ސޫރިޔާގެ ބައެއް ސަރަހައްދުތަކުގެ ރައްޔިތުން ބަނޑަށް ޖެއްސުމުގެ މަގްސަދުގައި އެތަންތަން ހިސާރު ކުރުމަކީ ހަނގުރާމައިގެ ޖަރީމާއެއް ކަމަށް އދ. ގެ ސެކްރެޓަރީ ޖެނެރަލް ބަންކީމޫން ސިފަކުރައްވައިފިއެވެ.ބަންކީ މޫން ވިދާޅުވީ ކާބޯތަކެއްޗާއި ބޭސް ހަނގުރާމައިގެ ހަތިޔާރަކަށް ހެދުމަކީ ހަނގުރާމައިގެ ޖަރީމާއެއްކަމަށާ އެމަންޒަރު ސޫރިޔާގެ ހަނގުރާމައިގެ މައިދާނުން ފެނިފައިވާ ކަމަށެވެ.އދ.ގެ ޖެނެރަލް އެސެމްބްލީން އިންތިޒާމްކޮށްގެން ނިއުޔޯކްގައި ބޭއްވި ނުރަސްމީ ބައްދަލުވުމެއްގައި ވާހަކަ ދައްކަވަމުން ބަންކީމޫން ވިދާޅުވީ ސޫރިޔާގެ މަޟާޔާ، ކަފްރިޔާ އަދި ފޫއާ އަށް ކާބޯތަކެއްޗާއި އިންސާނީ އެހީގެ ގާފިލާތަކާއެކު އދ. ގެ މަސްއޫލުވެރިން ވަނުމުން އެސަރަހައްދުތަކުން ފެނިފައިވަނީ ހިތްދަތި މަންޒަރުތަކެއް ކަމަށެވެ.ހައިހޫނުކަން ތަހައްމަލްކުރި އެސަރަހައްދުތަކުގެ ރައްޔިތުންގެ އިހްސާސްތައް އަހާލުމުން އެމީހުން ތަހައްމަލުކުރަމުންދާ ހިތްދަތި ހާލަތު އެނގިގެން ދިޔަ ކަމަށް ބަންކީމޫން ވިދާޅުވިއެވެ. ސޫރިޔާގައި ހިސާރުކޮށްފައިވާ ސަރަހައްދުތަކުގެ ރައްޔިތުންގެ ޙާލަތު ރަހީނުންގެ ޙާލަތަށްވުރެވެސް ގޯސްކަމަށް ބަންކީމޫން ވިދާޅުވެފައިވެއެވެ."ސޫރިޔާގައި ޙިސާރުކޮށްފައިވާ ސަރަހައްދުތަކުގެ މީހުންނާބެހޭގޮތުން ބުނެލަންބޭނުންވަނީ އެމީހުން އެތިބީ ރަހީނުންގެ ގޮތުގައި ޙިސާރު ކޮށްފައިކަމަށް، ނަމަވެސް އެމީހުންގެ ޙާލަތު ރަހީނުންގެ ޙާލަތަށްވުރެވެސް ގޯސް، ރަހީނުންނަށްވެސް ކާބޯތަކެތި ލިބޭ، ނަމަވެސް ޙިސާރުކޮށްފައިވާ ސޫރިޔާގެ ސަރަހައްދުތަކުގެ ކުޑަކުދިންނާއި އަންހެނުން އުޅެންޖެހުނީ ކާބޯތަކެއްޗާ އަދި ބޭހުންވެސް މަހްރޫމްވެގެން، އެމީހުން ދިޔައީ މަރާ ހަނގުރާމަ ކުރަމުން". ބަންކީމޫން ވިދާޅުވިއެވެ.ބާންކީ މޫން މިމޭރުމުން ވާހަކަ ދައްކަވާފައިވާއިރު، ޙިސާރުކޮށްފައިވާ ސޫރިޔާގެ ހުރިހާ ސަރަހައްދުތަކުގެ ރައްޔިތުންނަށް މިދިޔަ ހަފްތާގެ އަންގާރަދުވަހު އދ. ން ވަނީ ކާބޯތަކެއްޗާއި ބޭސް ފޯރުކޮށްދީފައެވެ. މިކަންކޮށްފައިވަނީ ސޫރިޔާ ސަރުކާރާއި އެޤައުމުގެ އިދިކޮޅު ފަރާތްތަކުން ވީ އެއްބަސްވުމެއްގެ ދަށުން ޙިސާރު ގެ ފިޔަވަޅުތައް ވަގުތީގޮތުން އުވާލުމާ ގުޅިގެންނެވެ.ނަމަވެސް ދިގުމުއްދަތަކަށް ހައިހޫނުކަން ތަހައްމަލް ކުރަންޖެހުމުގެ ސަބަބުން އެސަރަހައްދުތަކުގެ ގިނައަދަދެއްގެ ކުޑަކުދިންނާއި މުސްކުޅިންގެ ސިއްޙީ ޙާލަތު ވަނީ ވަރަށްބޮޑަށް ގޯސްވެފައެވެ. މިއާއެކު އެސަރަހައްދުތަކުގައި ހައިހޫނުކަން ތަހައްމަލް ކުރި މީހުންގެ ތެރެއިން އެތަށް ސަތޭކަ ބަޔަކަށް ޑޮކްޓަރުންގެ ޚާއްސަ ޓީމުތަކުގެ ބެލުމުގެ ދަށުން ފަރުވާދޭން ޖެހިފައިވެއެވެ. އދ. ން ވަނީ ސޫރިޔާގެ ހަނގުރާމައިގައި ހަތިޔާރެއްގެ ގޮތުން ބަނޑަށް ޖެއްސުމާއި ކާބޯތަކެތިން އެތަށް ހާސްބަޔަކު މަހްރޫމްކުރި މައްސަލާގައި ޒިންމާ އުފުލަންޖެހޭ ފަރާތްތައް ދެނެގަތުމަށްޓަކައި ކަމާބެހޭ ތަހްޤީޤްތައް ހިންގަން ފަށާފައެވެ. މި ތަހްޤީޤްތަކަށް ބޭނުންވާ މަޢުލޫމާތު އދ. އިން ހޯދާފައިވަނީ ހާލުގައި ޖެހުނު ސަރަހައްދުތަކުގެ ރައްޔިތުންނާ ސުވާލުކޮށްގެންނެވެ.ނަމަވެސް ސޫރިޔާގެ މައްސަލާގައި ބައިނަލްއަޤްވާމީ މުޖަތަމަޢު ބައިބައިވެފައިވާއިރު މިކަން ތަހްޤީޤްކޮށް ފިޔަވަޅުއަޅަންޖެހޭ ފަރާތްތަކާ ދެކޮޅަށް ފިޔަވަޅުއެޅުމަކީ އދ. ގެ ނިޒާމު އޮންނަ ގޮތުން ކުރެވޭނެ ކަމެއްކަމާމެދު ވަނީ ސުވާލު އުފެދިފައެވެ.