ކޯވިޑްގެ ހާލަތުގައި ދަރަނި ނުނެގިނަމަ ރައްޔިތުންނަށް ދިމާވި ދަތި ހާލަތު ދިގުލައިގެން ދިޔައީސް ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ. މިނިސްޓަރ މިހެން ވިދާޅުވީ، 23 ރަށެއްގައި ފެނާއި ނަރުދަމާ ނިޒާމުގެ ޤާއިމުކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ކޯވިޑްގެ ހާލަތުގައި ރާއްޖޭގެ އިޤްތިޞާދު މަޑުޖެހުމުގެ ސަބަބުން އިޤްތިޞާދީ ހަރަކާތްތައް ނުހުއްޓި ކުރިއަށްގެންދިއުމަށްޓަކައި ސަރުކާރުން ވަނީ ލޯނު ނަގާފައިވާތީ ބައެއް ފަރާތްތަކުންވަނީ މިކަމަށް ފާޑުވެސް ކިއާފައެވެ.
ފިނޭންސް މިނިސްޓަރ އިބްރާހިމް އަމީރު ވިދާޅުވީ، އިޤްތިޞާދު މަޑުޖެހި ދައުލަތުގެ އާމްދަނީ މަދުވެގެން ދިޔަ ވަގުތުގައި ސަރުކާރުން ބެލީ ދަރަނި ނަގައިގެން ނަމަވެސް އިޤްތިޞާދު ހިފަހައްޓައި އިޖްތިމާއީ ރައްކާތެރިކަމާއި ރައްޔިތުން މިދަތި ހާލަތުން ވީއެންމެ އަވަހަށް ސަލާމަތްކުރެވޭތޯކަމަށެވެ. މިނިސްޓަރ ވިދާޅުވީ، ދަރަނި ނަގައިގެންވެސް ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމުގައި ދެމިތިބީ އެނގިތިބެ، ދުރުރާސްތާގެ ޕްލޭނެއްގެ ތެރެއިންކަމަށެވެ. އެއީ ރައްޔިތުންގެ ފުދުންތެރިކަމާއި ދިވެހި އިޤްތިޞާދު ވީއެންމެ އަވަހަކަށް އާންމު ހާލަތައް ގެނައުމުގެ ބޭނުމުގައިކަމަށެވެ. އިޤްތިޞާދީ ކާރިސާތަކުގައި ދަރަނި ނެގުމަކީ މުޅި ދުނިޔެ ބަލައިގަނެފައިވާ ކާމިޔާބު އުސޫލެއްކަން ފާހަގަކުރައްވައި މިނިސްޓަރ ވިދާޅުވީ، ދަރަނި ނުނެގިނަމަ އިޤްތިޞާދު ރަނގަޅުވާން ގިނަދުވަސް ނަގައި ރައްޔިތުންނަށް ދިމާވި ދަތިހާލަތު ރަނގަޅުވާން ގިނަ ދުވަސް ނެގީސްކަމަށެވެ.
"މިހާލަތުގައިވެސް ދަރަނި އިތުރުނުކުރުމަށް ވަކާލާތުކޮށް ބައެއް ފަރާތްތަކުން ވާހަކަދެއްކި. ނަމަވެސް އަޅުގަނޑު ޤަބޫލުކުރަނީ ހުރިހާ ދަރަންޏެއް އެއް މިންގަނޑަކުން ވަޒަންކުރުމަކީ އެންމެ ރަނގަޅުގޮތް ނޫންކަމަށް. އިޤްތިޞާދީ ފަހި ދުވަސްތަކުގައި ދަރަނި ދަށްކުރުމަށް މަސައްކަތްކުރުމަކީ އޮންނަކަމެއް. އަދި އިޤްތިޞާދީ ކާރިސާތަކުގެ ތެރޭގައި ދަރަނި ނަގައިގެންވެސް ޚަރަދުތައްކޮށް ސަރުކާރުން ފޯރުކޮށްދޭންޖެހޭ ޚިދުމަތްތަކަށް ބުރޫނާރައި ކުރިއަށްގެންދިއުމަކީވެސް ހާލަތުގެ ގޮތުން އެންމެ ރަނގަޅު މަގަށްވެގެންދޭ. މިއީ މުޅި ދުނިޔެ ބަލައިގަނެފައިވާ ކާމިޔާބު އުސޫލެއް. ކޯވިޑް19ގެ ހާލަތުގައި ދަރަނި ނަގައިގެން ކައުންޓަރ ސިކްލިކަލް ފިސްކަލް ޕޮލިސީއެއް ނުހިންގިނަމަ ދިވެހި އިޤްތިޞާދުގެ ހާލަތު ރަނގަޅުވާން ފަށަން ނަގާނެ ވަގުތު ބޮޑުތަނުން އިތުރުވީސް. އަދި ރައްޔިތުންނަށް ދިމާވި ދަތި ހާލަތުވެސް ދިގުލައިގެން ދިޔައީސް." މިނިސްޓަރ ވިދާޅުވިއެވެ.
ކޯވިޑްގެ ހާލަތުގައި ސަރުކާރުން ލޯނު ނެގިނަމަވެސް އިންޓަރނޭޝަނަލް މަނިޓަރީ ފަންޑުގެ ވޯލްޑް އައުޓްލުކްގެ ތަފާސް ހިސާބުތަކުންވެސް ދައްކާގޮތުން މިއަހަރު މުޅި ދުނިޔެއިން އެންމެ ބާރަށް ކުރިއަރާ 5 ޤައުމުގެ ތެރޭގައި ދިވެހިރާއްޖެ ހިމެނެއެވެ.
2022 ވަނަ އަހަރަށް ބަޖެޓް ތައްޔާރުކުރިއިރު 2021 ވަނަ އަހަރު ރާއްޖޭގެ އުފެއްދުންތެރިކަން 31.6 އިންސައްތަ ކުރިއަރާނެކަމަށް ބެލެވުނެވެ. ނަމަވެސް ރާއްޖޭގެ އިޤްތިޞާދަށް ލިބެމުންދާ ބޮޑެތި ކުރިއެރުންތަކާއިއެކު މިހާރު އަންދާޒާކުރެވެނީ މިއަހަރުގެ އުފެއްދުންތެރިކަން ކުރިއަރާނެ މިންވަރު 38.5 އިންސައްތައަށް އަރާނެކަމަށް ކަމަށް ފިނޭންސް މިނިސްޓްރީން ވިދާޅުވެއެވެ.