ސިފައިންނަށް ބޭނުންވާނެ ތަމްރީނު އިތުރަށް ފޯރުކޮށްދިނުމަށްޓަކައި ސިފައިންގެ ޓްރެއިނިންގ އިންސްޓިޓިއުޓް ކޮލެޖަކަށް ބަދަލުކުރުމާއި، އެތަނުގައި ރިސާރޗް އެންޑް ޑިވެލޮޕްމަންޓްގެ މަސައްކަތް ކުރެވޭނެ އިންތިޒާމުތައް ހަމަޖައްސަމުންދާކަމަށް ޑިފެންސް މިނިސްޓަރ ވިދާޅުވެއްޖެއެވެ.ރާއްޖޭ އިސްލާމްވި ދުވަހާއި ގުޅިގެން ރޭ ބޭއްވި ޖަލްސާގައި ވާހަކަފުޅުދައްކަވަމުން ޑިފެންސް މިނިސްޓަރ އާދަމް ޝަރީފް އުމަރު ވިދާޅުވީ ރާއްޖޭގެ ދިފާޢީ ކަންކަން ވަރުގަދަކުރުމަށްޓަކައި ސިފައިންނަށް ބޭނުންވާކަންކަން ތަރައްޤީކޮށް ކުރިއެރުވުމަށް ގިނަ މަސައްކަތެއް ކުރަމުންދާކަމަށެވެ. އެގޮތުން ސިފައިންގެ ހިންގުން ވަރުގަދަކޮށް ތަމްރީނުގޮތުން ސިފައިންނަކީ ޤާބިލް ބައެއްކަމަށް ހެދުމާއި ސިފައިންނަކީ ރާއްޖޭގެ ހުރިހާ ކަންކޮޅުތަކެއްގައި ހަރަކާތްތެރިވެވޭނެ ފަދަ ބަޔަކަށް ހެދުމުގެ ގޮތުން ސިފައިންނަށް ބޭނުންވާނެ ތަމްރީނު އިތުރަށް ފޯރުކޮށްދިނުމަށް ޓްރެއިނިންގ އިންސްޓިޓިއުޓް ކޮލެޖަކަށް ބަދަލުކޮށް، އެތަނުގައި ރިސާރޗް އެންޑް ޑިވެލޮޕްމަންޓްގެ ސެންޓަރެއް ޤާއިމުކުރުމުގެ އިންތިޒާމުތަކަށް މިއަހަރުތެރޭގައި މަސައްކަތް ކުރަމުންދާ ކަމަށެވެ.މިނިސްޓަރގެ ވާހަކަފުޅުގައި ސިފައިންގެ އަސްކަރީ ގޮތުން ވަރުގަދަ ކުރުމާއި ކުރިއެރުން ލިބޭނެގޮތްތަކެއް ފަހިކުރުމުގެ މަސައްކަތް ކުރަމުންދާ ކަމުގައި ވިދާޅުވިއެވެ. ރާއްޖޭގެ އެކި ހިސާބުތަކުގައި ސިފައިންގެ އަސްކަރިއްޔާ ވަރުގަދަކުރުމަށްޓަކައި އުތުރުގެ ކޮމާންޑް އޭރިއާ އިތުރަށް މުރާޖަޢާކުރުމަށްފަހު ހަނިމާދޫގައި ކޮމާންޑް އޭރިއާއެއް ޤާއިމުކުރުމުގެ މަސައްކަތް ކުރަމުންދާކަމަށް ވިދާޅުވިއެވެ. އުތުރުގެ 3 އަތޮޅަށް އަމާޒުކޮށްގެން ވަކި މަރުކަޒެއްގެ ގޮތުގައި ތަރައްޤީކުރާ ތަނުގައި، އަސްކަރީގޮތުން އެތަނަށް ބޭނުންވާ ވަސީލަތްތައް ހޯދުމުގެ މަސައްކަތް ކުރިއަށްދާކަމަށްވެސް މިނިސްޓަރ ވިދާޅުވިއެވެ.މީގެ އިތުރުން ސިފައިންނަށް ބޯހިޔާވަހިކަން ފޯރުކޮށްދިނުމަށްޓަކައި ފަށާފައިވާ މަޝްރޫޢުގެ މަސައްކަތް ހަލުވިކުރުމުގެ މަސައްކަތްތައް ކުރަމުންދާކަމުގައި މިނިސްޓަރ ވިދާޅުވިއެވެ. އަދި ދިވެހި ސިފައިންގެ ވެލްފެއަރގެ ކަންތައްތައް އިތުރަށް ތަރައްޤީކޮށް ކުރުމަށްޖެހޭ ކަންތައްތައް ކުރަމުންދާކަމަށް ޑިފެންސް މިނިސްޓަރ ވިދާޅުވިއެވެ.