ކޯވިޑް-19ގެ ސަބަބުން ދިވެހި ވިޔަފާރިތަކަށް ލިބުނު ގެއްލުމުން އަރައިގަތުމަށް މި ސަރުކާރުން 948 މިލިއަން ރުފިޔާ ދޫކޮށްފައިވާކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، 23 ރަށެއްގައި ފެނާއި ނަރުދަމާ ނިޒާމުގެ ޤާއިމުކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
މިނިސްޓަރ އިބްރާހީމް އަމީރު ވިދާޅުވީ، 2019ވަނަ އަހަރުގެ ތެރޭގައި ސަރުކާރުގެ މަސައްކަތްތައް ރާވައި ގިނަ ކަންކަން ފަށައިގަނެވިފައިވަނިކޮށް، ހުރިހާ ކަމެއް ބަދަލުވީ 2020ވަނަ އަހަރުގެ ކުރީކޮޅު މުޅި ދުނިޔެ ކުރިމަތިލާންޖެހުނު ކޯވިޑް-19ގެ ބަލިމަޑުކަމާއެކުގައިކަމަށެވެ. 2020ވަނަ އަހަރު ރާއްޖޭގެ ބޯޑަރު ބަންދުކުރަންޖެހި، އާންމު ދިރިއުޅުމަށް ބޮޑެތި ބަދަލުތައް ގެންނަންޖެހުނުކަން މިނިސްޓަރ ފާހަގަކުރެއްވިއެވެ. 2020ވަނަ އަހަރު އިގުތިސާދު %33.5އިން ދަށަށްދިޔަކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އިޤްތިސާދު މަޑުޖެހި، ދައުލަތުގެ އާމްދަނީ މަދުވެގެންދިޔަ ވަގުތު، ބެލީ ދަރަނި ނަގައިގެން ނަމަވެސް އިޤްތިސާދު ހިފަހައްޓާ އިޖުތިމާއީ ރައްކާތެރިކަމާއި ރައްޔިތުންގެ ސިއްހަތު ކަށަވަރުކުރެވޭތޯކަމަށެވެ. އެގޮތުން އިންކަމް ސަޕޯޓް އެލަވަންސްގެ ގޮތުގައި 22،946 މީހަކަށް 421 މިލިއަން ރުފިޔާ ވަނީ ދޫކޮށްފައިކަމަށް މިނިސްޓަރ ވިދާޅުވިއެވެ. ގޭބީސީތަކަށް ފަސޭހަކޮށްދިނުމަށް 110،966 ގޭބީސީއަކަށް ފެން ބިލުން ޑިސްކައުންޓްދީ، 276،203 ގޭބީސީއަކަށް ކަރަންޓު ބިލުން ޑިސްކައުންޓްދީފައިވާކަމަށް މިނިސްޓަރ ވިދާޅުވިއެވެ. އަދި ވިޔަފާރިތަކަށްވެސް ލޯނު އެހީދީފައިވާކަމަށް މިނިސްޓަރ ފާހަގަކުރެއްވިއެވެ.
"ރާއްޖޭގެ ވިޔަފާރިތަކަށް، ދިވެހިން ވަޒީފާގައި ބޭތިއްބުމަށް ޝަރުތުކޮށް، އެތަކެއް ސަތޭކަ މިލިއަން ރުފިޔާގެ ލުއި ލޯނު ފޯރުކޮށްދިނިން. މިގޮތުން ކުދި އަދި މެދުފަންތީގެ ވިޔަފާރިތަކަށް އެސްޑީއެފްސީ މެދުވެރިކޮށް 362 މިލިއަން ރުފިޔާ ވާނީ ދޫކޮށްފައި. އަދި ބޮޑެތި ވިޔަފާރިތަކަށް ބޭންކް އޮފް މޯލްޑިވްސް މެދުވެރިކޮށް ދޫކުރި ފައިސާގެ އަދަދު 586 މިލިއަން ރުފިޔާއަށް އަރާ." މިނިސްޓަރ އަމީރު ވިދާޅުވިއެވެ.
ސިއްހީ އަދި އިގުތިސާދީ ދާއިރާއަށް އިތުރު ޚަރަދުތައް ކުރަން ޖެހުނު ނަމަވެސް، 2020ވަނަ އަހަރު ދައުލަތުގެ ޖުމްލަ ޚަރަދު ބޮޑުތަނުން ކުޑަކޮށްފައިވާކަމަށް މިނިސްޓަރ ވިދާޅުވިއެވެ. ނަމަވެސް އިގުތިސާދު ހުއްޓި ދައުލަތުގެ ޢާމްދަނީ އަންދާޒާކުރި މިންވަރަށްވުރެ 50 އިންސައްތަ ދަށްވެގެންދިއަކަން މިނިސްޓަރ ވިދާޅުވިއެވެ. މިނިސްޓަރ ވިދާޅުވީ، ދަރަނި ނަގައިގެންވެސް ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމުގައި ދެމިތިބީ، އެނގިތިބެ، ދުރުރާސްތާގެ ޕްލޭނެއްގެ ތެރެއިން، ރައްޔިތުންގެ ފުދުންތެރިކަމާއި ދިވެހި އިގުތިސާދު ވީއެންމެ އަވަހަކަށް އާންމު ހާލަތަކަށް އަނބުރާ ގެނައުމުގެ ބޭނުމުގައިކަމަށެވެ.