ސިވިލް ކޯޓާއި، ކްރިމިނަލް ކޯޓަށް ފަނޑިޔާރުން ހޯދުމަށް
ޖުޑީޝަލް ސާރވިސް ކޮމިޝަން، ޖޭއެސްސީން އިޢުލާންކުރައްވައިފިއެވެ.
ޖޭއެސްސީން މިއަދު ކުރައްވާފައިވާ އިޢުލާންގައި ވަނީ ސިވިލްކޯޓާއި ކްރިމިނަލް
ކޯޓުގެ ތެރެއިން ކޮންމެ ކޯޓަކަށް 2 ފަނޑިޔާރުން ބޭނުންވާކަމަށެވެ. ފަނޑިޔާރުކަމަށް
ކުރިމަތިލައްވާ ފަރާތްތަކުގެ ޝަރުތުތަކުގެ ތެރޭގައި އުމުރުން 25 އަހަރުވެފައި
ވުމާއި، ފަނޑިޔާރުކަމުގައި ނުވަތަ ވަކީލުކަމުގައި މަދުވެގެން 2 އަހަރު ދުވަހުގެ
ތަޖުރިބާ ލިބިފައިވުމާއި، އިސްލާމީ ޝަރީއާ ނުވަތަ ޤާނޫނީ ރޮނގުން ފުރަތަމަ ޑިގްރީ ލިބިފައިވުން ހިމެނެއެވެ.
މުސާރައާއި އިނާޔަތާއިއެކު ސިވިލް ކޯޓްގެ ފަނޑިޔާރަކަށް ސާޅިސް ހަހާސް
ހަސަތޭކަ ފަންސާސް ރުފިޔާ ކަނޑައަޅާފައިވާއިރު، ކްރިމިނަލް ކޯޓްގެ ފަނޑިޔާރަކަށް މުސާރައާއި އިނާޔަތާއި އެކު ސާޅިސް އަށްހާސް
ތިންސަތޭކަ ރުފިޔާ ލިބޭނެއެވެ.
އަދި ރައްޔިތުންގެ މަޖިލީހުން ކަނޑައަޅާ އުސޫލެއްގެ މަތިން މެޑިކަލް
އިންޝުއަރެންސާއި ފޯން އެލަވަންސް ވެސް ކޮންމެ ފަނޑިޔާރަކަށް ލިބިދެވޭނެކަމަށްވެސް އިޢުލާންގައިވެއެވެ.
މީގެ އިތުރުން ހޯމަ ދުވަހު ވަނީ ހައިކޯޓަށްވެސް ފަނޑިޔާާރަކު ހޯދުމަށް އިޢުލާާންކުރައްވާފައެވެ.
ހައިކޯޓުގެ ފަނޑިޔާރަކަށް މޫސާރައާއި އިނާޔަތުގެ ގޮތުގައި ފަންސާސް ހަތަރުހާސް
ތިންސަތޭކަ ރުފިޔާ ކަނޑައަޅާފައިިވެއެވެ.