ކޮމަންޑޫ ދާއިރާގެ ބައި އިލެކްޝަންގައި 7 ވޯޓު ފޮށި ބެހެއްޓުމަށް ނިންމައި، ވޯޓުލުމަށް ރަޖިސްޓަރީ ކޮށްފައިވާ ފޮށީގެ މަޢުލޫމާތު ޢާންމުކުކޮށް، ޝަކުވާ ހުށަހެޅުމުގެ ފުރުޞަތު ހުޅުވާލައިފިއެވެ.
އިލެކްޝަންސް ކޮމިޝަނުން މީގެ ކުރިން ނިންމާފައިވަނީ ކޮމަންޑޫ ދާއިރާގެ އިންތިޚާބުގައި 6 ފޮށި ބެހެއްޓުމަށެވެ. ނަމަވެސް ކޮމަންޑޫ ދާއިރާގެ ވޯޓު ލިބުމުގެ ހައްގު ލިބިގެންވާ މީހުންގެ ފައިނަލް ލިސްޓާއިއެކު، ވޯޓު ލެވޭނެ ފޮށިތައް އެނގޭނެހެން އާންމުކުރި ލިސްޓުގައި ވޯޓު ފޮއްޓެއް އިތުރުވެފައިވަނީ މާލެ ސަރަހައްދުގައެވެ. މާލެ ސަރަހައްދަށް ފޮއްޓެއް އިތުރުވެފައިވަނީ ރީ-ރަޖިސްޓްރީ ވުމަށް ހުޅުވާލި ފުރުސަތުގައި ރަޖިސްޓްރީ ކުރި މީހުންގެ ނިސްބަތަށް ބެލުމަށް ފަހުއެވެ.
މިހާރު ބެހެއްޓުމަށް ނިންމާފައިވާ ވޯޓު ފޮށީގެ ތަފްސީލް:
– ށ. ފޯކައިދޫ ސްކޫލް – 2 ފޮށި
– ށ. މަރޮށި އިޖުތިމާއީ މަރުކަޒު – 1 ފޮށި
– ށ. އަތޮޅު ތައުލީމީ މަރުކަޒު (ކޮމަންޑޫ) – 1 ފޮށި
- ށ. ކޮމަންޑޫ ޕްރީސްކޫލް – 1 ފޮށި
- އިސްކަންދަރު ސްކޫލް – 2 ފޮށި
ކޮމަންޑުއާއި ފޯކައިދޫ އަދި މަރޮށި ހިމެނޭ މި ދާއިރާގައި 3،309 މީހުންނަށް ވޯޓްލުމުގެ ހައްޤު ލިބިގެންވެއެވެ. ކޮމަންޑޫ ދާއިރާގެ އިންތިޚާބު އޮންނާނީ އަންނަ މަހުގެ 5 ވަނަ ދުވަހުއެވެ.