ފުލުހުންގެ ޚިދުމަތަށް އިންޤިލާބީ ބަދަލެއް ގެންނާނެ "ޕޮލިސް އެކަޑަމީ" ރައީސް ހުޅުވައިދެއްވައިފި

އައްޑޫ ސިޓީގައި ޤާއިމްކޮށްފައިވާ ނޭޝަނަލް ޕޮލިސިންގ އެންޑް ލޯ އެންފޯސްމަންޓް ހުޅުވައިފިއެވެ.

މި ތަމްރީންގެ މަރުކަޒު ހުޅުއްވައިދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އިންޑިއާގެ އެކްސްޓަރނަލް އެފެއަރޒް މިނިސްޓަރ ޑރ. ސ.ޖައިޝަންކަރެވެ.

އައްޑޫގައި ޤާއިމްކުރި ޕޮލިސް އެކަޑަމީއަކީ ޒަމާނީ ވަސީލަތްތަކާއިއެކު ތަރައްގީކޮށްފައިވާ ފެސިލިޓީއެކެވެ. މިފެސިލިޓީގައި ކުރިއަށްގެންދިއުމަށް ފުލުހުންގެ ޚިދުމަތުން ރާވާފައިވާ ތަމްރީންތަކަކީ ޑިމޮކްރެޓިކް އުސޫލުތަކާއި ޒަމާނީ ބެސްޓް ޕްރެކްޓިސަސް ހިމަނައިގެން ކުރިއަށް ގެންދިއުމަށް ރޭވިފައިވާ ތަމްރީނުތަކެއްކަމަށް ފުލުހުން ވިދާޅުވެއެވެ. މި އެކަޑަމީ ހިންގާނީ ދިވެހި ސަރުކާރުގެ ފުރިހަމަ ކޮންޓްރޯލްގެ ދަށުންނެވެ.

ޕޮލިސް އެކަޑަމީއާއެކު ލިބޭނެ ފައިދާ:

ނޭޝަނަލް ކޮލެޖް އޮފް ޕޮލީސިންގ އެންޑް ލޯ އެންފޯސްމަންޓްގެ ސަބަބުން ފުލުހުންގެ ޚިދުމަތުގެ މުވައްޒަފުން ތަމްރީންކުރުމަށް އުމްރާނީ މަރުކަޒެއް ލިބުމުގެ އިތުރުން، މުޅި ދިވެހިރާއްޖެއަށް ހެޔޮ ބަދަލެއް އަންނަނެކަމަށް ފުލުހުން ވިދާޅުވެއެވެ. މިގޮތުން ލޯއެންފޯސްމަންޓުގެ ދާއިރާގެ ހުރިހާ މުއައްސަސާތަކަށްވެސް މިމަރުކަޒު މެދުވެރިކޮށް ތަމްރީނު ހިންގުމަކީ އޮތް ފުރުޞަތަކަށްވާތީ، ފުލުހުންގެ ބެލުމުގެ ދަށުން އެފަދަގޮތަކަށް ތަމްރީނުތައް ގެންދެވޭނެކަމަށް ފުލުހުން ވިދާޅުވެއެވެ. އަދި، ފުލުހުން މިހާރު ހިންގާ އެކަޑަމިކް ޕްރޮގްރާމްތަކަކީ ޕްރައިވެޓް ސެކްޓަރ އިން ހިންގާ ޕްރޮގްރާމުތަކާއި ތަފާތު، އިޖުތިމާއީ އިލުމުތަކާއި ބޮޑަށް ގުޅޭ ޕްރޮގްރާމުތައްކަމަށްވާތީ، މިފަދަ ޕްރޮގްރާމުތަކަކީ އައްޑޫ ސިޓީގެ ޒުވާނުންނަށްވެސް އާ ދާއިރާތަކަކުން ޑިޕްލޮމާ، ޑިގްރީ އަދި މާސްޓަރސް ފެންވަރުގެ ޕްރޮގްރާމުތަކުން ފުރުޞަތުލިބުމުގެ މަގުތަނަވަސް ވެގެންދާނެކަމަށް ފުލުހުން ވިދާޅުވެއެވެ. މީގެ އިތުރުން އައްޑޫސިޓީގައި ގިނަ ފުލުހުންތަކެއް ޤާއިމުވެ ތިބުމުން އައްޑޫގެ އިގުތިސާދަށާއި ސަލާމަތާއި ރައްކާތެރިކަން ވަރުގަދަވެގެންދާނެކަމަށާ، ހަމައެހެންމެ މި މަރުކަޒަކީ ޒަމާނީ ޓެކްނޮލޮޖީތަކާއިއެކު ބޭރުގެ ޝަރަފުވެރި ޔުނިވަރސިޓީ އެކަޑަމީތަކުން ހިންގާ ވޮކޭޝަނަލް، ޕްރޮފެޝަނަލް، ސްޕެޝަލައިޒް ޕްރޮގްރާމްތައް ހިންގޭނެ ތަނެއްކަމަށް ފުލުހުން ވިދާޅުވެއެވެ.

