ކޮންމެ އަހަރެއްގެ ރޯދަމަހުގައި ރާއްޖޭގެ ބާޒާރުގައި ކާބޯތަކެއްޗަށް އޮންނަ ޑިމާންޑު ބޮޑުވެ، ޚާއްޞަކޮށް ތަރުކާރީއާ މޭވާގެ ބާވަތްތަކުގެ ޑިމާންޑު އިންތިހާއަށް ބޮޑުވެ، ކަރާ ފަދަ ބާވަތްތަކުގެ އަގު މައްޗަށް އުފުލުމުން ޢާންމުންގެ ޝަކުވާ އިތުރުވެއެވެ.
މިކަމަށް ޙައްލެއް ހޯދުމަށްޓަކައި ސަރުކާރުގެ ދަނޑުވެރިކަމާ ބެހޭ ކުންފުނި އެގްރޯނެޓުން މިއަހަރުގެ ރޯދަމަހަށް އަމާޒުކޮށްގެން ގިނަ ޢަދަދެއްގެ ކަރާ ހެއްދުމަށް ފަހު ބާޒާރަށް ވަނީ ނެރެން ފަށާފައެވެ. އެގްރޯނެޓުން ރަމަޟާން މަހުގެ ފުރަތަމަ ދުވަހު 5 ޓަނު ކަރާ، ދެވަނަ ދުވަހު 1.5 ޓަނު ކަރާ، ތިން ވަނަ ދުވަހު 3 ޓަނު ކަރާ ވަނީ ބާޒާރަށް ނެރެފައެވެ.
މި ހަފުތާގެ ތެރޭގައި އިތުރު 10 ޓަނު ކަރާ ބާޒާރަށް ނެރުމަށް ތައްޔާރުކޮށްފައިވާކަމަށް އެ ކުންފުނިން ބުނެއެވެ. އަދި އެކި ދުވަސްތަކަށް ބަހާލައިގެން ޖުމްލަ 117 ޓަނު ކަރާ ރަމަޟާންމަހު ބާޒާރަށް ނެރެވޭނެކަމަށް އެގްރޯނެޓުން ބުނެއެވެ.
ދަނޑުވެރިކަމުގެ ބާވަތްތަކުގެ އުފެއްދުންތެރިކަން އިތުރުވެފައި ވާތީ، އެހެން އަހަރުތަކާ ޚިލާފަށް މިއަހަރުގެ ރަމަޟާން މަހުގައި ބާޒާރުގައި ކަރާގެ އަގު އާދަޔާ ޚިލާފަށް ބޮޑު ނުވެ ހިފެހެއްޓިފާ ވާކަން އެގްރޯނެޓުން ފާހަގަކުރެއެވެ. އެގްރޯނެޓުގެ އުންމީދަކީ ގިނަ ޢަދަދެއްގެ ދިވެހި އުފެއްދުންތައް ބާޒާރަށް ނެރެވިގެން ދިއުމެވެ. އަދި ރަމަޟާން މަހުގެ ހުރިހާ ހިސާބެއްގައި ވެސް އެތަކެތި ބާޒާރުގައި ހެޔޮ އަގުގައި ލިބެން ހުރުމެވެ. ކަރާގެ އިތުރުން ބަރަބޯ، ބަޓާނާ، ތޮރާ، ކިއުކަންބާ، ފަޅޯ އަދި ފަތްކޭލުގެ ބާވަތްތައް ގިނަ ޢަދަދަކަށް ބާޒާރަށް ނެރެވޭނެކަމަށް އެގްރޯނެޓުން ބުނެއެވެ.
ރާއްޖޭގެ އަތޮޅުތައް 5 ސަރަޙައްދަކަށް ބަހާލެވިގެން، މުޑުވައްކުރާ ދުވަހުން ފެށިގެން ތަކެތި ބާޒާރަށް ނެރުމާ ހަމައަށް ދުރާލާ އިންތިޒާމް ކުރެވިގެން ހިންގޭ ދަނޑުވެރިކަމުގެ އާމޮޑެލްގެ ދަށުން ދަނޑުވެރިކަން ކުރުމަށްޓަކައި 707 ފަރާތަކުން ވަނީ ދަނޑުވެރިކަން ކުރުމުގެ އެއްބަސްވުމުގައި ސޮއި ކޮށްފައެވެ. އެފަރާތްތަކުން ދަނޑުވެރިކަން ފެށުމަށްޓަކައި ދެވޭ ސްޓާޓާރ ޕެކް 276 ފަރާތަކަށް ވަނީ ދޫކޮށްފައެވެ. އަދި 273 ފަރާތަކުން މިހާރު ވެސް ޢަމަލީގޮތުން ދަނޑުވެރިކަން އަންނަނީ ކުރަމުންނެވެ.