ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރާއި ގުޅުވައިގެން ބެނެލަކްސް ގައުމުތަކުން ނެރުނު ސްޓޭމްޕް ސެޓްތަކުގެ ސްވެނިއަރ ރާއްޖޭގެ ޓޫރިޒަމް މިނިސްޓްރީއަށް ހަދިޔާކޮށްފިއެވެ. މިއީ 3 ސްޓޭމްޕް ސެޓްގެ ސްވެނިއަރ ޕްލާކެކެވެ.
ޓޫރިޒަމް މިނިސްޓްރީން ވިދާޅުވީ، ފަތުރުވެރިކަމުގެ ރަން އަހަރުގެ ލޯގޯޖެހި ބެލްޖިއަމްގެ ސްޓޭމްޕްސެޓާއި، ނެދަލޭންޑުގެ ސްޓޭމްޕްސެޓާއި، ލަކްސަމްބަރގަގެ ސްޓޭމްޕްސެޓްގެ ސްވެނިއަރ 3 ޕްލާކް ޓޫރިޒަމް މިނިސްޓަރ އަބްދުﷲ މައުސޫމްއަށް އަރުވާފައިވާކަމަށެވެ. ބެނެލަކްސް އަކީ ބެލްޖިއަމްއާއި ނެދަލޭންޑާއި ލަކްސަމްބަރ ހިމެނޭ ސަރަޙައްދީ ކޯޕަރޭޝަނެކެވެ.
ބެނެލަކްސް ޤައުމުތަކުގެ އެތެރެވަރިއާއި އިންޓަނޭޝަނަލް ޕޯސްޓްގެ ޚިދުމަތަކުގައި މިހާރު ބޭނުންކުރަމުންދާ މި ޚާއްސަ ސްޓޭމްޕްސެޓްތަކަކީ "މޯލްޑިވްސް ބެނެލަކްސް ފްރެންޑްޝިޕް ސޮސައިޓީ"ގެ ފަރާތުން އެ ޤައުމުތަކުގެ ޕޯސްޓް އޮފީހާއި ބްރެސެލްސްގައި ހުންނަ ދިވެހިރާއްޖޭގެ ރޫރަޕިއަން ޔޫނިއަންސްގެ އެންބަސީއާއި ޓޫރިޒަމް މިނިސްޓްރީން ގުޅިގެން ނެރުނު ސްޓޭމްޕްތަކެކެވެ.
ފަތުރުވެރިކަމުގެ ރަން އަހަރާ ގުޅުވައިގެން އެމްޕީއެލްގެ ފަރާތުންވެސް ޚާއްސަ ސްޓޭމްޕް ސެޓަކާއި ސްވެނިއަރ ސެޓެއް އަންނަ ފެބްރުއަރީ މަހުގެ ތެރޭގައި ނެރުމަށް ވަނީ ހަމަޖެހިފައެވެ.