ރަޝިއާގެ ނޯޑް ވިންޑްގެ ދަތުރުތައް ރާއްޖެއަށް ފަށައިފިއެވެ. މިއެއަރލައިންގެ ދަތުރުތައް ރާއްޖެއަށް ފެށީ ރަޝިއާގައި ޓުއަރ އޮޕަރޭޓަރ ޚިދުމަތްދޭ ދިވެހި ކުންފުންޏެއް ކަމަށްވާ ރިސޯޓް ލައިފާއި ގުޅިގެންނެވެ.
ނޯޑް ވިންޑް އެއަރލައިންގެ ދަތުރުތައް ރާއްޖެއަށް ފެށީ ޗާޓަރު ދަތުރުތަކެއްގެ ގޮތުގައެވެ. މި އެއަރލައިންގެ ފުރަތަމަ ފްލައިޓް ރާއްޖެ އައިސްފައިވަނީ އާދިއްތަ ދުވަހުއެވެ.
ރަޝިއާގެ ނޯޑް ވިންޑްގެ ދަތުރުތައް ރާއްޖެއަށް ފެށުމަކީ އެ ޤައުމުން ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނެކަމެކެވެ. މިއީ ރާއްޖޭގެ ފަތުރުވެރިކަމުގެ އެންމެ ހައި ސީޒަންއެވެ. ރަޝިއާއަކީ މިހާރުވެސް ރާއްޖެއަށް ގިނަ އަދަދަކަށް ފަތުރުވެރިން އަންނަ ޤައުމެކެވެ. އެގޮތުން ރަޝިއާ ހިމެނެނީ މިހާރު ރާއްޖެއަށް 2 ވަނައަށް އެންމެ ގިނައިން ފަތުރުވެރިން އަންނަ ޤައުމެވެ. އެއީ 214،232 ފަތުރުވެރިންނެވެ.
މިދުވަސްވަރަކީ ރާއްޖޭގެ ފަތުރުވެރިކަމުގެ ޕީކް ސީޒަނަށް ވާއިރު ވަރަށް ގިނަ އެއަރލައިންތަކުން މިދުވަސްވަރު ދަނީ ރާއްޖެއަށް ދަތުރުކުރަމުންނެވެ. އެމްއޭސީއެލްގެ ތަފާސް ހިސާބުތައް ދައްކާގޮތުން ކޯވިޑުގެ ކުރިން އަންނަ ޗާޓަރު ފްލައިޓުގެ އަދަދާއި އަޅާ ބަލާއިރު، ޗާޓަރު ފްލައިޓުގެ އަދަދު މިހާރުވަނީ ދެގުނަ އިތުރުވެފައިވެއެވެ.
މިހާރު ރާއްޖެއަށް ގިނަ އަދަދެއްގެ ޕްރައިވެޓް ޖެޓްތައްވެސް ދަނީ އަންނަމުންނެވެ. މިއަހަރު ރާއްޖެއަށް 1.3 މިލިއަން ފަތުރުވެރިން އަންނާނެކަމަށް މިހާރު ޓޫރިޒަމް މިނިސްޓްރީން ވަނީ އަންދާޒާކޮށްފައެވެ.