ކުރީގެ ރައީސް މުޙައްމަދު ނަޝީދަށް ބޭސްފަރުވާއަށް ރާއްޖެއިން ބޭރަށް ވަޑައިގަތުމުގެ ހުއްދަ ސަރުކާރުން ދެއްވީ، ކުރީގެ ރައީސްކަން ކުރައްވާފައިވާ ބޭފުޅަކަށް ދެއްވަންޖެހޭ ގަދަރާ އިޚްތިރާމާ ޢިނާޔަތުގެ ދަށުންކަމަށާއި، ބޭރުގެ އެއްވެސް ނުފޫޒެއް އޮވެގެން ނޫންކަމަށް ރައްޔިތުންގެ މަޖިލީހުގެ ބައެއް މެމްބަރުން ވިދާޅުވެއްޖެއެވެ.
ޓީވީއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު އިބްރާޙީމްދީދީ ވިދާޅުވީ، ރައީސް ނަޝީދަށް ބޭސްފަރުވާއަށް ރާއްޖެއިން ބޭރަށް ވަޑައިގަތުމަށް ރާއްޖޭގެ ޤާނޫނު ތަންދޭކަމަށެވެ. މީއީ ރާއްޖެއަށް ޕްރެޝަރެއް އޮވެގެން ސަރުކާރުން ކުރެއްވި ކަމެއްނޫންކަމަށާއި، ރާއްޖެއިން ބޭސްފަރުވާ ނުހޯއްދެވޭ ކަންކަމުގައި އާންމު އުސޫލުން ކޮންމެ ގައިދީއަކަށްވެސް އެ ފުރުޞަތު އޮންނަކަމަށެވެ.
ރައީސް ނަޝީދުގެ ވެރިކަމުގައިވެސް ގައިދީން ބޭސްފަރުވާއަށް ރާއްޖެއިން ބޭރަށް ފޮނުއްވަވާފައިވާކަން އިބްރާޙީމްދީދީ ފާހަގަ ކުރެއްވިއެވެ. އަދި ބޭރުގެ ފަރާތްތަކުން އަބަދުވެސް އެފަރާތްތަކުގެ ޚިޔާލާއި މަޝްވަރާ ދިވެހި ސަރުކާރާ ޙިއްޞާ ކުރައްވާ ކަމަށާއި، ބަލައިގަނެވޭ ޚިޔާލުތައް އަބަދުވެސް ޤަބޫލުކުރައްވަމުން އަންނަކަމަށެވެ.
ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު ޢަބްދުﷲ ރިފާޢު ވިދާޅުވީ، ގައިދީން ބޭރަށް ދަތުރުކުރުމަށް ދޫކުރަނީވަގުތީ ލިއުމެއް ނަމަވެސް ރައީސް ނަޝީދަށް އެމަނިކުފާނުގެ، ޕާސްޕޯޓުގައި ދަތުރުކުރެއްވުމުގެ ފުރުޞަތު ދެއްވުމަކީ ސަރުކާރުން ޚާއްސަ އުޞޫލަކުން އަމަލުކުރައްވާކަމުގެ ހެއްކެއްކަމުގައެވެ. ސަރުކާރުން އެއްވެސް ތަފާތުކަމެއް އަދި ނުފޫޒެއް ނުފޯރުއްވާ އެފުރުޞަތު އެމަނިކުފާނަށް ދެއްވާފައިވާކަމަށް ރިފާއު ވިދާޅުވިއެވެ.
ރައީސް ނަޝީދު ބޭސްފަރުވާއަށް އިނގިރޭސި ވިލާތަށް ވަޑައިގަތީ ރޭގެ ވަގުތެއްގައެވެ.