ފެބްރުއަރީ މަހު އިމްޕޯޓް އެކްސްޕޯޓް އަދި އިމްޕޯޓް އެކްސްޕޯޓުން ދައުލަތައް ލިބުނު އާމްދަނީވެސް އިތުރުވެއްޖެއެވެ.
މޯލްޑިވްސް ކަސްޓަމްސް ސަރވިސްގެ ތަފާސްހިސާބުތައް ދައްކާގޮތުން މިއަހަރުގެ ފެބްރުއަރީ މަހު އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ 2021ވަނަ އަހަރުގެ ފެބްރުއަރީ މަހާ އަޅާބަލާއިރު %27 ވަނީ އިތުރުވެފައެވެ. 2021ވަނަ އަހަރުގެ ފެބްރުއަރީ މަހު 256 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ ފެބްރުއަރީ މަހު މި ޢަދަދުވަނީ 325 މިލިއަން ރުފިޔާއަށް އިތުރުވެފައެވެ.
މިއަހަރުގެ ފެބްރުއަރީމަހު ރާއްޖެއަށް 3.8 ބިލިއަން ރުފިޔާގެ މުދާ އިމްޕޯޓް ކުރިއިރު 2021ވަނަ އަހަރު ރާއްޖެއަށް އިމްޕޯޓްކޮށްފައިވަނީ 2.7 ބިލިއަން ރުފިޔާއެވެ. މިއީ %39ގެ އިތުރުވުމެކެވެ.
ރާއްޖެއިން އެކްސްޕޯޓްކުރި އަދަދަށް ބަލާއިރު އެކްސްޕޯޓުންވެސް ވަނީ %29 ކުރިއެރުމެއް ހޯދާފައެވެ. މިއަހަރުގެ ފެބްރުއަރީމަގު ރާއްޖެއިން 309 މިލިއަން ރުފިޔާގެ މުދާ ވަނީ އެކްސްޕޯޓްކޮށްފައެވެ. މިދިޔަ އަހަރު މިއަދަދު އުޅުނީ 239 މިލިއަނުގައެވެ.
ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ އޮމާން ، ޔޫ.އޭ.އީ، އިންޑިއާ އަދި ޗައިނާ، އެވެ. އޮމާން އިން 621 މިލިއަން ރުފިޔާގެ މުދާ އެތެރެކޮށްފައިވާއިރު، ޔޫ.އޭ.އީ އިން 613 މިލިއަން ރުފިޔާގެ މުދާ ވަނީ އެތެރެކޮށްފައެވެ. މީގެއިތުރުން އިންޑިއާ އިން 509 މިލިއަން ރުފިޔާގެ މުދާ އަދި ޗައިނާ އިން 442 މިލިއަން ރުފިޔާގެ މުދާ ފާއިތުވި މަހު ވަނީ އެތެރެކޮށްފައެވެ.
އެކްސްޕޯޓަށް ބަލާއިރު ރާއްޖެއިން އެންމެ ގިނައިން މުދާ އެކްސްޕޯޓްކޮށްފައިވަނީ ތައިލޭންޑަށެވެ. އެއީ އެކްސްޕޯޓްގެ %56އެވެ. އިނގިރޭސިވިލާތް، ޖަރުމަނުވިލާތް، އިންޑިއާ އަދި ފަރަންސޭސިވިލާތައްވެސް ރާއްޖެއިން ވަނީ މުދާ އެކްސްޕޯޓްކޮށްފައެވެ.