް ބުނެ، ފޭދޫ ދާއިރާގެ ކުރީގެ މެންބަރު އަލްހާން ފަހުމީ އިސްވެ ހުންނަވައިގެން އުފެއްދެވި ކުންފުނިން އެތައް ބައެއްގެ އަތުން އެތައް މިލިއަން ރުފިޔާއެއް ހޯދާފައިވާ މައްސަލައެެއް ފެންމަތިވެފައިވާ ދަނޑިވަޅެއްގައެވެ.

ސީއެމްޑީއޭއިން ވިދާޅުވީ، ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނުގެ ދަށުން ދިވެހިރާއްޖޭގެ ހިއްސާގެ ބާޒާރު ރެގިއުލޭޓްކޮށް، ސެކިއުރިޓީޒްގެ ޚިދުމަތް ފޯރުކޮށްދިނުމުގެ އެންމެހާ ހުއްދަތައް ދޫކުރަނީ އެ އޮތޯރިޓީންކަމަށެވެ. އިންވެސްޓަރުންގެ މަސްލަހަތު ހިމާޔަތްކޮށް ރައްކާތެރިކުރުމަށްޓަކައި ސެކިއުރިޓީޒްގެ މުޢާމަލާތުތަކުގައި ނޭދެވޭ ޢަމަލުތައް ކުރިޔަ ނުދިނުމާއި، ސެކިއުރިޓީޒްގެ ބާޒާރާމެދު އިތުބާރު ގެއްލޭފަދަ ޢަމަލު ހިންގިޔަ ނުދިނުމަށް އަޅަންޖެހޭ ފިޔަވަޅުތައް އެޅުމަކީވެސް އެ އޮތޯރިޓީގެ މަސްއޫލިއްޔަތެއްކަމަށް ސީއެމްޑީއޭއިން ވިދާޅުވިއެވެ.

ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނުގެ ދަށުން "ސެކިއުރިޓީޒް" ކަމަށް ބަޔާންކޮށްފައިވަނީ؛ ސަރުކާރުން ނެރޭ ނުވަތަ ނެރުމަށް ހުށަހަޅާ ޑިބެންޗަރ އާއި ބިލް ނުވަތަ ބޮންޑުކަމަށް ސީއެމްޑީން ބުންޏެވެ. އަދި ކުންފުންޏަކުން ނުވަތަ އެހެން ޖަމާޢަތަކުން ނެރޭ، ނުވަތަ ނެރުމަށް ހުށަހަޅާ ޑިބެންޗަރއާއި، ސްޓޮކާއި، ހިއްސާއާއި، ބޮންޑާއި، ނޯޓާއި، މިއިން އެއްޗަކާބެހޭ ޙައްޤެއް، ނުވަތަ ވޮރަންޓެއް ނުވަތަ އޮޕްޝަނަކާއިގެ މި ޤާނޫނުގެ ބޭނުމަށް ސެކިއުރިޓީޒް ކަމުގައި އޮތޯރިޓީން ކަނޑައަޅާ ކޮންމެ ލިޔުމަކީވެސް ސެކިއުރިޓީޒްކަމަށް ބެލެވޭނެކަމަށް ސީއެމްޑީއޭއިން ވަނީ ފާހަގަކޮށްފައެވެ.

ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނާއި، އެ ޤާނޫނުގެ ދަށުން ހަދާފައިވާ ގަވާއިދުތަކާ އެއްގޮތަށް ނަގަންޖެހޭ ހުއްދަ ނުވަތަ ލައިސަންސް ނުނަގައި، ސެކިއުރިޓީޒްގެ އެއްވެސް މުޢާމަލާތެއް ހިންގުމަކީ ނުވަތަ އެގޮތަށް ދޭހަވާފަދަ ގޮތަކަށް އިޝްތިހާރުކޮށް ޢަމަލުކުރުމަކީ މަނާކަކަމެއްކަމަށް ސީއެމްޑީއޭއިން ބުންޏެވެ. އެހެންކަމުން ސީއެމްޑީއޭގައި ރަޖިސްޓްރީ ކޮށްގެން ހިންގާ ފަންޑު ތަކުގެ މަޢުލޫޢުލޫމާތު އެ އޮތޯރިޓީގެ ވެބްސައިޓުން އާންމުކޮށް ފެންނަން ހުންނާނެކަމަށްވެސް އެ އޮތޯރިޓީން ބުންޏެވެ. އަދި ރަޖިސްޓްރީކޮށްފައި ނުވާ ސްކީމްތަކުގައި އިންވެސްޓްކުރުމުގެ ސަބަބުން، އެއްވެސް އިންވެސްޓަރަކަށް މާލީ ގެއްލުމެއް ލިބިފައިވާނަމަ، ލިބުނު ގެއްލުމުގެ ތަފުޞީލާއެކު އެ އޮތޯރޮޓީއަށް ޝަކުވާ ހުށަހެޅުމަށްވެސް ސީއެމްޑީއޭއިން ވަނީ އެދިފައެވެ.

ރަޖިސްޓްރީކޮށްފައި ނުވާ ސްކީމްތަކުގައި އިންވެސްޓްކުރުމުގެ ސަބަބުން، އެއްވެސް އިންވެސްޓަރަކަށް މާލީ ގެއްލުމެއް ލިބިފައިވާނަމަ، ލިބުނު ގެއްލުމުގެ ތަފުޞީލާއެކު އެންގުމަށް ސީއެމްޑީއޭއިން އިލްތިމާސްކުރުމާއެކު، އަލްހާން ފަހުމީގެ ފޮރެކްސް ކުންފުނިން ކުރި ޓްވީޓެއްގައި އެ ކުންފުންޏަށް އިންވެސްޓްމަންޓް ބަލައިގަތުން ހުއްޓާލާފައިވާކަން ހާމަކޮށްފައެވެ. އަދި މިކަން ކުރާން ޤާނޫނީ އޮނގަނޑާއެކީ ލިބުނު ގެއްލުމުގެ ބަދަލު ހޯދުމުގެ މަސައްކަތް ކުރިއަށް ގެންދާނެ ކަމަށް އަލްހާންގެ ކިންގްސް ފޮރެކްސް ކުންފުނިން ބުނެފައިވެއެވެ.

ކިންގްސް ފޮރެކްސް އިން ބުނެފައިވާގޮތުގައި އެކުންފުންޏަށް އިންވެސްޓް ކުރި އެކި މީހުންގެ އަތުން ގާތްގަނޑަކަށް 60 މިލިއަން ރުފިޔާ ލިބިފައިވެއެވެ. އެއީ 2000 އަށް ވުރެ ގިނަ މީހުންގެ ފައިސާއެވެ. މި މައްސަލާގައި އޭނާ ވަނީ އިންވެސްޓްކުރި މީހުންނަށް ފައިސާ އަނބުރާ ދެވޭނީ އޭނާގެ ފްރީޒްކޮށްފައިވާ އެކައުންޓްތައް ދޫކޮށްލުމުންކަމަށް ބުނެފައެވެ. ނަމަވެސް އޭނާގެ އެކައުންޓްތައް ދޫކޮށްލުމުންވެސް އިންވެސްޓްކުރި މީހުންނަށް ފައިސާ ލިބިފައިނުވާތީ އެތައް ބަޔަކު ޓްވިޓާގައި އަލްހާން ޓެގްކޮށް އަންނަނީ ހިތްހަމަ ނުޖެހުން ފާޅުކުރަމުންނެވެ.

މި މައްސަލައަކީ ޕޮންޒީ ސްކީމެއްކަމަށް ބެލެވޭކަމަށް ވިދާޅުވެ ފުލުހުން އަންނަނީ އެ މައްސަލަ ތަހުގީގުކުރަމުންނެވެ.