މޯލްޑިވްސް މެރިން އެކްސްޕޯއަކީ ރާއްޖޭގެ ބޯޓިން ސިނާއަތަށް ހާއްސަކޮށްގެން ބާއްވާ އިވެންޓެކެވެ. މިއަހަރު ބާއްވާފައިވަނީ މޯލްޑިވްސް މެރިން އެކްސްޕޯގެ 7 ވަނަ އެޑިޝަނެވެ.
މިއަހަރުގެ މެރިން އެކްސްޕޯގައި ބޯޓް ބިލްޑަރުން، ފިނޭންސް އަދި އިންޝުއަރެންސް ވިޔަފާރިތައް، ބޯޓުތަކަށާއި މަސްވެރިކަމަށް ބޭނުންވާ ސާމާނާއި މެރިން ފުޑްސް ސަޕްލަޔަރުން، ލޮޖިސްޓިކްސް، މެރިން ޓެކްނޮލޮޖީ، ފަޔާ ސޭފްޓީގެ ހިދުމަތްދޭ ވިޔަފާރިތައް ވަނީ ބައިވެރިވެފައެވެ.
ޕީއެސްއެމް ނިއުސްއަށް މައުލޫމާތުދެއްވަމުން ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސްގެ ރައީސް އަޙްމަދު އަފްރާހް ވިދާޅުވީ، ރާއްޖޭގައި މިވަގުތު ތިބި އެންމެ ބޮޑެތި މެރިން އުފެއްދުންތައް ވިއްކާ ފަރާތްތަކުން މިއަހަރުގެ މެރިން އެކްސްޕޯގައި ބައިވެރިވިކަމަށެވެ. އެމީހުންގެ އެންމެ ފަހުގެ އުފެއްދުންތައްވެސް މިއަހަރުގެ މެރިން އެކްސްޕޯގެ ތެރެއިން ލޯންޗްކޮށްފައިވާކަމަށެވެ.
"ކުރީފަހަރުތަކާއި ހިލާފަށް އަޅުގަނޑުމެން ވަރަށް ބޮޑުކޮށް މިފަހަރު މި ބާއްވަނީ. ކުރީ އެޑިޝަންތަކާއި ހިލާފަށް އަޅުގަނޑުމެން އަދި މިއަހަރު މެރިން ފުޑްސްގެ ގޮތުން ލޯކަލް މެނިފެކްޗަރ ހިމެނޭގޮތުން ލޯކަލް ކޮންޕޯނަންޓެއް އެބައިން. ދެން އަދި އޭގެ އިތުރުން މެރިން ރިލޭޑެޓް ވަރަށް މުހިންމު ޓޮޕިކްސްތަކަށް އެކްސްޕާޓުން ގެންނަވައިގެން ޕެނަލް ޑިސްކަޝަންތައްވެސް އެބަ ގެންދެވޭ" އަފްރާހް ވިދާޅުވިއެވެ.
މިއަހަރުގެ މެރިން އެކްސްޕޯ ބާއްވާފައިވަނީ ހުޅުމާލޭ ސެންޓްރަލް ޕާކުގައެވެ. މިއަހަރުގެ އެކްސްޕޯގައި 16 އަށްވުރެ ގިނަ އެގްޒިބިޓަރުން ވަނީ ބައިވެރިވެފައެވެ. މިއަހަރުގެ އެކްސްޕޯގައި ބައިވެރިވި ބައެއް އެގްޒިބިޓަރުން ބުނީ މިއީ ކާމިޔާބު އެކްސްޕޯއެއްކަމަށާއި ގިނަ ބަޔަކު އެމީހުންގެ ސްޓޯލްތަކަށް ޒިޔާރަތްކުރިކަމަށެވެ.
މިއަހަރުގެ އެކްސްޕޯގެ ތެރޭގައި މުހިންމު ބައެއް މައުސޫތަކަށް ވަނީ ޕެނަލް ޑިސްކަޝަންތައް ބާއްވާފައެވެ. އޭގެތެރޭގައި ލައިފް ޖެކެޓް އެޅުމާއި، މޫދަށް ކުނި އެޅުމުގެ ނުރައްކަލާއި، ކަނޑު އުޅަނދު ދުއްވާއިރު ސަލާމަތީގޮތުން ބަލަންޖެހޭ ކަންކަމާއި ގުޅޭގޮތުން ޕެނަލް ޑިސްކަޝަންތައް ވަނީ ބާއްވާފައެވެ.