ރާއްޖެއިން ބޭރުގައި ހިނގަމުންދިޔަ ހަނގުރާމައެއްގައި ބައިވެރިވުމަށް ގޮސް އުޅުމުގެ ތެރޭގައި ހާލުގައި ޖެހިގެން ރާއްޖެ ގެނައި އާއިލާ، އިދާރީ ބަންދެއްގައި ބޭތިއްބުމަށް ކްރިމިނަލް ކޯޓުން ޢަމުރުކޮށްފިއެވެ.
ކްރިމިނަލް ކޯޓުން މިޢަމުރު ނެރެފައިވަނީ ޓެރަރިޒަމް މަނާކުރުމުގެ ޤާނޫނުގެ ދަށުން އެކުލަވާލާފައިވާ ދިވެހިރާއްޖެއަށް އަނބުރާ އަންނަ ދިވެހި ހަނގުރާމަވެރިންނާމެދު ޚާއްޞަ އިޖުރާއަތަކަށް އަމަލުކުރުމުގެ ޤަވާއިދުގެ ދަށުންނެވެ. ރާއްޖެއިން ބޭރުގައި ހިނގަމުންދާ ހަނގުރާމަތަކުގެ ތެރެއިން ހަނގުރާމައެއްގައި ބައިވެރިވުމަށް ފިލައިގެން ދިއުމަށްފަހު ޙާލުގައި ޖެހިފައިވަނިކޮށް ރާއްޖެ ގެނައި އެ އާއިލާގައި ހިމެނެނީ 33 އަހަރުގެ އަންހެނަކާއި އޭނާގެ 18 އަހަރު ނުފުރޭ 4 ދަރިންނެވެ. އެ އަންހެން މީހާ މީގެ އަހަރުތަކެއް ކުރިން ހަނގުރާމައަށް ދިޔައީ އޭނާގެ ފިރިމީހާއާއި ދެ ދަރިން ގޮސްވައިގެންނެވެ. އޭނާ ހަނގުރާމައަށް ގޮސް ހުއްޓާ ވަނީ އިތުރު 2 ކުދިން ލިބިފައެވެ. އަންހެން މީހާ ކޯޓުގައި ބުނެފައިވަނީ އެއީ އޭނާގެ ހަލާލު ކުދިންކަމަށެވެ.
އެމީހުން ރާއްޖެ ގެނައުމާއި ގުޅޭގޮތުން ހޯމް މިނިސްޓްރީން ވިދާޅުވެފައިވަނީ މީގެ އަހަރުތަކެއް ކުރިން ރާއްޖެއިން ބޭރުގެ ހަނގުރާމަވެރި ސަރަޙައްދުތަކަށް ދަތުރުކޮށްފައިވާ ދިވެހި ފިރިހެނުންނާއެކު ދަތުރުކުރި އެމީހުންގެ އަނބިންނާއި އެފަދަ އާއިލާތަކަށް ނިސްބަތްވާ ކުޑަކުދިން، ހަނގުރާމާގައި ހާލުގައި ޖެހިފައިވާ މީހުން ބަލަހައްޓާ ކޭމްޕުތަކާއި އެފަދަ އެހެންތަންތަނުގައި ހާލުގައި ޖެހި ފުރާނަޔަށް ނުރައްކާވާ ޙާލަތަށް ގޮސްފައިވާ ކަމުގެ ޝަކުވާ ދިވެހި ސަރުކާރަށް ލިބިފައިވާކަމަށެވެ.
