އައު އަހަރަކަށް ދިވެހިން
ކުރިމަތިލާއިރު، ދިވެއްސަކަށްވީތީ ފަޚުރުވެރިވެ، ދިވެހި ޤައުމު ދެކެ ލޯބިވުން
އިތުރުކުރުމުގެ އަޒުމްއާކޮށް، ވަރުގަދަކޮށް ރާއްޖޭގެ ތަރައްޤީގެ ދުވެލި
އަވަސްކުރުމަށް ޢަޒުމް ކަނޑައެޅުމަށް، ރައްޔިތުންގެ މަޖިލީހުގެ
ރައީސް ޢަބްދުﷲ މަސީޙު މުޙައްމަދު އެދިވަޑައިގެންފިއެވެ. އެމަނިކުފާނު މިކަމަށް
އެދިވަޑައިގެންނެވީ މީލާދީ އައު އަހަރުގެ މުނާސަބަތުގައި ދެއްވި ޚާއްސަ
މެސެޖުގައެވެ.
މިމެސެޖުގައި މަޖިލީހުގެ ރައީސް ވިދާޅުވީ، އިސްލާމްދީނުގެ މަތިވެރި ޢުޞޫލުތަކުގައި
ފައިތިލަ ސާބިތުކޮށް ކުރިއަށް ދިއުމުގެ ޢަޒުމް ކަނޑައަޅަންޖެހޭކަމަށެވެ.
އިޤްތިޞާދީ އަދި އިޖުތިމާޢީ ގޮތުން ރާއްޖެ ކުރިއަރުވައި ތަރައްޤީކުރުމުގައި ފަރުދީ
ހިއްސާ އިތުރުކޮށް، ފަރުދީ ޒިންމާ އިސްކުރުމުގެ ޢަޒުމް އާކުރަންޖެހޭކަން
ފާހަގަކުރައްވާ މަޖިލީހުގެ ރައީސް ވިދާޅުވީ، ދިވެހި ޤައުމު ރީތި
ދިވެހިރާއްޖެއެއްގެ ގޮތުގައި ދެމެހެއްޓުމުގެ އަޒުމް އާކުރަންޖެހޭކަމަށެވެ.
ތަހުޒީބީ މުޖުތަމަޢުއެއްގައި ގެނެވޭ ކުރިއެރުމާއި ތަރައްޤީގެ ކުލަތަކާއި ރަހަތައް
ޙިއްސާކުރުމުގެ ޢަޒުމް އާކުރަންޖެހޭކަން ފާހަގަކުރައްވާ، އެކުވެރިކަމާއި
އެއްބައިވަންތަކަމުގެ ރޫޙު އާލާކޮށް ދެމެހެއްޓުމުގެ އަޒުމް ވަރުގަދަކުރުމަށް
އެދިވަޑައިގެންނެވިއެވެ.
މިކަންކަން ކުރުމުގެ ޢަޒުމް
އާކުރާއިރު، ރައްޔިތުންގެ މަޖިލީހުގެ ދައުރު ސާބިތުކަމާއިއެކު އަދާކުރުންމަތީ
ދެމިއޮންނާނެކަމަށް މަޖިލީހުގެ ރައީސް ވިދާޅުވިއެވެ. ދިވެހިރާއްޖޭގެ ޑިމޮކްރަސީ
ހަރުދަނާކޮށް ރައްޔިތުންނަށް ބޭނުންވާ ޤާނޫނުތައް ވުޖޫދަށް ގެނެސް ސަރުކާރާއި
ދައުލަތުގެ މުއައްސަސާތައް ޒިންމާދާރު ކުރުމުގެ ދައުރު އަދާކުރަމުން
ގެންދަވާނެކަމުގެ ޔަޤީންކަން ރައްޔިތުންގެ މަޖިލީހުގެ ރައީސް ވަނީ ދެއްވާފައެވެ.