ޑޮމެސްޓިކް ދަތުރުކުރާ ހުރިހާ އެއަރލައިންތަކުން 1 ގަޑިއިރަށްވުރެ ކުރު ދަތުރުތަކުގައި އެއްވެސް ކެއުމެއް އަދި ރިފްރެޝްމަންޓެއް ނުދިނުމަށް ސިވިލް އޭވިއޭޝަން އޮތޯރިޓީން އަންގައިފިއެވެ.
ސިވިލް އޭވިއޭޝަން އޮޓޯރިޓީން މިގޮތަށް އަންގާފައިވަނީ ކޯވިޑް19ގެ ހާލަތާއި ގުޅިގެންނެވެ.
މޯލްޑިވްސް ސިވިލް އޭވިއޭޝަން އޮޓޯރިޓީން ނެރެފައިވާ ސަރކިއުލާގައި ވަނީ ކޯވިޑް19ގެ ހާލަތުގައި ދަތުރުކުރުމުގައި އެއަރލައިންތަކުން އަމަލުކުރަންޖެހޭ ގޮތްތައް ބަޔާންކޮށްފައެވެ. އެގޮތުން ފްލައިޓްގެ އެތެރޭގައާއި ޓާމިނަލްގެ ތެރޭގައި ފަސިންޖަރުން މާސްކު އަޅަން ޖެހޭނެކަމަށް ވަނީ ބުނެފައެވެ. މާސްކު އެޅުން އިސްތިސްނާވާ ފަރާތްތަކުގެ ތެރޭގައި 6 އަހަރުން ދަށުގެ ކުދިންނާއި، ސިއްހީ ސަބަބަކާއި ހުރެ މާސްކު ނޭޅޭ ފަރާތްތައް ހިމެނެއެވެ.
މީގެއިތުރުން އިތުރު ގޮތެއް އަންގަންދެން މިވަގުތަށް 1 ގަޑިއިރަށްވުރެ ކުރު ޑޮމެސްޓިކް ދަތުރުތަކުގައި ފްލައިޓްގެ ތެރޭގައި އެއްވެސް ކެއުމެއް އަދި ރިފްރެޝްމަންޓެއް ނުދިނުމަށްވެސް ސިވިލް އޭވިއޭޝަން އޮޓޯރިޓީން ވަނީ އަންގާފައެވެ.
ސިވިލް އޭވިއޭޝަން އޮޓޯރިޓީން މިގޮތައް އެންގުމާ ގުޅިގެން ޑޮމެސްޓިކް ހުރިހާ އެއާލައިނަކުން ވަނީ މިދުވަސްވަރު އެފަދަ ދަތުރުތަކުގައި ކާއެއްޗެހި ސާވް ނުކުރަން ނިންމައިފަ އެވެ. ރާއްޖޭގައި ޑޮމެސްޓިކް ދަތުރުތައް ކުރަނީ މޯލްޑިވިއަން އާއި މަންޓާ އާއި ފްލައިމީއެވެ. ދެން 1 ގަޑިއިރުގެ ކުރު ދަތުރުތަކުގައި ލިބޭނީ ރިކުއެސްޓް ކުރުމުން ފެން އެކަންޏެވެ.
ސައުތު އެފްރިކާއިން ފެނުނު ކޮވިޑްގެ އޮމިކްރޮން ވޭރިއެންޓް ރާއްޖެ އިން ވެސް މިހާރު ވަނީ ފެނިފައެވެ. އެހެންވެ ރައްކާތެރިކަމުގެ ފިޔަވަޅެއްގެ ގޮތުން އެފްރިކާގެ ބައެއް ގައުމުތަކުން ރާއްޖެއަށް މީހުން އައުން ވަނީ މަނާކޮށްފައެވެ. އޭގެތެރޭގައި ސައުތު އެފްރިކާ، ބޮސްޓްވާނާ، ނެމީބިއާ، ޒިންމްބާބޭ، މޮޒަންބީކް، ލެސޮތޯ އަދި އީސްވާޓިނީ ހިމެނެއެވެ.