އެންޓި-ކޮރަޕްޝަން ކޮމިޝަން، އޭސީސީގެ މެމްބަރުން ވަކިކުރުމަށް މިނިވަން މުއައްސަސާތަކުގެ ކޮމިޓީން ފާސްކޮށްފިއެވެ. މިގޮތަށް ފާސްވީ ކޮމިޓީއަށް ހާޒިރުވެ ތިއްބެވި 8 މެންބަރުންގެ ތެރެއިން 5 މެންބަރުންގެ އަޣްލަބިއްޔަތުންނެވެ.
އޭސީސީގެ މެންބަރުން ވަކިކުރުމަށް ގޮތެއް ނިންމުމަށް ބޭއްވި ކޮމިޓީގެ ބައްދަލުވުމުގައި ކޮމިޓީގެ ގިނަ މެންބަރުން ވިދާޅުވީ އޭސީސީއަށް ޖަވާބު ދާރީވުމަށް ފަސް ދުވަހުގެ މުއްދަތެއް ދިން ނަމަވެސް މެމްބަރުން ޖަވާބުދާރީވެފައިވަނީ އެމުއްދަތު ހަމަވިފަހުން ކަމަށެވެ. އަދި އޭސީސީގެ މެންބަރުން ކޮމިޓީއަށް ފޮނުއްވާފައިވާ ޖަވާބުގައި ފާހަގަކޮށްފައިވާ ގިނަ ކަންކަމަކީ މީގެ ކުރިންވެސް ކޮމިޓީއާއި ހިއްސާކޮށްފައިވާ ކަންތައް ކަމަށްވުމުން، އެއީ ގިނަ ހައްލުތަކެއް ހޯދައިދީފައިވާ ކަންކަން ކަމަށް މެންބަރުން ފާހަގަކުރެއްވިއެވެ. އެގޮތުން އޭސީސީއަށް އޮތް މުވައްޒަފުންގެ ދަތިކަމާއި، ބަޖެޓްގެ ދަތިކަމާއި، ޕީޖީއާމެދު އޮތް ނުތަނަވަސްކަމުގެ ވާހަކަތައް މެންބަރުން ފާހަގަކުރެއްވިއެވެ.
ކޮމިޓީގެ މެންބަރުން ވިދާޅުވީ އޭސީސީއަށް އައު މެންބަރުން ލެއްވިތާ 2 އަހަރާއި ބައި ފާއިތުވެގެން ދިޔައިރު ޖަވާބުދާރީވުމަށް އެކަށީގެންވާ ވަގުތު ދެވިފައިވާކަމަށެވެ. އެގޮތުން 9 ފަހަރެއްގެ މަތިން އޭސީސީގެ މެންބަރުން ކޮމިޓީއަށް ހާޒިރުކުރުމުން، އެ ކޮމިޝަންގެ މައްސަލަތައް ނިންމަން ކަނޑައަޅާފައިވާ މުއްދަތުތަކާއި މައްސަލަތައް ކޮމިޓީއާއި ހިއްސާކުރި ނަމަވެސް ކޮމިޓީން އެ މައްސަލަތައް ނިންމަންދިން މުއްދަތުގައިވެސް އެކަށީގެންވާ ކުރިއެރުންތަކެއް ކޮމިޝަނަށް ހޯދިފައިނުވާ ކަމަށް ކޮމިޓީގެ ގިނަ މެންބަރުން ފާހަގަކުރެއްވިއެވެ.
އޭސީސީގެ މެންބަރުން ވަކިކުރުމަށް ބޭއްވި ކޮމިޓީގެ ބައްދަލުވުމުގައި އިނގުރައިދޫ ދާއިރާގެ މެންބަރު ޙަސަން އަޙްމަދު ހުށައެޅުއްވި ހުށައެޅުމަށް ތާޢީދުކުރެއްވީ ބިލެތްދޫ ދާއިރާގެ މެންބަރު އަޙްމަދު ހަލީމްއެވެ. އަދި އެގޮތަށް ފާސްވީ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި 8 މެންބަރުންގެ ތެރެއިން 5 މެންބަރުންގެ އަޣްލަބިއްޔަތުންނެވެ.
އޭސީސީގައި މިހާރު ތިއްބެވި ތިން މެންބަރުން ވަކިކުރުމަށް ކޮމިޓީން ފާސްކޮށްފައިވާއިރު، އެ ތިން މެންބަރުންނަކީ ކޮމިޝަނުގެ ރައީސް މަރިޔަމް ޝިއުނާއާއި، ނާއިބު ރައީސް ފާޠިމަތު އަނޫލާގެ އިތުރުން މެންބަރު ޢާއިޝަތު ޢަބްދުﷲ އެވެ. އޭސީސީގެ މެންބަރުން ވަކިކުރުމުގެ މަސައްކަތް މަޖިލީހުން ފަށާފައިވަނިކޮށް އެކޮމިޝަންގައި ހިމެނިވަޑައިގަންނަވާ 2 މެންބަރަކު ވަނީ އިސްތިއުފާ ދެއްވާފައެވެ. އެއީ އިބްރާހީމް ޝަކީލް އާއި އަލީ އަޝްރަފްއެވެ.
އޭސީސީގެ މެންބަރުން ވަކިކުރުމަށް ކޮމިޓީން ނިންމި ނިންމުން ދެން ފޮނުވާނީ މަޖިލީހުގެ ތަޅުމަށެވެ. އަދި ތަޅުމުން މި މައްސަލައަށް ގޮތެއް ނިންމުމަށް ދައުރުން ބޭރުން ޖަލްސާއެއް ބާއްވަން ވަނީ ކަނޑައަޅަފައެވެ.