ކަނޑައިގެން ގޮސްފައިވާ 4 އޮއިވާލި ކަނދުފައްޗެއް ހަރުކުރުމުގެ މަސައްކަތް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ފަށައިފިއެވެ.
1981ވަނަ އަހަރުން ފެށިގެން ސަރުކާރުން ގެންދަނީ ރާއްޖޭގެ އެކި ކަންކޮޅުތަކުގައި އޮއިވާލި ކަނދުފަތި އަޅުއްވަމުންނެވެ. މިއީ މަސްވެރިން ތެލަށް ކުރާ ޚަރަދު ކުޑަކުރުމަށް ސަރުކާރުން ކުރައްވަމުން އަންނަ މުހިންމު މަސައްކަތެކެވެ. އަދި ކަނދުފަތީގެ ސަބަބުން މަސްވެރިންނަށް ފަސޭހައިން މަސް ބޭނި އަދި ކާރުޚާނާތަކަށް ބޭނުންވާ މަސް ޤަވާޢިދުން ލިބެމުންދާނެކަމުގެ ޔަޤީންކަން ލިބެއެވެ.
ކެނޑިފައިވާ ހއ.ފިއްލަދޫ، މ.މަޑުއްވަރި، ދ.ހުޅުދެލި، ގއ.ދެއްވަދޫ އަދި ފުވައްމުލަކު ސިޓީގެ ދޮށީ މަސްވެރިންނަށް #ދޮށިމަސްކަނދު އެޅުމުގެ ދަތުރު ފިޝަރީޒްގެ #ކަނދުފަތިޓީމު އިން މިއަދު ފަށާފި. މިދަތުރުގައި ހއ. މުޅަދޫ ފުށޮޅުގައި #ވަދުމަސްކަދު ވެސްއަޅާނެ. @MoFMRAmv pic.twitter.com/SbdqgMXQlk
— Hussain R. Hassan (@DrHussainHassan) December 29, 2021
ރާއްޖޭގެ އެކި ސަރަހައްދުތަކުގައި އަޅާފައިވާ ބައެއް ކަނދުފަތި ކަނޑައިގެންގޮސް ހަލާކުވުމުން އެތަކެތި މަރާމާތުކުރުމުގެ މަސައްކަތް އަބަދުވެސް ފިޝަރީޒް މިނިސްޓްރީން އަންނަނީ ކުރައްވަމުންނެވެ. މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ.ހުސައިން ރަޝީދު ހަސަން ވިދާޅުވީ، ދޮށީގެ މަސްވެރިކަމަށް އަޅާފައިވާ މަސްކަނދުފަތި ކެނޑިފައިވާ 4 ސަރަހައްދެއްގައި އެ ކަނދުފަތިތައް ހަރުކުރުމުގެ މަސައްކަތް ކުރައްވަމުންދާކަމަށެވެ. އެއީ ހއ.ފިއްލަދޫ، މ.މަޑުއްވަރީ، ދ.ހުޅުދެލި، އަދި ގއ.ދެއްވަދޫއެވެ. މީގެއިތުރުން މި ދަތުރުގައި މިނިސްޓްރީގެ ޓީމުން ހއ.ފުޅަދޫ ފުށޮޅުގައި ވަދުމަސްވެރިކަމަށް ކަދުފައްޗެއް އެޅުމުގެ މަސައްކަތްވެސް ކުރާނެއެވެ.
މިހާރު ރާއްޖޭގެ ވަށައިގެން 56 ކަނދުފަތީގެ ވިއުގައެއް އެބައޮތެވެ. އަދި އަންނައަހަރު ކަނދުފަތީގެ ވިއުގައަށް އިތުރު 30 ކަނދުފަތި އިތުރުކުރައްވާނެކަމަށް ފިޝަރީޒް މިނިސްޓްރީން ވިދާޅުވެއެވެ. ދޮށީގެ މަސްވެރިކަމަށް އަޅާފައިވާ ކަނދުފަތިތަކަކީ 15 މޭލާއި 20 މޭލާ ދޭތެރޭގައި އަޅާފައިވާ ކަނދުފަތިތަކެކެވެ.