ރައީސުލްޖުމްހުރިއްޔާގެ ކެމްޕެއިން ވައުދުގެ ތެރޭގައި ފުލުހުންގެ ތަމްރީނުއަށް ޚާއްސަ އަހަމިއްޔަތުކަމެއް ދެއްވާނެކަމަށް ވިދާޅުވެފައިވެއެވެ. އެހެންކަމުން، މީހުން ދިރިއުޅޭ ހުރިހާ ރަށްތަކެއްގައި ފުލުހުންގެ ޚިދުމަތް ގާއިމް ކުރުމަށް ވެވަޑައިގެންފައިވާ ވައުދު ފުރިކަމަކުރުމަށްޓަކައި ކުރިއަށް އެޅޭ މުހިއްމު އެއް ފިޔަވަޅަށް މިމަރުކަޒު ވެގެންދާނެއެވެ.

މަޝްރޫޢުގެ ތަފްސީލް:

ނޭޝަނަލް ކޮލެޖް އޮފް ޕޮލީސިންގ އެންޑް ލޯ އެންފޯސްމަންޓް އަކީ 2009 އިންޑިއާ ސަރުކާރުގެ ހިލޭ އެހީގެ މަޝްރޫއެއްގޮތުގައި ކުރިއަށްދން ނިންމި މަޝްރޫޢުއެކެވެ. މިމަޝްރޫއުގެ މަޝްވަރާތައް 2012 ވަނަ އަހަރުގެ ސެޕްޓެމްބަރ މަހު ނިންމާލުމަށްފަހު އެކި އަހަރުތަކުގައި އެކި ތަންތަނުގައި އެޅުމަށް މި މަޝްރޫޢުގެ ޑިޒައިނަށާއި، ކޮންސެޕްތަށް ބަދަލު ގެނެސްފައިވެއެވެ. ނަމަވެސް މި މަޝްރޫޢު އައްޑޫ ސިޓީގައިި ހިންގަން ހަމަޖައްސައި އެކަމުގެ ޢަމަލީ މަސައްކަތް ފަށާފައިވަނީ 25 ޖުލައި 2017ގައެވެ.

އިންޑިއާ ސަރުކާރުގެ އެހީގެ ދަށުން ޤާއިމްކުރި މި މަރުކަޒު ޤާއިމްކުރުމަށް 30 މިލިއަން އެމެރިކާ ޑޮލަރު ޚަރަދުކޮށްފައިވެއެވެ. އަދި ދިވެހި ސަރުކާރުގެ ފަރާތުން މި މަޝްރޫޢު ކުރިއަށް ގެންދިއުމަށް ބޭނުންވާ ކަންކަން ހަމަޖެއްސުމަށް ގާތްގަނޑަކަށް 15 މިލިއަން ރުފިޔާ ޚަރަދުކޮށްފައިވެއެވެ.

ކޮންމެ ގައުމެއްގެ ޕޮލިސް އެކަޑަމީއަކީ އެގައުމެއްގެ ފުލުހުންގެ އިދާރާތަކުގެ އެންމެ އަސާސީ އެއް މަރުކަޒެވެ. އެމަރުކަޒުން ތަމްރީނުކުރެވިގެން މަސައްކަތުގެ މައިދާނަށް ނެރޭ މުވައްޒަފުންގެ ގާބިލުކަން ކަށަވަރުކުރުމަށްޓަކައި އޮތް ނިޒާމެކެވެ. އެހެންކަމުން ފާއިތުވި 18 އަހަރު ފުލުހުން ތަމްރީނު ދިނުމަށް ކުރަމުންއައި ދަތިތަކަށް ސަރުކާރުން ނިންމުން ގެނެސްދެއްވާފައިވާކަމަށް ފުލުހުން ޚިދުމަތުން ވިދާޅުވެއެވެ.