އެފަދަ މީހުން ނިސްބަތްވާ އާއިލާތަކުގެ ފަރާތުން ރައީސުލްޖުމްހޫރިއްޔާގެ އަރިހަށާއި، ސަރުކާރުގެ ކަމާގުޅުންހުރި ތަފާތު އިދާރާތަކަށް އެފަދަ ޝަކުވާ ކުރަމުންދާކަމަށް އެމިނިސްޓްރީން ވިދާޅުވެފައިވެއެވެ. މިފަދަ މައްސަލަތަކަށް އެކަށީގެންވާ ޙައްލެއް ހޯދުމަކީ ސަރުކާރުގެ ރިޔާސީ ވަޢުދަކަށް ވާތީ ވޭތުވެދިޔަ ދުވަސްތަކުގައި މި މައްސަލަ ޙައްލުކުރުމަށް ސަރުކާރުން މުހިންމު ގިނަ މަސައްކަތްތަކެއް ކޮށްފައިވާނެކަމަށްވެސް ހޯމްމިނިސްޓްރީން ވިދާޅުވެފައިވެއެވެ.
ރާއްޖެއިން ބޭރުގައި ހިނގަމުންދާ ހަނގުރާމަތަކުގެ ތެރެއިން ހަނގުރާމައެއްގައި ބައިވެރިވުމަށް ފިލައިގެން ދިއުމަށްފަހު ޙާލުގައި ޖެހިފައިވަނިކޮށް ރާއްޖެ ގެނައި އާއިލާ އިދާރީ ބަންދެއް ބެއިތިއްބުމަށް ކްރިމިނަލް ކޯޓުން ޢަމުރުކޮށްފައިވާއިރު، ހަނގުރާމަވެރި ސަރަހައްދަކަށް އުފަންވި ދެ ކުއްޖަކު އެއީ ދިވެހިންކަމަށް ފެމިލީ ކޯޓުން މިއަހަރުގެ ޖެނުއަރީ މަހު ވަނީ ކަނޑައަޅާފައެވެ. އެ ދެ އަންހެން ކުދިންނަކީ ހަނގުރަމަވެރި ސަރަހައްދުގައި އުޅުނު ދިވެހި އަންހެންމީހާގެ ދަރިކަން ފެމިލީކޯޓުން ކަނޑައެޅީ އެ ދެކުދިންގެ ޑީއެންއޭއާއި، އަންހެން މީހާގެ ޑީއެންއޭއާ އަޅާކިއުމަށްފަހުއެވެ. އަދި ދިވެހި ފުލުހުން ހަދާފައިވާ މެޓާނިޓީ ޑީއެންއޭ ތަހްލީލް ރިޕޯޓަށްވެސް ރިޔާއަތްކޮށްފައިވާކަމަށާ، އެ ރިޕޯޓް އެކުލަވާލި މީހާގެ ހެކިބަހާއި އެނޫންވެސް ހެކިތަކަށް ރިޔާޢަތްކޮށްފައިވާކަމަށްވެސް ފެމިލީ ކޯޓުން ވިދާޅުވެއެވެ.
މިފަދަ ޢާއިލާތައް ރާއްޖެ ގެނައުމުގައި ސަރުކާރުން އެންމެ ބޮޑު އިސްކަމެއްދެނީ ދިވެހިރާއްޖޭގެ ދާޚިލީ ސަލާމަތާއި ރައްކާތެރިކަން ކަށަވަރުކުރުމަށާއި، ދިވެހިރައްޔިތުންގެ އަސާސީ އިންސާނީ ޙައްޤުތައް ކަށަވަރުކުރުމަށްކަމަށްވެސް ހޯމް މިނިސްޓްރީން ވިދާޅުވެއެވެ. އެކިސަބަބުތަކާ ހުރެ މުޖުތަމަޢުން ހަވާސާވެފައިވާ ފަރާތްތައް ޤާނޫނުތަކާއި ބައިނަލްއަޤުވާމީ މިންގަނޑުތަކާ އެއްގޮތްވާގޮތުގެ މަތިން، އިސްލާހުކޮށް ޒިންމާދާރު ރައްޔިތުންގެ ގޮތުގައި އަނބުރާ މުޖުތަމަޢަށް ގެނައުމަކީ ސަރުކާރުގެ އަމާޒެއްކަމަށް ހޯމް މިނިސްޓްރީން ވިދާޅުވެއެވެ.