ރާއްޖޭގައި ހިންގާ ވިޔަފާރިތަކުން އިންސާނީ ހައްގުތަކަށް އިހްތިރާމްކުރާ މިންވަރު ބެލުމަށްފަހު، ޚާއްޞަ އެވޯޑެއް ދިނުމަށް ހިއުމަން ރައިޓްސް ކޮމިޗަން އޮފް ދަ މޯލްޑިވްސް (އެޗްއާރުސީއެމް) އިން ނިންމައިފިއެވެ.
މި އެވޯޑް ދިނުމަށް ނިންމާފައިވާކަން އިއުލާންކުރީ އެޗްއާރުސީއެމްއަށް 18 އަހަރު ފުރުމާއި ބައިނަލްއަޤްވާމީ އިންސާނީ ހައްގުތަކުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައެވެ.
ވިޔަފާރިތަކުން އިންސާނީ ހައްގުތަކަށް ހުރުމަތްތެރިކޮށް ހިތާ މިންވަރު ބަލާ ވިޔަފާރިތައް ސެޓިފައިކޮށް އެވޯޑް ދިނުމަށް "ހިއުމަން ރައިޓްސް ސެޓިފިކޭޝަން އޮފް ބިޒްނަސް ޕްރޮގްރާމް"ގެ ނަމުގައި އެވޯޑެއް ދިނުމުގެ މަޤްޞަދަކީ ވިޔަފާރިތަކުން އިންސާނި ހައްގުތަކަށް އިހްތިރާމްކޮށް އިންސާނީ ހައްގުތައް ރައްކާތެރިކުރުމަށް ބާރުއެޅުންކަމަށް އެ ކޮމިޝަނުން ވިދާޅުވެއެވެ. އަދި ހައްގުތައް ކަށަވަރުކުރެވިފައިވާ މުޖުތަމައެއް ބިނާކުރުމަށް އެކޮމިޝަނުން ކުރާ ކަންކަމަށް ވިޔަފާރިތަކުގެ އެއްބާރުލުން އިތުރުކުރުކުރުމަކީވެސް އޭގެ މަޤްޞަދެއްކަމަށް އެޗްއާރުސީއެމްއިން ވިދާޅުވިއެވެ.
އެޗްއާރުސީއެމް އިން ވިދާޅުވީ، އެވޯޑް ދިނުމުގައި ވިޔަފާރިތަކުގައި ޖިންސީ ފުރައްސާރަކުރުމާއި ގޯނާކުރުމާއި ދެކޮޅަށް އުސޫލު އެކުލަވާލާއި ހުރުމާއި، ވިޔަފާރިތަކުގައި އެކުލަވާލާފައިވާ އުސޫލްތައް ދިރާސާކުރުމާއި، އެ ވިޔަފާރިއެއް ހިންގާ ތަނަށް ޒިޔާރަތްކުރުމާއި، މުވައްޒަފުންނާއި އިންޓަރވިއުކުރުމާއި، ކަސްޓަމަރުންގެ ޚިޔާލަށްވެސް ރިޔާއަތްކުރަނެކަމަށެވެ. އަދި އެ ކަންކަމަށް ބަލައި ޕޮއިންޓް ދޭ އުސޫލުން އެންމެ މަތީ އިންސައްތަ ހޯދާ ވިޔަފާރިތައް ތިން ފެންވަރަކަށް ސެޓިފައިކުރާނެކަމަށް އެޗްއާރުސީއެމްއިން ވިދާޅުވިއެވެ. އެގޮތުން އެވޯޑް ދިނުމަށް ކަނޑައަޅާފައިވަނީ ހިއުމަން ރައިޓްސް ސެޓިފައި ގޯލްޑް، ހިއުމަން ރައިޓްސް ސެޓިފައި ސިލްވަރ އަދި ހިއުމަން ރައިޓްސް ސެޓިފައި ބްރައުންޒް އެވޯޑެވެ.
އެޗްއާރުސީއެމްއިން ވިދާޅުވީ، ވިޔަފާރި ކުރާ ފަރާތަކުން އިންސާނީ ހައްގުތައް ނުގުޅައިގަނެފައިވާ މައްސަލައެއް ޝަރުއީ ކޯޓަކުން ސާބިތުވެއްޖެނަމަ އަދި އެޗްއާރުސީއެމ އިން އިސްނަގައިގެން މައްސަލައެއް ފާހަގަކުރެވިއްޖެނަމަ އެ ވިޔަފާރިއެއް ޑީ-ސެޓިފައިކުރެވޭކަމަށެވެ.
އެޗްއާރުސީއެމް އަށް 18 އަހަރު ފުރުމާއި ބައިނަލްއަޤްވާމީ އިންސާނީ ހައްގުތަކުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެޗްއާރުސީއެމްގެ ރައީސް މަރްޔަމް މުނާ ވިދާޅުވީ، އިންސާނީ ހައްގުތައް ކަށަވަރުކޮށްދެވޭނެ މާހައުލެއްގެ ތެރެއިން ވިޔަފާރީގެ މުއާމަލާތްތައް ހިންގުމަކީ ވިޔަފާރިތަކުން ސަމާލުވާންޖެހޭ މުހިންމުކަމެއްކަމަށެވެ. މުނާ ވިދާޅުވީ އިންސާނީ ހައްގުތައް ކަށަވަރުކުރުމުގައި ސަރުކާރާއި ރައްޔިތުންގެ މަޖިލީހުން ގެންގުޅޭ ސިޔާސަތުތައް އެކޮމިޝަނުން ބަލައިގަންނަކަމަށެވެ.
އެޗްއާރުސީއެމް އިން ވިދާޅުވީ، ރާއްޖޭގައި ވިޔަފާރިތަކާއި އިންސާނި ހައްގުތަކާއި ގުޅުންހުރި މައްސަލަތަކުގެ ތެރޭގައި، ވިޔަފާރިތަކުން ހިންގާ ބައެއް ޢަމަލުތަކުގެ ސަބަބުން ރާއްޖޭގެ ތިމާވެއްޓަށް ގެއްލުންތަކެއްވާކަމަށެވެ. އަދި މުވައްޒަފުންގެ ހައްގުތަކަށް އުނިކަން އަންނަ މައްސަލަތައްވެސް ފާހަގަކުރެވޭކަމަށް އެޗްއާރުސީއެމްއިން ވިދާޅުވިއެވެ.