އެންވަޔަރަމަންޓަލް ޕްރޮޓެކްޝަން އޭޖެންސީއިން ކުރިޔަށްގެންދަވާ ސަރވޭތައް ބެލެހެއްޓެވުމުގައި ތިމާވެއްޓާއި ރައްޓެހި އިންތިޒާމްތަކެއް އެ އިދާރާއިން ހަމަޖައްސަވައިފިއެވެ. މި ގޮތުން، އީ.ޕީ.އޭ.އިން މިވަނީ، ސަރވޭތައް ބެލެހެއްޓެވުމުގައި މާލޭގައި ކުރަންޖެހޭ އެއްގަމު ދަތުރުތަކުގައި ތިމާވެއްޓާއި ރައްޓެހި ބައިސްކަލް ބޭނުންކުރަން ނިންމަވާފައިވެއެވެ.އެންވަޔަރަމެންޓަލް ޕްރޮޓެކްޝަން އޭޖެންސީ - އީ.ޕީ.އޭ.އަކީ ތިމާވެއްޓާއިބެހޭ ވުޒާރާގެ ބެއްލެވުމުގެ ދަށުން ރާއްޖޭގެ ތިމާވެށި ހިމާޔަތްކުރުމާއި ރައްކާތެރިކުރުމާއިބެހޭ ހުރިހާކަމެއް ބައްލަވަމުން ގެންދަވާ އިދާރާއެވެ. އީ.ޕީ.އޭ.އިން މާލޭގައި ކުރިޔަށް ގެންދަވާ ސަރވޭތަކުގައި ކުރައްވާ އެއްގަމު ދަތުރުތަކުގައި ތިމާވެއްޓާއި ރައްޓެހި ބައިސްކަލު ބޭނުން ކުރައްވަން ނިންމެވުމާއިއެކު، ތިމާވެއްޓާއިބެހޭ ވުޒާރާއިން އެ އިދާރާއަށް ބައިސްކަލުތަކެއް ހަވާލު ކުރައްވާފައިވެއެވެ. މި ބައިސްކަލްތައް އީ.ޕީ.އޭ.އާއި ހަވާލުކުރައްވާފައިވަނީ ދިވެހި ސަރުކާރާއި، ޖަރުމަނުވިލާތުގެ ސަރުކާރާއި ދެމެދު ތިމާވެށީގެ ދާއިރާއިން އެއްބާރުލުން ދިނުމަށް ޤާއިމްކޮށްފައިވާ މަޝްރޫޢުކަމަށްވާ "ސަޕޯޓް ފޯރ ދަ ކްލައިމެޓް ނިއުޓްރަލިޓީ ސްޓްރެޓެޖީ އޮފް ދަ މޯލްޑިވްސް" ގެ ދަށުންނެވެ. ޖަރުމަނުވިލާތުގެ ސަރުކާރުން ހަދިޔާކޮށްފައިވާ، އިރުގެ ހަކަތަ ބޭނުންކޮށްގެން ޗާޖްކުރާ މި 4 ބައިސްކަލް އީ.ޕީ.އޭ.އާއި ހަވާލުކޮށްދެއްވީ ތިމާވެއްޓާއިބެހޭ ވަޒީރު ޠާރިޤް އިބްރާހީމްއެވެ. މިކަމަށްޓަކައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން، މިއީ ފެށުމެއްކަމަށް ސިފަކުރައްވައި، ސަރުކާރުގެ އެހެން އިދާރާތަކުގެ ބޭނުންތަކަށްވެސް މިފަދަ ތިމާވެއްޓާއި ރައްޓެހި އުޅަނދުތައް ބޭނުން ކުރެއްވުމަށް ބާރު އަޅުއްވާނެކަމަށް މިނިސްޓަރ ޠާރިޤް ވިދާޅުވިއެވެ. އީ.ޕީ.އޭ.އިން މާލޭގައި ޕެޓްރޯލް ކުރުމަށް މިފަދަ ބައިސްކަލްތަކެއް ލިބުމަކީ، އެ އިދާރާއިން މިހާރު ތެލަށް ކުރާ ހޭދައަށް ލިބުނު ވަރަށް ބޮޑު ލުޔެއް ކަމަށާއި، މިއީ ރާއްޖެ ކާބަން ނިއުޓްރަލް ޤައުމަކަށް ހެދުމަށް ކުރައްވަމުން ގެންދަވާ މަސައްކަތަށް ލިބުނު ބޮޑު ހިތްވަރެއް ކަމަށް އީ.ޕީ.އޭ.ގެ ޑިރެކްޓަރ ޖެނެރަލް އިބްރާހީމް ނަޢީމް ވިދާޅުވިއެވެ.މިއަދުން ފެށިގެން އިރުގެ ހަކަތަ ބޭނުންކޮށްގެން ޗާޖްކުރާ ބައިސްކަލް ބޭނުންކޮށްގެން ޕެޓްރޯލް ކުރަން ފަށާފައިވާއިރު، މިފަދަ އިތުރު އުޅަނދުތަކެއް ގެންނަން މަސައްކަތް ކުރައްވާނޭ ކަމަށްވެސް އީ.ޕީ.އޭ.އިން ވިދާޅުވެއެވެ.